വീഡിയോ പ്ലേ ചെയ്താൽ ഉടൻ വ്യൂസ് എണ്ണും; YouTube വ്യൂ കൗണ്ട് നിയമങ്ങളിൽ മാറ്റം; മോണിറ്റൈസേഷൻ ലഭിക്കലും ഇനി എളുപ്പമല്ല

വാഷിംഗ്ടൺ | യൂട്യൂബ് (YouTube) വീഡിയോകളുടെ കാഴ്ചക്കാരുടെ എണ്ണം കണക്കാക്കുന്ന രീതിയിൽ വലിയ മാറ്റം വരുത്താൻ കമ്പനി തീരുമാനിച്ചു. വീഡിയോ പ്ലേ ആയിത്തുടങ്ങുന്ന നിമിഷം മുതൽ തന്നെ കാഴ്ചക്കാരുടെ എണ്ണം (View Count) രേഖപ്പെടുത്തുന്ന പുതിയ സംവിധാനം ആഗസ്റ്റ് 24 മുതൽ പ്രാബല്യത്തിൽ വരും. സ്റ്റാൻഡേർഡ് യൂട്യൂബ് വീഡിയോകൾക്ക് പുറമെ ലൈവ് ബ്രോഡ്കാസ്റ്റുകൾക്കും ഇത് ബാധകമായിരിക്കും. യൂട്യൂബ് ഷോർട്ട്സ് (YouTube Shorts), ടിക് ടോക് (TikTok), ഇൻസ്റ്റാഗ്രാം (Instagram) തുടങ്ങിയ പ്ലാറ്റ്‌ഫോമുകളിൽ നിലവിലുള്ള കാഴ്ചക്കാരുടെ എണ്ണം കണക്കാക്കുന്ന രീതിക്ക് തുല്യമായാണ് സ്റ്റാൻഡേർഡ് വീഡിയോകളിലും ഈ മാറ്റം വരുത്തുന്നത്.

മുമ്പ് വീഡിയോകൾ ഏകദേശം 30 സെക്കൻഡ് കണ്ടതിനുശേഷമാണ് ഒരു കാഴ്ച്ചയായി യൂട്യൂബ് കണക്കാക്കിയിരുന്നത്. എന്നാൽ വ്യത്യസ്ത ഫോർമാറ്റുകളിൽ നിലനിന്നിരുന്ന ആശയക്കുഴപ്പം ഒഴിവാക്കാനും യഥാർത്ഥ എക്സ്പോഷർ മനസ്സിലാക്കാനും കണ്ടന്റ് നിർമാതാക്കൾ ആവശ്യപ്പെട്ടതിനാലാണ് ഈ അപ്ഡേറ്റ് കൊണ്ടുവരുന്നതെന്ന് യൂട്യൂബ് അറിയിച്ചു. ഈ മാറ്റം വഴി വീഡിയോകളുടെ പബ്ലിക് വ്യൂ കൗണ്ട് വർദ്ധിച്ചേക്കാമെങ്കിലും പഴയ മെട്രിക്സ്, എൻഗേജ്ഡ് വ്യൂസ് (Engaged Views) എന്ന പേരിൽ യൂട്യൂബ് അനലിറ്റിക്സ് (YouTube Analytics) ടൂളുകളിൽ ലഭ്യമായിരിക്കും.

ഈ മാറ്റം ക്രിയേറ്റർമാരുടെ വരുമാനത്തെയോ യൂട്യൂബ് പാർട്ണർ പ്രോഗ്രാം യോഗ്യതയെയോ ബാധിക്കില്ല. എന്നാൽ അടുത്ത വർഷം മുതൽ മോണിറ്റൈസേഷൻ യോഗ്യതാ മാനദണ്ഡങ്ങളിൽ മാറ്റങ്ങൾ വരുത്തുമെന്ന് യൂട്യൂബ് വ്യക്തമാക്കിയിട്ടുണ്ട്. പുതിയ മാനദണ്ഡങ്ങൾ അനുസരിച്ച് കണ്ടന്റ് നിർമാതാക്കൾക്ക് പ്രോഗ്രാമിൽ കയറാൻ കഴിഞ്ഞ ഒരു വർഷത്തിനിടെ 8000 വാച്ച് അവറുകളും (Watch Hours) അല്ലെങ്കിൽ 90 ദിവസത്തിനുള്ളിൽ 20 മില്യൺ ഷോർട്ട്സ് വ്യൂസും ആവശ്യമാണ്. നിലവിൽ ഇത് 1000 സബ്‌സ്ക്രൈബർമാരും 4000 വാച്ച് അവറുകളും അല്ലെങ്കിൽ 10 മില്യൺ ഷോർട്ട്സ് വ്യൂസുമാണ്. ഈ നയം ചെറിയ ക്രിയേറ്റർമാർക്ക് വലിയ വെല്ലുവിളിയാകുമെന്ന വിമർശനവും ഉയരുന്നുണ്ട്.

Content Highlights

YouTube will count views as soon as videos start playing starting August 24. This aligns standard videos with Shorts and Instagram. Creator earnings won’t change, but future monetization thresholds will double.