ജലനിരപ്പ് ഉയര്‍ന്നു ; ഇടുക്കി അണക്കെട്ട് തുറന്നേക്കും 

തൊടുപുഴ | ജലനിരപ്പ് വീണ്ടും ഉയര്‍ന്ന സാഹചര്യത്തില്‍ ഇടുക്കി അണക്കെട്ട് തുറക്കാന്‍ സാധ്യത.നിലവില്‍ 2398.46 അടിയാണ് ജലനിരപ്പ്. 2399.03 അടിയിലെത്തിയാല്‍ റെഡ് അലര്‍ട്ട് പ്രഖ്യാപിക്കും.

കഴിഞ്ഞദിവസത്തെ പുതുക്കിയ റൂള്‍ കര്‍വനുസരിച്ച് 2400.03 അടിവരെ വെള്ളം സംഭരിക്കാനാകുമെങ്കിലും നിലവിലെ സാഹചര്യത്തില്‍ ഇതിനു തയാറാവുകയില്ല. 2403 അടിയാണ് അണക്കെട്ടിലെ പരമാവധി സംഭരണശേഷി. ഈ മാസം 20നു റൂള്‍ കര്‍വ് അവസാനിക്കും.

വെള്ളിയാഴ്ച രാവിലെ ഏഴിന് അവസാനിച്ച 24 മണിക്കൂറിനിടെ 14.22 സെന്റിമീറ്റര്‍ മഴ പെയ്തു. ആവശ്യമെങ്കില്‍ ചെറുതോണി അണക്കെട്ടിന്റെ ഷട്ടര്‍ വഴി സെക്കന്‍ഡില്‍ 100 ക്യുമെക്‌സ് ജലം ഒഴുക്കിവിടാനാണ് നിര്‍ദേശം.