Obituary
തെങ്ങ് കടപുഴകി ദേഹത്ത് വീണ് തൊഴിലാളി മരിച്ചു
പത്തനംതിട്ട പൂവത്തൂര് പടിഞ്ഞാറേ കുന്നത്ത് തെക്കേചരുവില് നാരായണന്റെ മകന് സോമരാജന് (രാജു-60) ആണ് മരിച്ചത്.
കോഴഞ്ചേരി | തെങ്ങ് കടപുഴകി വീണ് തൊഴിലാളി മരിച്ചു. പൂവത്തൂര് പടിഞ്ഞാറേ കുന്നത്ത് തെക്കേചരുവില് നാരായണന്റെ മകന് സോമരാജന് (രാജു-60) ആണ് മരിച്ചത്.
കോയിപ്രം വള്ളക്കടവിന് സമീപം പന വെട്ടുന്നതിന് വേണ്ടി സഹായിയായി എത്തിയതായിരുന്നു സോമരാജന്. വെട്ടിയിട്ട പന ലക്ഷ്യം തെറ്റി ഒരു തെങ്ങിലേക്ക് വീഴുകയും ഇതേ തുടര്ന്ന് കടപുഴകിയ തെങ്ങ് രാജുവിന്റെ ദേഹത്ത് പതിക്കുകയുമായിരുന്നു.
ചെങ്ങന്നൂരില് നിന്നും ഫയര്ഫോഴ്സ് എത്തി തെങ്ങ് വെട്ടിമാറ്റിയാണ് മൃതദേഹം പുറത്തെടുത്തത്. കോയിപ്രം പോലീസ് മേല്നടപടികള് സ്വീകരിച്ചു. ചെങ്ങന്നൂര് സര്ക്കാര് ആശുപത്രിയിലെ പോസ്റ്റുമോര്ട്ടത്തിനു ശേഷം മൃതദേഹം ബന്ധുക്കള്ക്ക് വിട്ടുകൊടുത്തു. സംസ്കാരം പിന്നീട്.
ഭാര്യ: പരേതയായ വസുന്ധര. മക്കള്: രാജീവ്, രഞ്ജീവ്. മരുമകള്: നിരഞ്ജന.