വിശ്വകിരീടം നിലനിർത്താൻ ഇന്ത്യക്ക് ഇനിയും കടമ്പകൾ; ഞായറാഴ്ച കൊൽക്കത്തയിൽ തീപാറും

ന്യൂഡൽഹി | ഐ സി സി പുരുഷ ടി20 ലോകകപ്പ് 2026 ൽ നിലവിലെ ചാമ്പ്യന്മാരായ ഇന്ത്യയുടെ സെമി ഫൈനൽ സാധ്യതകളിൽ നിലനിന്നിരുന്ന അനിശ്ചിതത്വങ്ങൾ നീങ്ങി. ഗ്രൂപ്പ് ഒന്നിലെ നിർണ്ണായക പോരാട്ടങ്ങൾ പൂർത്തിയായതോടെ ഇന്ത്യയുടെ മുന്നിലുള്ള വഴി ഇപ്പോൾ വ്യക്തമാണ്. അഹമ്മദാബാദിൽ നടന്ന മത്സരത്തിൽ വെസ്റ്റ് ഇൻഡീസിനെ ഒമ്പത് വിക്കറ്റിന് തകർത്ത ദക്ഷിണാഫ്രിക്ക സെമി ഫൈനൽ ഉറപ്പിച്ചു കഴിഞ്ഞു. സിംബാബ്‌വെയ്‌ക്കെതിരെ ചെന്നൈയിൽ നടന്ന മത്സരത്തിൽ 72 റൺസിന്റെ ഉജ്ജ്വല വിജയം നേടിയതോടെ ഇന്ത്യയും തങ്ങളുടെ നില മെച്ചപ്പെടുത്തിയിട്ടുണ്ട്.

ഞായറാഴ്ച കൊൽക്കത്തയിലെ ഈഡൻ ഗാർഡൻസിൽ നടക്കുന്ന ഇന്ത്യ – വെസ്റ്റ് ഇൻഡീസ് പോരാട്ടം ഫലത്തിൽ ഒരു ക്വാർട്ടർ ഫൈനൽ പോരാട്ടമായി മാറിയിരിക്കുകയാണ്. ഈ മത്സരത്തിൽ വിജയിക്കുന്നവർക്ക് ദക്ഷിണാഫ്രിക്കയ്‌ക്കൊപ്പം സെമിയിലേക്ക് മുന്നേറാം. നിലവിൽ രണ്ട് മത്സരങ്ങളിൽ നിന്ന് ഇരു ടീമുകൾക്കും രണ്ട് പോയിന്റ് വീതമാണുള്ളത്.

വിരലിലെണ്ണാവുന്ന ആശങ്കകൾ മാത്രമാണ് ഇനി ഇന്ത്യക്ക് മുന്നിലുള്ളത്. കൊൽക്കത്തയിൽ കളി മഴ മൂലം ഉപേക്ഷിക്കപ്പെടുകയും റിസർവ് ഡേ ഇല്ലാതിരിക്കുകയും ചെയ്താൽ നെറ്റ് റൺറേറ്റിലെ മുൻതൂക്കം വെസ്റ്റ് ഇൻഡീസിന് തുണയാകും. ഇത് ഇന്ത്യ ടൂർണമെന്റിൽ നിന്ന് പുറത്താകാൻ കാരണമാകും. എന്നാൽ നിലവിലെ കാലാവസ്ഥാ പ്രവചനം അനുസരിച്ച് ഞായറാഴ്ച കൊൽക്കത്തയിൽ മഴ ഭീഷണിയില്ല എന്നത് ഇന്ത്യക്ക് ആശ്വാസമാണ്.

സിംബാബ്‌വെയ്‌ക്കെതിരായ ബാറ്റിംഗ് വിരുന്ന് ഇന്ത്യൻ ക്യാമ്പിൽ ആത്മവിശ്വാസം വർധിപ്പിച്ചിട്ടുണ്ട്. ടി20 ലോകകപ്പ് ചരിത്രത്തിലെ രണ്ടാമത്തെ ഉയർന്ന സ്കോറായ 256/4 ആണ് ഇന്ത്യ പടുത്തുയർത്തിയത്. ഫോമിലേക്ക് തിരിച്ചെത്തിയ അഭിഷേക് ശർമ്മയുടെ അർദ്ധ സെഞ്ചുറിയും ഹാർദിക് പാണ്ഡ്യ, തിലക് വർമ്മ എന്നിവരുടെ വെടിക്കെട്ട് ഫിനിഷിംഗും ഇന്ത്യക്ക് കരുത്തായി. ബ്രയാൻ ബെന്നറ്റിന്റെ 97 റൺസ് പോരാട്ടത്തിനിടയിലും സിംബാബ്‌വെയെ തളക്കാൻ ഇന്ത്യൻ ബൗളർമാർക്ക് സാധിച്ചു. മറുവശത്ത് വെസ്റ്റ് ഇൻഡീസിനെതിരെ എയ്ഡൻ മർക്രം, ക്വിന്റൺ ഡി കോക്ക് എന്നിവരുടെ ബാറ്റിംഗ് മികവിൽ ദക്ഷിണാഫ്രിക്ക അനായാസ വിജയം നേടുകയായിരുന്നു.

Summary

India’s path to the ICC Men’s T20 World Cup 2026 semi-finals is now a clear “win-and-progress” scenario following their dominant 72-run victory over Zimbabwe. The upcoming clash against West Indies at Eden Gardens has become a virtual quarter-final, with the winner set to join South Africa in the last four. While a rain washout could favor the West Indies due to a superior net run rate, the current forecast for Sunday’s high-stakes match remains clear.