യു എ ഇയിലെ സ്വകാര്യ മേഖലയിലെ തൊഴില്‍ ബന്ധങ്ങളുടെ നിയന്ത്രണം; പുതിയ നിയമം അടുത്ത വര്‍ഷം ഫെബ്രവരിയില്‍ പ്രാബല്യത്തില്‍

അബുദബി | യു എ ഇയിലെ സ്വകാര്യ മേഖലയിലെ തൊഴില്‍ ബന്ധങ്ങളുടെ നിയന്ത്രണം സംബന്ധിച്ച് നടപ്പിലാക്കുന്ന പുതിയ നടപടികളുമായി ബന്ധപ്പെട്ട് പ്രസിഡന്റ് ശൈഖ് ഖലീഫ ബിന്‍ സായിദ് അല്‍ നഹ്യാന്‍ ഫെഡറല്‍ ഉത്തരവ് 2021-ലെ നമ്പര്‍ 33 നിയമം ഔദ്യോഗികമായി പുറത്തിറക്കി. ഈ ഉത്തരവ് അനുസരിച്ച് യു എ ഇയിലെ സ്വകാര്യ തൊഴില്‍ മേഖലയില്‍ നടപ്പിലാക്കുന്ന പുതിയ നിയമങ്ങള്‍ 2022 ഫെബ്രുവരി 2 മുതല്‍ പ്രാബല്യത്തില്‍ വരും. രാജ്യവ്യാപകമായി തൊഴില്‍ വിപണിയുടെ വഴക്കം, പ്രതിരോധശേഷി, സുസ്ഥിരത എന്നിവ വര്‍ദ്ധിപ്പിക്കാനും തൊഴിലാളികളുടെ അവകാശങ്ങള്‍ സംരക്ഷിക്കാനും ലക്ഷ്യമിട്ടാണ് ഈ പുതിയ ഉത്തരവ്-നിയമം പുറത്തിറക്കിയിരിക്കുന്നത്. തൊഴിലാളികളുടെ ക്ഷേമവും നന്മയും അതിന്റെ കാതലായി സ്ഥാപിക്കുന്ന ഈ നിയമത്തില്‍ സ്വകാര്യ മേഖലയിലെ എല്ലാ ജീവനക്കാര്‍ക്കും സുരക്ഷിതവും ആരോഗ്യകരവും ബിസിനസ്സ് അനുകൂലവുമായ അന്തരീക്ഷം ഉറപ്പാക്കുന്നതിന് നിരവധി നടപടികള്‍ ഉള്‍പ്പെടുത്തിയിട്ടുണ്ട്. മുഴുവന്‍ സമയ, പാര്‍ട്ട് ടൈം, താല്‍ക്കാലിക, ഫ്‌ലെക്‌സി ജോലികള്‍ ഉള്‍പ്പെടെയുള്ള വിവിധ തൊഴില്‍ വിഭാഗങ്ങള്‍ക്ക് ബാധകമാക്കുന്ന ഈ നിയമം, ഓരോ വിഭാഗത്തിലെയും രണ്ട് കക്ഷികളുടെയും ഉത്തരവാദിത്തങ്ങള്‍ പ്രതിപാദിക്കുന്ന രീതിയിലാണ് നിര്‍മ്മിച്ചിരിക്കുന്നത്.

ഫെബ്രുവരി മുതല്‍ പ്രാബല്യത്തില്‍ വരുന്ന പ്രധാന മാറ്റങ്ങള്‍

തൊഴിലിടങ്ങളിലെ വിവേചനങ്ങള്‍ ഒഴിവാക്കുന്നതിനുള്ള വ്യവസ്ഥകള്‍:
1 . നിയമത്തിലെ ആര്‍ട്ടിക്കിള്‍ 74 വ്യവസ്ഥ പ്രകാരം തൊഴില്‍ ദാതാവ് തൊഴിലാളിയെ ഏതെങ്കിലും രീതിയില്‍ നിര്‍ബന്ധിക്കുന്നതോ ശിക്ഷിക്കുന്നതോ ഭീഷണിപ്പെടുത്തുന്നതോ ആയ ഒരു മാര്‍ഗവും ഉപയോഗിക്കരുത്.
2 . തൊഴില്‍ ദാതാവ്, ജോലിസ്ഥലത്തെ അവന്റെ/അവളുടെ മേലുദ്യോഗസ്ഥര്‍ അല്ലെങ്കില്‍ സഹപ്രവര്‍ത്തകര്‍ എന്നിവരാല്‍ ലൈംഗിക പീഡനം, ഭീഷണിപ്പെടുത്തല്‍ അല്ലെങ്കില്‍ ഏതെങ്കിലും തരത്തിലുള്ള വാക്കാലുള്ളതോ ശാരീരികമോ മാനസികമോ ആയ അക്രമം എന്നിവ വിലക്കിക്കൊണ്ടുള്ള വ്യവസ്ഥകള്‍ ഈ നിയമത്തില്‍ ഉള്‍പ്പെടുത്തിയിട്ടുണ്ട്.
3 . വംശം, നിറം, ലിംഗം, മതം, ദേശീയ അല്ലെങ്കില്‍ സാമൂഹിക ഉത്ഭവം അല്ലെങ്കില്‍ വൈകല്യം എന്നിവയെ അടിസ്ഥാനമാക്കിയുള്ള എല്ലാത്തരം വിവേചനങ്ങളെയും നിയമം നിരോധിക്കുന്നു.
4 . സ്ത്രീകളുടെ നിശ്ചിത അവകാശങ്ങള്‍ ലംഘിക്കാതെ തന്നെ തൊഴിലാളികളെ തൊഴില്‍ വിവേചനമില്ലാതെ നിയന്ത്രിക്കുന്ന എല്ലാ വ്യവസ്ഥകളും സ്ത്രീകള്‍ക്ക് ബാധകമാകുമെന്ന് ഈ നിയമ ഭേദഗതികള്‍ ഊന്നിപ്പറയുന്നു.
5 . ഒരേ ജോലികള്‍ ചെയ്യുന്ന സ്ത്രീ, പുരുഷ ജീവനക്കാര്‍ക്ക് ഒരേ ശമ്പളം നല്‍കുന്നതിനുള്ള വ്യവസ്ഥകളും നിയമം അനുശാസിക്കുന്നു.

പുതിയ തൊഴില്‍ രീതികള്‍ അവലംബിക്കുന്നതിനുള്ള നിയമങ്ങള്‍

തൊഴിലുടമകള്‍ക്ക് തങ്ങളുടെ സ്ഥാപനങ്ങളിലെ തൊഴില്‍ ആവശ്യങ്ങള്‍ക്ക് അനുസൃതമായി പുതിയ തൊഴില്‍ രീതികള്‍ അവലംബിക്കുന്നതിനുള്ള വ്യവസ്ഥകള്‍ ഈ നിയമത്തില്‍ ഉള്‍പ്പെടുത്തിയിട്ടുണ്ട്.

1 . ഏറ്റവും കുറഞ്ഞ പ്രവര്‍ത്തന ചെലവില്‍ ജീവനക്കാരുടെ ഊര്‍ജ്ജത്തില്‍ നിന്നും, ഉല്‍പ്പാദനക്ഷമതയില്‍ നിന്നും തൊഴില്‍ ആവശ്യകതകള്‍ നിറവേറ്റുന്നതിന് സഹായിക്കുന്ന പാര്‍ട്ട് ടൈം ജോലി, താല്‍ക്കാലിക ജോലി, ഫ്‌ലെക്‌സി ജോലികള്‍ തുടങ്ങിയ തൊഴില്‍ രീതികള്‍ ഇതിന്റെ ഭാഗമായി അനുവദിക്കുന്നതാണ്.
2 . തൊഴില്‍ കരാറുകള്‍ കാലഹരണപ്പെട്ട, എന്നാല്‍ ഇപ്പോഴും രാജ്യത്ത് തുടരുന്നവരെ, എളുപ്പവും വഴക്കമുള്ളതുമായ നടപടിക്രമങ്ങളിലൂടെ നിയമിക്കാന്‍ തൊഴിലുടമകളെ അനുവദിക്കുന്നതിനുള്ള വ്യവസ്ഥകള്‍ ഈ നിയമത്തിന്റെ ഭാഗമാണ്.
3 . തൊഴിലാളികള്‍ക്ക് പാര്‍ട്ട് ടൈം ജോലിയിലൂടെ ഒരു തൊഴിലുടമയ്ക്ക് കീഴില്‍ നിശ്ചിത എണ്ണം മണിക്കൂറുകളോ ദിവസങ്ങളോ ജോലി ചെയ്യാന്‍ അനുവാദം ലഭിക്കുന്നതാണ്.
4 . ഒരു നിശ്ചിത കാലയളവ് ആവശ്യമുള്ള ജോലികള്‍, അല്ലെങ്കില്‍ ഒരു നിര്‍ദ്ദിഷ്ട ജോലിയുടെ പൂര്‍ത്തീകരണത്തോടെ അവസാനിക്കുന്ന ജോലികള്‍ എന്നിവയെ താല്‍ക്കാലിക ജോലി എന്ന രീതിയില്‍ കണക്കാക്കുന്നതാണ്.
5 . ജോലിയുടെ അളവും തൊഴിലുടമയുടെ സാമ്പത്തികവും പ്രവര്‍ത്തനപരവുമായ ഘടകങ്ങള്‍ക്കനുസരിച്ച് ജോലി സമയമോ പ്രവൃത്തി ദിവസങ്ങളോ മാറുന്ന ജോലികളെ ഫ്‌ലെക്‌സിബിള്‍ വര്‍ക്ക് എന്ന രീതിയില്‍ കണക്കാക്കുന്നതാണ്.
6 . തൊഴില്‍ കരാറിലെ ഇരു കക്ഷികളും തമ്മിലുള്ള വ്യവസ്ഥകള്‍ പ്രകാരം യു എ ഇ ദിര്‍ഹത്തിലോ മറ്റേതെങ്കിലും കറന്‍സിയിലോ വേതനം നല്‍കാനുള്ള സൗകര്യം ഈ നിയമം കമ്പനികള്‍ക്ക് നല്‍കുന്നു.
7 . തൊഴിലുടമയുടെ ഉപഭോക്താക്കളുടെ വിവരങ്ങള്‍, തൊഴിലുടമയുടെ വ്യാപാര രഹസ്യങ്ങള്‍ എന്നിവ അറിയാന്‍ ഇടയുള്ള തൊഴിലുകളിലുള്ള തൊഴിലാളികളെ തൊഴിലുടമയുമായി മത്സരിക്കുന്നതില്‍ നിന്നും, തൊഴിലുടമ ചെയ്യുന്ന അതേ ബിസിനസ്സിലെ തന്നെ മത്സര സ്വഭാവമുള്ള മറ്റു സമാനമായ പ്രോജക്ടുകളില്‍ പങ്കെടുക്കുന്നതില്‍ നിന്നും വിലക്കുന്നതിനുള്ള വ്യവസ്ഥകള്‍ ഈ നിയമത്തില്‍ ഉള്‍പ്പെടുത്തിയിട്ടുണ്ട്. ഇത്തരം വ്യവസ്ഥകള്‍ തൊഴില്‍ കരാര്‍ അവസാനിച്ച് രണ്ട് വര്‍ഷത്തേക്ക് വരെ ബാധകമാകുന്നതാണ്.

തൊഴില്‍ കരാര്‍, അവധി, തൊഴിലാളികളുടെ അവകാശങ്ങള്‍ എന്നിവ സംബന്ധിച്ച പുതിയ വ്യവസ്ഥകള്‍

1 . മൂന്ന് വര്‍ഷത്തില്‍ കവിയാത്തതും, രണ്ട് കക്ഷികളുടെയും ധാരണ പ്രകാരം ഒന്നോ അതിലധികമോ സമയത്തേക്ക് നീട്ടുകയോ പുതുക്കുകയോ ചെയ്യുന്നത് അനുവദിക്കുകയും ചെയ്യുന്ന രീതിയിലായിരിക്കും പുതിയ നിയമ പ്രകാരം തൊഴിലുടമയും, തൊഴിലാളിയും തമ്മിലുള്ള നിശ്ചിത-കാല കരാറുകള്‍.
2 . പരിധിയില്ലാത്ത തൊഴില്‍ കരാറുകള്‍ നിശ്ചിതകാല തൊഴില്‍ കരാറുകളായി പരിവര്‍ത്തനം ചെയ്യണമെന്നും നിയമം അനുശാസിക്കുന്നു.
3 . ഈ നിയമം തൊഴിലാളികള്‍ക്ക് ആഴ്ച്ച തോറും ശമ്പളത്തോട് കൂടിയ ഒരു വിശ്രമദിനം ലഭിക്കുന്നതിന് അവകാശം നല്‍കുന്നു. തൊഴിലുടമയുടെ വിവേചനാധികാരത്തില്‍ ആഴ്ചതോറുമുള്ള വിശ്രമദിനങ്ങളുടെ എണ്ണം വര്‍ധിപ്പിക്കുന്നതിന് അനുമതി നല്‍കിയിട്ടുണ്ട്.
4 . തൊളിലാളികളുടെ വെക്കേഷന് പുറമെ കുടുംബാംഗങ്ങളുടെ മരണം, മാനുഷിക പരിഗണന ആവശ്യമുള്ള മറ്റു സാഹചര്യങ്ങള്‍
5 . തുടങ്ങിയവയുമായി ബന്ധപ്പെട്ട് മൂന്ന് മുതല്‍ അഞ്ച് ദിവസം വരെ ലീവ് അനുവദിക്കേണ്ടതാണ്.
6 . ജീവനക്കാരുടെ പ്രസവാവധി അറുപത് ദിവസം വരെയാക്കിയിട്ടുണ്ട്. ഇതില്‍ 45 ദിവസം പൂര്‍ണ്ണ വേതനത്തോടെയും, 15 ദിവസം പകുതി വേതനത്തോടെയുമാണ് ഈ അവധി അനുവദിച്ചിരിക്കുന്നത്.
7 . കുഞ്ഞിന്റെ ജനനത്തെ തുടര്‍ന്ന് എന്തെങ്കിലും സങ്കീര്‍ണ്ണതകളോ, കുട്ടിയ്ക്ക് എന്തെങ്കിലും അസുഖങ്ങളോ ഉണ്ടെങ്കില്‍ വേതനമില്ലാതെ 45 ദിവസത്തേക്ക് കൂടി അധിക അവധിയ്ക്ക് അപേക്ഷിക്കുന്നതിനും അനുമതി നല്‍കിയിട്ടുണ്ട്. ഇതിനായി മെഡിക്കല്‍ രേഖകള്‍ ഹാജരാക്കേണ്ടതാണ്.
8 . സ്വകാര്യ മേഖലയിലെ തൊഴിലാളികള്‍ക്ക് അഞ്ച് ദിവസത്തെ പാറ്റേണിറ്റി അവധി അനുവദിക്കുന്നതാണ്.
9 . ഒരു തൊഴിലുടമക്ക് കീഴില്‍ രണ്ട് വര്‍ഷത്തെ സേവനം പൂര്‍ത്തിയാക്കിയ ജീവനക്കാര്‍ക്ക്, അവര്‍ യു എ ഇയിലെ ഏതെങ്കിലും അംഗീകൃത പഠന സ്ഥാപനങ്ങളില്‍ ചേര്‍ന്നിട്ടുണ്ടെങ്കില്‍ പത്ത് ദിവസത്തെ വരെ സ്റ്റഡി ലീവിന് അര്‍ഹതയുണ്ടായിരിക്കുന്നതാണ്.
10 . തൊഴിലാളിയെ നിയമിക്കുന്നതിനുള്ള റിക്രൂട്ട്മെന്റിന്റെ ഫീസും ചെലവും അടയ്ക്കാനുള്ള ഉത്തരവാദിത്തം തൊഴിലുടമയിലായിരിക്കുമെന്ന് ഈ നിയമം അനുശാസിക്കുന്നു. ഈ തുക തൊഴിലാളിയില്‍ നിന്ന് നേരിട്ടോ അല്ലാതെയോ ഈടാക്കരുതെന്നും ഈ നിയമം വ്യവസ്ഥ ചെയ്യുന്നു.
11 . അഞ്ച് മണിക്കൂര്‍ തുടച്ചയായി ജോലി ചെയ്യുന്ന തൊഴിലാളികള്‍ക്ക് ഒരു മണിക്കൂര്‍ ഇടവേള അനുവദിക്കേണ്ടതാണ്.
12 . ഒരു ദിവസം ഓവര്‍ ടൈം എന്ന രീതിയില്‍ പരമാവധി 2 മണിക്കൂര്‍ മാത്രമാണ് അനുവദിക്കുന്നത്. ഇതില്‍ കൂടുതല്‍ ഓവര്‍ ടൈം ആവശ്യമായി വരുന്ന സാഹചര്യങ്ങളില്‍ തൊഴിലാളികള്‍ക്ക് ഓരോ മണിക്കൂറിനും നിശ്ചയിച്ചിട്ടുള്ള വേതനത്തിന് പുറമെ 25 ശതമാനം അധിക വേതനം ഉറപ്പാക്കേണ്ടതാണ്. രാത്രി പത്ത് മണിമുതല്‍ പുലര്‍ച്ചെ നാല് മണിവരെ ഓവര്‍ ടൈം ജോലി ചെയ്യുന്നവര്‍ക്ക് ഓരോ മണിക്കൂറിനും നിശ്ചയിച്ചിട്ടുള്ള വേതനത്തിന് പുറമെ 50 ശതമാനം അധിക വേതനം ഉറപ്പാക്കേണ്ടതാണ്. ഷിഫ്റ്റുകളില്‍ തൊഴിലെടുക്കുന്നവരെ ഇതില്‍ ഉള്‍പ്പെടുത്തിയിട്ടില്ല.
13 . തൊഴിലാളികളുടെ പാസ്പോര്‍ട്ട് പോലുള്ള ഔദ്യോഗിക രേഖകള്‍ തടഞ്ഞുവയ്ക്കുന്നതും, തൊഴില്‍ കരാറിന്റെ അവസാനം രാജ്യം വിടാന്‍ നിര്‍ബന്ധിക്കുന്നതും ഈ നിയമം നിരോധിച്ചിട്ടുണ്ട്. തൊഴില്‍ വിപണിയിലെ മറ്റൊരു സ്ഥാപനത്തിലേക്ക് തൊഴിലാളിയെ മാറാന്‍ അനുവദിക്കുന്നതിനാണ് ഇത് ചെയ്തിരിക്കുന്നത്.
14 . മന്ത്രാലയം അംഗീകരിച്ച ചട്ടങ്ങള്‍ക്കനുസൃതമായും, ഈ ഉത്തരവ്-നിയമത്തിന്റെ എക്‌സിക്യൂട്ടീവ് റെഗുലേഷന്‍സ് വ്യക്തമാക്കിയ വ്യവസ്ഥകള്‍ക്കും നടപടിക്രമങ്ങള്‍ക്കും അനുസൃതമായും നിശ്ചിത തീയതിയില്‍ തന്റെ വേതനം നേടാന്‍ തൊഴിലാളിക്ക് അവകാശം നല്‍കിയിട്ടുണ്ട്.
15 . തൊഴില്‍ കരാര്‍ കാലഹരണപ്പെടുന്ന സാഹചര്യത്തില്‍ മറ്റൊരു തൊഴിലുടമയുടെ കീഴിലേക്ക് മാറുന്നതിന് ഈ ഉത്തരവ്-നിയമം അനുവാദം നല്‍കിയിട്ടുണ്ട്.
16 . തൊഴിലാളിയുടെ പ്രൊബേഷണറി കാലയളവ് പരമാവധി ആറ് മാസമാക്കി നിജപ്പെടുത്തിയിട്ടുണ്ട്.
17 . നിയമത്തിന്റെ എക്‌സിക്യൂട്ടീവ് ചട്ടങ്ങള്‍ക്കനുസൃതമായും, പെന്‍ഷനുകള്‍ നിയന്ത്രിക്കുന്ന നിയമനിര്‍മ്മാണത്തിന് അനുസൃതമായും, ഒരു തൊഴിലാളിക്ക് സേവനാനന്തര ഗ്രാറ്റുവിറ്റിക്ക് അര്‍ഹത നല്‍കിയിട്ടുണ്ട്.
18 . ഈ നിയമമനുസരിച്ച്, ഒരു സ്ഥാപനത്തില്‍ തുടര്‍ച്ചയായി ഒന്നോ അതിലധികമോ വര്‍ഷം മുഴുവന്‍ സമയ ജീവനക്കാരനായി ജോലി ചെയ്യുകയും സേവനം പൂര്‍ത്തിയാക്കുകയും ചെയ്ത വിദേശ തൊഴിലാളിക്ക് അടിസ്ഥാന വേതനം അനുസരിച്ച് കണക്കാക്കിയ സേവനാനന്തര ആനുകൂല്യങ്ങള്‍ നല്‍കേണ്ടതാണ്.
19 . തൊഴിലാളികള്‍, അല്ലെങ്കില്‍ അവരുടെ ബന്ധുക്കള്‍ എന്നിവര്‍ നല്‍കുന്ന നിയമ വ്യവഹാരങ്ങള്‍, നിവേദനങ്ങള്‍ തുടങ്ങിയവയ്ക്ക് 100000 ദിര്‍ഹം വരെ മൂല്യമുള്ള ജുഡീഷ്യല്‍ ഫീസ് ഒഴിവാക്കി നല്‍കുന്നതാണ്.