Kerala
സംസ്ഥാനത്തെ ആശുപത്രിക്ക് ആദ്യമായി മുസ്കാന് സര്ട്ടിഫിക്കേഷന് ലഭ്യമായി; ആരോഗ്യ മന്ത്രി വീണ ജോര്ജ്
96 ശതമാനം സ്കോറോടെ കോഴിക്കോട് ഗവ. മെഡിക്കല് കോളജ് ഐ.എം.സി.എച്ച് ആശുപത്രിയാണ് സര്ട്ടിഫിക്കേഷന് കരസ്ഥമാക്കിയത്.
തിരുവനന്തപുരം | ആദ്യമായി സംസ്ഥാനത്തെ ഒരു ആശുപത്രിക്ക് ദേശീയ മുസ്കാന് സര്ട്ടിഫിക്കേഷന് ലഭ്യമായതായി ആരോഗ്യമന്ത്രി വീണ ജോര്ജ്. മികച്ച ശിശു സൗഹൃദ സേവനങ്ങള്ക്കാണ് മുസ്കാന് സര്ട്ടിഫിക്കേഷന് നല്കുന്നത്. 96 ശതമാനം സ്കോറോടെ കോഴിക്കോട് ഗവ. മെഡിക്കല് കോളജ് ഐ.എം.സി.എച്ച് ആശുപത്രിയാണ് സര്ട്ടിഫിക്കേഷന് കരസ്ഥമാക്കിയത്.
കേരളത്തിലെ മുഴുവന് മെഡിക്കല് കോളേജുകളിലും ജില്ലാ, താലൂക്കുതല ആശുപത്രികളിലും ശിശു സൗഹൃദ നയം നടപ്പിലാക്കി ഗുണനിലവാരമുള്ള ചികിത്സ കുഞ്ഞുങ്ങള്ക്ക് ലഭ്യമാക്കുമെന്നും കൂടുതല് ആശുപത്രികള്ക്ക് ദേശീയ മുസ്കാന് സര്ട്ടിഫിക്കേഷന് ലഭ്യമാക്കുന്നതിന് പരിശ്രമിക്കുമെന്നും ആരോഗ്യമന്ത്രി വ്യക്തമാക്കി.
സംസ്ഥാനത്തെ ആശുപത്രികളെ മാതൃശിശു സൗഹൃദമാക്കാനായി സര്ക്കാര് വിവിധ പദ്ധതികള് നടപ്പിലാക്കി വരുന്നുണ്ട്. മാതൃശിശു സൗഹൃദ ആശുപത്രി ഇനിഷ്യേറ്റീവ് സര്ട്ടിഫിക്കറ്റ് നടപ്പിലാക്കിയ ആദ്യ സംസ്ഥാനം രാജ്യത്ത് കേരളമാണ്. ഇതുവരെ 45 സര്ക്കാര് സ്വകാര്യ ആശുപത്രികള്ക്കാണ് മാതൃശിശു സൗഹൃദ ആശുപത്രി ഇനിഷ്യേറ്റീവ് സര്ട്ടിഫിക്കറ്റ് ലഭ്യമായത്.
നവജാത ശിശുക്കളുടെയും കുട്ടികളുടെയും രോഗാവസ്ഥയും മരണനിരക്കും കുറയ്ക്കുന്നതിന് പൊതുജനാരോഗ്യ കേന്ദ്രങ്ങളില് ഗുണനിലവാരമുള്ള ശിശു സൗഹൃദ സേവനങ്ങള് ഉറപ്പാക്കുക എന്നതാണ് മുസ്കാന് പദ്ധതിയിലൂടെ ഉദ്ദേശിക്കുന്നത്.
എസ്.എന്.സി.യു.കള്, എന്.ബി.എസ്.യു.കള്, പ്രസവാനന്തര വാര്ഡുകള്, പീഡി
യാട്രിക് ഒപിഡികള്, എന്നീ വിഭാഗങ്ങളുടെ ഗുണനിലവാരം മെച്ചപ്പെടുത്തുക എന്നിവയാണ് മുസ്കാര് പദ്ധതിയിലൂടെ നടപ്പിലാക്കുന്നത്