Kasargod
ദേശീയപതാക തലകീഴായി ഉയര്ത്തിയ മന്ത്രി രാജിവെക്കണം: കെ സുരേന്ദ്രന്
ദേശീയപതാകയോട് അനാദരവ് കാണിച്ച മന്ത്രിക്കും ഉദ്യോഗസ്ഥര്ക്കുമെതിരെ പൊലീസ് കേസെടുക്കണമെന്നും കെ. സുരേന്ദ്രന് പ്രസ്താവനയില് ആവശ്യപ്പെട്ടു.
കോഴിക്കോട്| റിപ്പബ്ലിക് ദിനാഘോഷത്തിന്റെ ഭാഗമായി കാസര്ഗോഡ് ദേശീയ പതാക തലകീഴായി ഉയര്ത്തിയ മന്ത്രി അഹമ്മദ് ദേവര്കോവില് രാജിവെക്കണമെന്ന് ബിജെപി സംസ്ഥാന അധ്യക്ഷന് കെ സുരേന്ദ്രന്. ദേശീയപതാകയോട് അനാദരവ് കാണിച്ച മന്ത്രിക്കും ഉദ്യോഗസ്ഥര്ക്കുമെതിരെ പൊലീസ് കേസെടുക്കണമെന്നും അദ്ദേഹം പ്രസ്താവനയില് ആവശ്യപ്പെട്ടു.
കാസര്ഗോഡ് മുനിസിപ്പല് സ്റ്റേഡിയത്തില്വെച്ച് നടന്ന റിപ്പബ്ലിക് ആഘോഷത്തിനിടെ പതാക തലകീഴായി ഉയര്ത്തിയിട്ടും മന്ത്രിയുടെയോ മറ്റ് ഉദ്യോഗസ്ഥരുടെയോ ശ്രദ്ധയില്പ്പെട്ടില്ലെന്ന് പറയുന്നത് വിശ്വസിക്കാനാകില്ലെന്ന് സുരേന്ദ്രന് പറഞ്ഞു. പാതക തലകീഴായി ഉയര്ത്തിയ ശേഷം മന്ത്രി അഹമ്മദ് ദേവര്കോവില് സല്യൂട്ട് ചെയ്തുവെന്നത് ഗൗരവതരമായ കാര്യമാണ്. ഇതിനുശേഷം മാധ്യമപ്രവര്ത്തകരാണ് പതാക തലകീഴായി ഉയര്ത്തിയ കാര്യം ചൂണ്ടിക്കാട്ടിയത്. ഇത്തരത്തില് വലിയ തെറ്റ് പറ്റിയിട്ടും മന്ത്രിക്കും മറ്റ് പോലീസ് ഉദ്യോഗസ്ഥര്ക്കുമുള്പ്പെടെ പിഴവ് മനസിലായില്ലെന്നത് അപഹാസ്യമാണ്. ജില്ലാ പൊലീസ് മേധാവി ഉള്പ്പെടെ പങ്കെടുത്ത ചടങ്ങിലാണ് ദേശീയ പതാകയോട് അനാദരവ് കാട്ടിയതെന്നതിനാല് സംഭവം ഡിജിപി അന്വേഷിക്കണമെന്നും സുരേന്ദ്രന് ആവശ്യപ്പെട്ടു.