karuvannur bank case
കരുവന്നൂര് ബാങ്ക് തട്ടിപ്പ്: പി ആര് അരവിന്ദാക്ഷന്, സി കെ ജില്സ് എന്നിവരുടെ ഇ ഡി കസ്റ്റഡി അപേക്ഷ ഇന്ന് പരിഗണിക്കും
അരവിന്ദാക്ഷന്റെ വിദേശയാത്ര, ബാങ്ക് നിക്ഷേപം എന്നിവ സംബന്ധിച്ച വിവര ശേഖരണ ത്തിനാണ് ഇരുവരെയും കസ്റ്റഡിയില് വാങ്ങുന്നത്.
കൊച്ചി | കരുവന്നൂര് ബാങ്ക് തട്ടിപ്പിലെ കള്ളപ്പണ ഇടപാട് കേസില് വടക്കാഞ്ചേരി നഗരസഭ ആരോഗ്യ സ്റ്റാന്ഡിങ് കമ്മിറ്റി ചെയര്മാന് പി ആര് അരവിന്ദാക്ഷന്, കരുവന്നൂര് ബാങ്ക് മുന് ജീവനക്കാരന് സി കെ ജില്സ് എന്നിവരെ വീണ്ടും കസ്റ്റഡിയില് വാങ്ങാന് ഇ ഡി സമര്പ്പിച്ച കസ്റ്റഡി അപേക്ഷ ഇന്ന് പരിഗണിക്കും.
അരവിന്ദാക്ഷന്റെ വിദേശയാത്ര, ബാങ്ക് നിക്ഷേപം എന്നിവ സംബന്ധിച്ച വിവര ശേഖരണ ത്തിനാണ് ഇരുവരെയും കസ്റ്റഡിയില് വാങ്ങുന്നത്. ഒന്നാംപ്രതി സതീഷ് കുമാറുമായി പി ആര് അരവിന്ദാക്ഷന് നടത്തിയ വിദേശയാത്രകള്, കൂടുതല് ബാങ്ക് അക്കൗണ്ടുകള് വഴിയുള്ള സാമ്പത്തിക ഇടപാടുകള് എന്നീ കാര്യങ്ങളില് വ്യക്തത വരുത്തുകയാണ് ഇ ഡിയുടെ ലക്ഷ്യം. ഇതിന്റെ ഭാഗമായാണ് രണ്ടുദിവസത്തേക്ക് അരവിന്ദാക്ഷനെ കസ്റ്റഡിയില് വാങ്ങാനുള്ള തീരുമാനം.
പി ആര് അരവിന്ദാക്ഷിനെതിരെ ഫോണ് കോള് റെക്കോര്ഡുകള് തെളിവുകളായി ഉണ്ടെന്നും ഒന്നാംപ്രതി സതീഷ് കുമാറിന്റെ ഫോണിലെ കോള് റെക്കോര്ഡുകളില് അരവിന്ദാക്ഷന്റെ പങ്ക് വ്യക്തമാണെന്നും ഇ ഡി കോടതിയെ അറിയിച്ചു. ചോദ്യം ചെയ്തവരില് നിന്ന് ലഭിച്ച മൊഴികള് അരവിന്ദാക്ഷന് എതിരാണെന്നും കസ്റ്റഡി അപേക്ഷയിലുണ്ട്. കലൂരിലെ പ്രത്യേക പി എം എല് എ കോടതിയാണ് കേസ് പരിഗണിക്കുന്നത്. രണ്ട് ദിവസത്തേക്കാണ് കസ്റ്റഡി ആവശ്യപ്പെട്ടത്.