ജി ഡി ആർ എഫ് എ 'മാതാപിതാക്കൾക്കൊപ്പം ഒരു ദിവസം' പദ്ധതി ആരംഭിച്ചു

ദുബൈ | കുടുംബ ബന്ധങ്ങളുടെ പ്രാധാന്യം കുട്ടികൾക്ക് മനസ്സിലാക്കി കൊടുക്കുകയെന്ന ലക്ഷ്യത്തോടെ ദുബൈ താമസ കുടിയേറ്റ വകുപ്പ് (ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്‌സ് അഫയേഴ്‌സ്) പുതിയ പദ്ധതി ആരംഭിച്ചു. “മാതാപിതാക്കൾക്കൊപ്പം ഒരു ദിവസം’ എന്ന പേരിലുള്ള ഈ പദ്ധതിയിലൂടെ കുട്ടികൾക്ക് അവരുടെ മാതാപിതാക്കളുടെ ജോലി സ്ഥലങ്ങളിൽ ഒരു ദിവസം മുഴുവൻ ചെലവഴിക്കാനും അവരുടെ ജോലിയുടെ പ്രാധാന്യങ്ങളും ഉത്തരവാദിത്വങ്ങളും മനസ്സിലാക്കാനും അവസരം ലഭിക്കും.ഇതിനായി ആറ് – 16 ഇടയിലുള്ള ജീവനക്കാരുടെ 100 കുട്ടികളെ സംരംഭത്തിൽ ഉൾപ്പെടുത്തി.

ദുബൈ എയർപോർട്ട് ജി ഡി ആർ എഫ് എ സെക്ടർ, ഹത്ത ബോർഡ് ക്രോസിംഗ്, ലംഘകരുടെ ഷെൽട്ടർ സെന്റർ, ജബൽ അലി പോർട്ട് എന്നീ സ്ഥലങ്ങളിലെ ഓഫീസുകളിലേക്കാണ് പദ്ധതി നടപ്പിലാക്കുന്നത് വിപുലീകരിച്ചത്. വിവിധ അഡ്മിനിസ്‌ട്രേഷൻ കെട്ടിടങ്ങളുടെയും സൗകര്യങ്ങളുടെയും ഗൈഡഡ് ടൂറുകളും ഇതിന്റെ ഭാഗമായി നടന്നു. കൂടാതെ കമ്മ്യൂണിറ്റിയുടെയും മാനുഷിക പ്രവർത്തനത്തിന്റെയും ആശയം പ്രോത്സാഹിപ്പിക്കുന്നതിനും കുട്ടികളിൽ സന്നദ്ധപ്രവർത്തനത്തിന്റെ മനോഭാവം ജ്വലിപ്പിക്കുന്നതിനുമായി “വോളണ്ടിയർ ഹീറോസ്’ എന്ന ശീർഷകത്തിലുള്ള ശിൽപ്പശാലയും സംഘടിപ്പിച്ചു.

പുതിയ തലമുറയും തൊഴിൽ അന്തരീക്ഷവും തമ്മിലുള്ള ബന്ധം മെച്ചപ്പെടുത്തുന്നതിനും കുടുംബബന്ധങ്ങൾ ശക്തിപ്പെടുത്തുന്നതിനുമുള്ള നിരന്തരമായ ശ്രമങ്ങളുടെ ഭാഗമാണ് ഈ സംരംഭമെന്ന് ദുബൈയിലെ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്‌സ് അഫയേഴ്‌സ് മേധാവി ലഫ്റ്റനന്റ്ജനറൽ മുഹമ്മദ് അഹ്‌മദ് അൽ മർറി പറഞ്ഞു.

സമൂഹത്തിൽ സുസ്ഥിര വികസനം പ്രോത്സാഹിപ്പിക്കുന്നതിനുള്ള മാതാപിതാക്കളുടെ ശ്രമങ്ങളോടുള്ള കുട്ടികളുടെ അഭിനന്ദനം ഉയർത്തിക്കാട്ടുകയെന്ന ലക്ഷ്യത്തോടെ, ഓരോ കുട്ടിക്കും അവരുടെ മാതാപിതാക്കൾക്ക് “ഹൃദയത്തിൽ നിന്നുള്ള ഒരു സന്ദേശം’ എന്ന വാചകം അടങ്ങിയ നന്ദി കാർഡ് അവതരിപ്പിക്കുന്നതും ഈ സംരംഭത്തിൽ ഉൾപ്പെടുത്തി. സാമൂഹിക ഘടനയെ ദൃഢമാക്കാനും കുടുംബബന്ധങ്ങൾ ശക്തിപ്പെടുത്താനും വ്യക്തികൾ സാമൂഹിക സ്ഥിരതയെ പിന്തുണക്കുകയും കമ്മ്യൂണിറ്റി ഐക്യം വർധിപ്പിക്കുകയും ചെയ്യുന്ന സഹകരണവും ഉള്ള ഒരു സമൂഹം കെട്ടിപ്പടുക്കുന്നതിനുള്ള ശ്രമങ്ങളും ഈ പദ്ധതിയിൽ സന്ദേശമായി.