ഇറാൻ ഗൾഫ് രാജ്യങ്ങളെ ആക്രമിക്കുന്നില്ല; ലക്ഷ്യം അമേരിക്കൻ സൈനിക കേന്ദ്രങ്ങൾ മാത്രം: ഇറാൻ വിദേശകാര്യ മന്ത്രി

ടെഹ്റാൻ | ഇറാൻ ഗൾഫ് രാജ്യങ്ങളെ ആക്രമിക്കുന്നില്ലെന്നും അമേരിക്കൻ സൈനിക കേന്ദ്രങ്ങളെ മാത്രമാണ് ലക്ഷ്യമിടുന്നതെന്നും ഇറാൻ വിദേശകാര്യ മന്ത്രി അബ്ബാസ് അരാഖ്‌ചി. അൽ ജസീറയ്ക്ക് നൽകിയ പ്രത്യേക അഭിമുഖത്തിലാണ് അദ്ദേഹം ഇറാന്റെ നയം വ്യക്തമാക്കിയത്. പേർഷ്യൻ ഗൾഫ് രാജ്യങ്ങളുമായി തങ്ങൾക്ക് യാതൊരു പ്രശ്നവുമില്ലെന്നും അയൽരാജ്യങ്ങളുമായി നല്ല ബന്ധം തുടരാനാണ് ആഗ്രഹിക്കുന്നതെന്നും അദ്ദേഹം പറഞ്ഞു.

അമേരിക്കൻ സൈനിക താവളങ്ങൾ ലക്ഷ്യം

തങ്ങൾക്കെതിരെ നടന്ന അമേരിക്കൻ കടന്നുകയറ്റത്തിന് പ്രതിരോധമെന്ന നിലയിലാണ് ഇറാൻ ആക്രമണം നടത്തുന്നത്. അമേരിക്കൻ ഭൂപ്രദേശത്ത് നേരിട്ട് ആക്രമണം നടത്താൻ നിലവിൽ ഇറാന് സാധിക്കില്ല. അതിനാൽ മേഖലയിലെ അമേരിക്കൻ സൈനിക താവളങ്ങളെയും അമേരിക്കൻ സൈന്യത്തിന് സഹായം നൽകുന്ന കേന്ദ്രങ്ങളെയുമാണ് ഇറാൻ ലക്ഷ്യമിടുന്നത്.

അമേരിക്കൻ സൈനികർ താവളങ്ങൾ ഒഴിഞ്ഞ് ഹോട്ടലുകളിൽ തമ്പടിച്ചിരിക്കുകയാണെന്നും അവരെ മനുഷ്യകവചമാക്കി ഉപയോഗിക്കുകയാണെന്നും അരാഖ്‌ചി ആരോപിച്ചു. എങ്കിലും അമേരിക്കൻ സൈനിക ഉദ്യോഗസ്ഥരെയും അവർക്ക് സൈനിക നീക്കത്തിന് സഹായം നൽകുന്ന സംവിധാനങ്ങളെയും മാത്രമേ ഇറാൻ ആക്രമിക്കൂവെന്നും അദ്ദേഹം വ്യക്തമാക്കി.

ഹോർമുസ് കടലിടുക്ക് അടയ്ക്കില്ല

ലോകത്തെ സുപ്രധാന കപ്പൽ പാതയായ ഹോർമുസ് കടലിടുക്ക് ഇപ്പോൾ അടയ്ക്കാൻ ഇറാന് ഉദ്ദേശമില്ലെന്ന് വിദേശകാര്യ മന്ത്രി അറിയിച്ചു. നിലവിൽ കടലിടുക്കിലൂടെയുള്ള കപ്പൽ ഗതാഗതം തടസ്സപ്പെടുത്തുന്ന രീതിയിലുള്ള നീക്കങ്ങൾ ഇറാൻ നടത്തില്ലെന്നും അദ്ദേഹം കൂട്ടിച്ചേർത്തു.

നേരത്തെ ഇറാൻ റെവല്യൂഷണറി ഗാർഡ് കടലിടുക്ക് അടയ്ക്കുമെന്ന് ഭീഷണിപ്പെടുത്തിയ പശ്ചാത്തലത്തിലാണ് വിദേശകാര്യ മന്ത്രിയുടെ ഈ പുതിയ വിശദീകരണം. അയൽരാജ്യങ്ങളെ തങ്ങളുടെ സഹോദരങ്ങളായാണ് കാണുന്നതെന്നും ഇറാൻ അവരെ ആക്രമിക്കില്ലെന്നും അദ്ദേഹം ആവർത്തിച്ചു.

Summary

In an exclusive interview with Al Jazeera, Iranian Foreign Minister Abbas Araghchi emphasized that Iran’s military actions are strictly acts of self-defense against American aggression and are not directed at neighboring Gulf countries. He clarified that while Iran is targeting US military bases and facilities, it has no current intention of closing the strategic Strait of Hormuz or disrupting international navigation. Araghchi also accused US military personnel of using civilian hotels as human shields, reiterating that Iran aims to hit only those personnel and installations supporting operations against its territory.