Connect with us

Editors Pick

പതിമൂന്ന് നൂറ്റാണ്ടുകൾക്ക് മുമ്പ് പണിത സഊദിയിലെ അൽ സഫ മസ്ജിദ് നവീകരിക്കാൻ പദ്ധതി

അൽ ബഹ മേഖലയിലെ ബൽജുരാഷി ഗവർണറേറ്റിലുള്ള അൽ സഫ മസ്ജിദ് രാജ്യത്തെ ഏറ്റവും പഴക്കമുള്ള പള്ളികളിൽ ഒന്നാണ്.

Published

|

Last Updated

റിയാദ്/അബുദബി | പതിമൂന്ന് നൂറ്റാണ്ടുകൾക്ക് മുമ്പ് സൗദി അറേബ്യയിലെ അൽ ബഹയിൽ നിർമ്മിച്ച പുരാതന അൽ സഫ മസ്ജിദ് രാജ്യത്തിന്റെ പൈതൃകം സംരക്ഷിക്കുന്നതിനുള്ള പദ്ധതിയിൽ ഉൾപ്പെടുത്തി നവീകരിക്കും. ചരിത്രപരമായ മസ്ജിദുകളുടെ വികസനത്തിന് കിരീടാവകാശി മുഹമ്മദ് ബിൻ സൽമാൻ 2018-ൽ ആരംഭിച്ച പദ്ധതിയുടെ രണ്ടാം ഘട്ടത്തിന്റെ ഭാഗമായാണ് നടപടി. രാജ്യത്തുടനീളം ചരിത്രപരവും മതപരവുമായ പ്രാധാന്യമുള്ള 130 മസ്ജിദുകൾ നവീകരിക്കാനാണ് പദ്ധതി ലക്ഷ്യമിടുന്നത്.

അൽ ബഹ മേഖലയിലെ ബൽജുരാഷി ഗവർണറേറ്റിലുള്ള അൽ സഫ മസ്ജിദ് രാജ്യത്തെ ഏറ്റവും പഴക്കമുള്ള പള്ളികളിൽ ഒന്നാണ്. പള്ളിയുടെ തനതായ ശൈലിയും അതിന്റെ ചരിത്രപരമായ മൂല്യവും സംരക്ഷിക്കുന്നതിനൊപ്പം നവീകരണം അതിന്റെ സൗന്ദര്യാത്മക ഘടകങ്ങൾ പുനഃസ്ഥാപിക്കുകയും പുതുക്കുകയും ചെയ്യുമെന്ന് സൗദി പ്രസ് ഏജൻസി റിപ്പോർട്ട് ചെയ്തു.

സരവത് പർവതനിരകളിൽ നിന്നുള്ള കല്ലുകൾ കൊണ്ടാണ് അൽ സഫ മസ്ജിദ് നിർമ്മിച്ചിരിക്കുന്നത്, സീലിംഗ്, കോളങ്ങൾ, ജനലുകൾ, വാതിലുകൾ എന്നിവ പ്രാദേശിക മരം ഉപയോഗിച്ചാണ് നിർമ്മിച്ചത്. നവീകരണം മസ്ജിദിന്റെ കാൽപ്പാടും അതിന്റെ ശേഷിയും മാറ്റമില്ലാതെ നിലനിർത്തും. 78 ചതുരശ്ര മീറ്റർ വിസ്തൃതിയുള്ള അൽ സഫ മസ്ജിദിൽ 31 ആളുകൾക്ക് പ്രാർത്ഥന നിർവഹിക്കാൻ കഴിയും. സുഫ്യാൻ അൽ ഗാംദിയാണ് ഇത് നിർമ്മിച്ചതെന്ന് പറയപ്പെടുന്നു.

മഗ്‌രിബ്, ഇഷാ നിസ്കാരങ്ങൾക്കിടയിൽ ഗ്രാമവാസികൾ ഒത്തുകൂടുകയും പ്രാദേശിക കാര്യങ്ങൾ ചർച്ച ചെയ്യുകയും തർക്കങ്ങൾ പരിഹരിക്കുകയും ചെയ്യുന്ന ഒരു പ്രമുഖ സാമൂഹിക കേന്ദ്രമായിരുന്നു ഈ പള്ളി. ഇടുങ്ങിയ വഴികളാൽ വേർതിരിച്ച കെട്ടിടങ്ങളാൽ ചുറ്റപ്പെട്ടതാണ് പള്ളി.

പടിഞ്ഞാറൻ സൗദി അറേബ്യയിലെ ഹെജാസി പ്രദേശത്തുള്ള നഗരമാണ് അൽ ബഹ. സൗദി അറേബ്യയുടെ പടിഞ്ഞാറ് ഭാഗത്താണ് അൽ-ബഹ സിറ്റി സ്ഥിതി ചെയ്യുന്നത്. പദ്ധതിയുടെ ആദ്യ ഘട്ടത്തിൽ, ഏകദേശം 50 ദശലക്ഷം റിയാൽ (13.3 മില്യൺ ഡോളർ) ചെലവിൽ 30 പള്ളികൾ നവീകരിച്ചു. റിയാദിലെ ആറും മക്കയിലെ അഞ്ചും മദീനയിലെ നാലും അസീറിലെ മൂന്നും പള്ളികൾ ഉൾപ്പെടെ രാജ്യത്തിന്റെ 13 മേഖലകളിലായി 30 ചരിത്രപ്രധാനമായ പള്ളികൾ രണ്ടാം ഘട്ടത്തിൽ ഉൾപ്പെടുത്തിയിട്ടുണ്ട്.

അൽ ജൗഫിലെയും ജസാനിലെയും കിഴക്കൻ പ്രദേശങ്ങളിൽ രണ്ടെണ്ണം വീതവും തബൂക്ക്, അൽ ബഹ, നജ്‌റാൻ, ഹായിൽ, അൽ ഖാസിം മേഖലകളിൽ ഓരോ പള്ളിയും പദ്ധതിയിൽ ഉൾപെടും. പൈതൃക കെട്ടിടങ്ങൾ നവീകരിക്കുന്നതിൽ വിദഗ്ധരായ സൗദി കമ്പനികളാണ് നവീകരണ പ്രക്രിയ നടത്തുന്നത്, എൻജിനീയർമാർ യഥാർത്ഥ സവിശേഷതകൾ തിരഞ്ഞെടുത്ത് ഓരോന്നിന്റെയും സാംസ്കാരിക പ്രാധാന്യം സംരക്ഷിക്കാൻ ശ്രമിക്കും.

ബ്യൂറോ ചീഫ്, സിറാജ്, അബൂദബി

---- facebook comment plugin here -----

Latest