Gulf
യു എ ഇയിൽ നിർമിക്കുന്ന സി എസ് ഐ ചർച്ചിന് സഹായവുമായി എം എ യൂസഫലി
അബുദാബി | ചര്ച്ച് ഓഫ് സൗത്ത് ഇന്ത്യയുടെ (സി എസ് ഐ) അബുദാബിയില് നിര്മ്മിക്കുന്ന ചർച്ചിന് വ്യവസായിയും ലുലു ഗ്രൂപ്പ് ചെയര്മാനുമായ എം എ യൂസഫലിയുടെ സഹായ ഹസ്തം. ദേവാലയത്തിന്റെ നിര്മ്മാണത്തിലേക്കായി അഞ്ച് ലക്ഷം ദിര്ഹമാണ് (1 കോടി ഇന്ത്യന് രൂപ) യൂസഫലി നല്കിയത്.
അബുദാബി സി.എസ്. ഐ. പാരിഷ് വികാരി റവ: ലാല്ജി എം. ഫിലിപ്പ് യൂസഫലിയില് നിന്ന് തുക ഏറ്റുവാങ്ങി. സിഎസ്ഐ മധ്യകേരള മഹാഇടവക ബിഷപ്പ് റൈറ്റ് റവ: ഡോ: മലയില് സാബു കോശി ചെറിയാന് നാട്ടില് നിന്നും ഓണ് ലൈനായി ചടങ്ങില് പങ്കെടുത്തു.
അബുദാബി കിരീടാവകാശിയും യു.എ.ഇ. സായുധ സേനാ ഡെപ്യൂട്ടി സുപ്രീം കമാണ്ടറുമായ ശൈഖ് മുഹമ്മദ് ബിന് സായിദ് അല് നഹ്യാന് അബുദാബി അബു മുറൈഖയില് അനുവദിച്ച 4.37 ഏക്കര് ഭൂമിയിലാണ് സി.എസ്. ഐ. ചർച്ച് ഉയരുന്നത്. ഇതിനു സമീപമായാണ് കിരീടാവകാശി അനുവദിച്ച
സ്ഥലത്ത് നിര്മ്മാണം പുരോഗമിച്ചു കൊണ്ടിരിക്കുന്ന ബാപ്സ് ഹിന്ദു ക്ഷേത്രം.
എല്ലാ മതവിഭാഗങ്ങളുടെയും ആരാധനാലയങ്ങളുള്ള യു.എ.ഇ. യില് വ്യത്യസ്ത മതക്കാര്ക്ക് സഹകരണത്തോടെ കഴിയാനുള്ള സാഹചര്യമാണ് യു.എ.ഇ. ഭരണാധികാരികള് ഉറപ്പ് നല്കുന്നതെന്ന് എം.എ.യൂസഫലി പറഞ്ഞു.