Kerala
ശബരിമല കര്ക്കിടക മാസപൂജ; അവശ്യ സാധനങ്ങള് വില്ക്കുന്ന കടകള് എല്ലാ ദിവസവും തുറക്കാം
പത്തനംതിട്ട | കര്ക്കിടമാസ പൂജകള്ക്കായി ശബരിമല നടതുറക്കുന്നതിനോടനുബന്ധിച്ച് വടശേരിക്കര, നിലക്കല്, പമ്പ, സന്നിധാനം എന്നിവിടങ്ങളില് അവശ്യ സാധനങ്ങള് വില്ക്കുന്ന കടകള് നട അടയ്ക്കുന്നതുവരെ എല്ലാ ദിവസവും തുറക്കാന് അനുമതി നല്കുമെന്ന് ജില്ലാ കലക്ടര് ഡോ. ദിവ്യ എസ് അയ്യര് പറഞ്ഞു. ജില്ലാ ദുരന്ത നിവാരണ അതോറിറ്റി യോഗത്തിലാണ് തീരുമാനം. കോവിഡ് പ്രോട്ടോക്കോള് പാലിക്കുന്നതിനൊപ്പം മഴക്കാലമായതിനാല് തീര്ഥാടകര് അതീവശ്രദ്ധ പുലര്ത്തണമെന്നും കലക്ടര് പറഞ്ഞു.
തീര്ഥാടകര് ഒരുമിച്ചിരുന്ന് ഭക്ഷണം, പ്രസാദം എന്നിവ കഴിക്കുന്നതും വാങ്ങുന്നതും ഒഴിവാക്കണമെന്നും ദേവസ്വം ബോര്ഡ്, അയ്യപ്പ സേവാ സംഘം എന്നിവര് ഇക്കാര്യം ഉറപ്പുവരുത്തണമെന്നും ജില്ലാ മെഡിക്കല് ഓഫീസര് എ എല് ഷീജ പറഞ്ഞു. രോഗലക്ഷണങ്ങള് ഉള്ളവര് തീര്ഥാടനത്തിന് തയാറാകരുതെന്നും തീര്ഥാടകരില് കൊവിഡ് പോസിറ്റീവാകുന്നവര് പോലീസിന്റെ കര്ശന നിര്ദേശങ്ങള് പാലിക്കണമെന്നും ജില്ലാ പോലീസ് മേധാവി ആര് നിശാന്തിനി പറഞ്ഞു.