അമ്മയും ആണ്‍സുഹൃത്തും ചേര്‍ന്ന് പത്തുവയസ്സുകാരനെ ക്രൂരമായി മര്‍ദ്ദിച്ചു

തിരുവനന്തപുരം | അമ്മയുടെ ആണ്‍സുഹൃത്ത് വീട്ടില്‍ വരുന്നത് ഇഷ്ടമല്ല എന്നു പറഞ്ഞ 10 വയസ്സുരനെ അമ്മയും ആണ്‍സുഹൃത്തും ചേര്‍ന്നു മര്‍ദ്ദിച്ചു. പോത്തന്‍കോട് സെന്റ് തോമസ് സ്‌കൂളിലെ അഞ്ചാം ക്ലാസ് വിദ്യാര്‍ഥിക്കാണ് വാടക വീട്ടില്‍ വച്ച് മര്‍ദനമേറ്റത്.

ചൂരല്‍ കൊണ്ട് കുട്ടിയുടെ രണ്ട് കാലും കയ്യും അടിച്ചുപൊട്ടിച്ച നിലയിലാണ്. ട്യൂഷന് പോകാത്തതിനാലാണ് കുട്ടിയെ അടിച്ചതെന്നാണ് അമ്മ പറയുന്നത്. എന്നാല്‍ അമ്മയുടെ സുഹൃത്തിനെ ഇഷ്ടമല്ലെന്ന് പറഞ്ഞിന് എപ്പോഴും അടിക്കാറുണ്ടെന്നു കുട്ടി പറയുന്നു. താനൊരു ദിവസം ട്യൂഷന് പോകുന്നില്ലെന്ന് പറഞ്ഞപ്പോള്‍ അമ്മയും ആ മാമനും ചേര്‍ന്ന് അടിച്ചു. എനിക്കാ മാമന്‍ വരുന്നത് ഇഷ്ടമില്ലെന്ന് പറഞ്ഞപ്പോള്‍ വീണ്ടും അടിച്ചു. താഴെ വീണിട്ടും അടിച്ചു. കാലിലും കയ്യിലും മുട്ടിലും അടിച്ചു. പിന്നെ കഴുത്തിന് പിടിച്ചു. സ്ഥിരമായി തന്നെ ഉപദ്രവിക്കാറുണ്ട് -കുട്ടി പറഞ്ഞു. കുട്ടി ഇപ്പോള്‍ ആശുപത്രിയില്‍ ചികിത്സയിലാണ്.

കാര്യവട്ടം സ്വദേശി സജിയുടെ ഭാര്യയാണ് അനു. സജിയുമായി അകന്നതോടെ അനുവും മകനും ആനന്ദേശ്വരത്തുള്ള വാടകവീട്ടിലാണ് താമസിക്കുന്നത്. അനുവിന്റെ ആണ്‍സുഹൃത്ത് പ്രണവ് വാടക വീട്ടിലെ നിത്യ സന്ദര്‍ശകനാണ്. അനുവും പ്രണവും ചേര്‍ന്നാണ് കുഞ്ഞിനെ മര്‍ദിച്ചതെന്ന് അച്ഛന്‍ സജി നല്‍കിയ പരാതിയില്‍ പറയുന്നു. നേരത്തെയും സമാന രീതിയില്‍ മര്‍ദ്ദിച്ചിട്ടുണ്ടെന്ന് കുട്ടി പറഞ്ഞു. കുട്ടിയുടെ മൊഴിയുടെ അടിസ്ഥാനത്തില്‍ പോലീസ് കേസെടുത്തു.