Kerala
പാറ്റൂര് കേസ്; വിജിലന്സ് അന്വേഷണം ആവശ്യപ്പെട്ടുള്ള വി എസിന്റെ അപ്പീല് ഹൈക്കോടതി തള്ളി
കൊച്ചി | പാറ്റൂരിലെ സര്ക്കാര് ഭൂമി സ്വകാര്യ കമ്പനിക്ക് ഫ്ളാറ്റ് നിര്മാണത്തിന് ചട്ടങ്ങള് ലംഘിച്ച് കൈമാറിയ കേസില് വിജിലന്സ് അന്വേഷണം ആവശ്യപ്പെട്ട് വി എസ് അച്യുതാനന്ദന് നല്കിയ അപ്പീല് ഹൈക്കോടതി തള്ളി. തിരുവനന്തപുരം വിജിലന്സ് കോടതി ഉത്തരവ് ശരിവെച്ചു കൊണ്ടാണ് ഹൈക്കോടതി അപ്പീല് തള്ളിയത്. മുന് മുഖ്യമന്ത്രി ഉമ്മന് ചാണ്ടി, ചീഫ് സെക്രട്ടറിയായിരുന്ന ഇ കെ ഭരത് ഭൂഷണ് തുടങ്ങിയവര്ക്കെതിരെ വിജിലന്സ് അന്വേഷണം നടത്തണമെന്നായിരുന്നു വി എസിന്റെ ആവശ്യം. 31 സെന്റ് സര്ക്കാര് ഭൂമി സ്വകാര്യ വ്യക്തി കൈയേറി ഫ്ളാറ്റ് നിര്മിച്ചുവെന്നാണ് ആരോപണം.
കേസിലെ എഫ് ഐ ആര് നേരത്തെ ഹൈക്കോടതി തന്നെ റദ്ദാക്കിയ സാഹചര്യത്തില് ഹരജി അംഗീകരിക്കാനാകില്ലെന്ന് ഹൈക്കോടതി വ്യക്തമാക്കി. റദ്ദാക്കിയ എഫ് ഐ ആറില് പറയുന്നതില് കൂടുതലായൊന്നും വി എസ് നല്കിയ അപേക്ഷയില് പറയുന്നില്ലെന്നും ഹരജി അംഗീകരിച്ചാല് ഒരേ കേസില് രണ്ട് എഫ് ഐ ആര് രജിസ്റ്റര് ചെയ്യുന്ന സാഹചര്യമുണ്ടാകുമെന്നും കോടതി പറഞ്ഞു.