കെ കൃഷ്ണന്‍കുട്ടി മന്ത്രിസഭയിലേക്ക്; ജെ ഡി എസില്‍ തീരുമാനമായി

തിരുവനന്തപുരം | ജനതാദള്‍ എസില്‍ നിന്ന് കെ കൃഷ്ണന്‍കുട്ടി രണ്ടാം പിണറായി സര്‍ക്കാരില്‍ മന്ത്രിയാകും. മന്ത്രിസഭയിലെ തങ്ങളുടെ പ്രതിനിധി ആരായിരിക്കണമെന്നത് സംബന്ധിച്ച് ജെ ഡി എസ് യോഗം തീരുമാനമെടുക്കുകയായിരുന്നു. മന്ത്രി സ്ഥാനത്തേക്ക് പാര്‍ട്ടിക്കുള്ളില്‍ നിന്ന് മാത്യു ടി തോമസ്, കെ കൃഷ്ണന്‍ കുട്ടി വിഭാഗങ്ങള്‍ തമ്മില്‍ കടുത്ത മത്സരം നടന്നിരുന്നു. ഇതേ തുടര്‍ന്ന് ദേശീയ നേതൃത്വം ഇടപെടുകയും കെ കൃഷ്ണന്‍കുട്ടിയെ മന്ത്രിയാക്കാന്‍ തീരുമാനിക്കുകയുമായിരുന്നു.

21 മന്ത്രിമാരാകും രണ്ടാം പിണറായി വിജയന്‍ മന്ത്രിസഭയിലുണ്ടാവുകയെന്ന് എല്‍ ഡി എഫ് കണ്‍വീനറും സി പി എം ആക്ടിംഗ് സെക്രട്ടറിയുമായി എ വിജയരാഘവന്‍ നേരത്തെ മാധ്യമങ്ങളോട് പറഞ്ഞിരുന്നു.
സി പി എമ്മിന് മുഖ്യമന്ത്രിയും 12 മന്ത്രിമാരും സ്പീക്കര്‍ സ്ഥാനവുമുണ്ടാകും. സി പി ഐക്ക് നാല് മന്ത്രിമാരും ഡെപ്യൂട്ടി സ്പീക്കര്‍ സ്ഥാനവും നല്‍കും. കേരള കോണ്‍ഗ്രസ് എമ്മിന് ഒരു മന്ത്രി സ്ഥാനവും ചീഫ് വിപ്പും ലഭിക്കും. ജെ ഡി എസിനും എന്‍ സി പിക്കും ഓരോ മന്ത്രിസ്ഥാനമുണ്ടാകും. ഒറ്റ എം എല്‍ എമാരുള്ള ചെറുപാര്‍ട്ടികളില്‍ നാല് പേര്‍ക്ക് ഊഴം അനുസരിച്ച് മന്ത്രി സ്ഥാനം നല്‍കും.