വെള്ളൂട സോളാര്‍ പാര്‍ക്കിലെ തീപ്പിടുത്തം; അമ്പത് ലക്ഷത്തോളം രൂപയുടെ നഷ്ടമെന്ന് വിലയിരുത്തല്‍

കാസര്‍കോട്  | അമ്പലത്തറ വെള്ളൂട സോളാര്‍ പാര്‍ക്കിലുണ്ടായ തീപ്പിടുത്തത്തില്‍ അമ്പത് ലക്ഷത്തോളം രൂപയുടെ നഷ്ടമുണ്ടായതായി വിലയിരുത്തല്‍. നിര്‍മ്മാണത്തിനായി കൊണ്ടുവന്ന അലുമിനിയം പവര്‍ കേബിളുകള്‍ക്കാണ് തീപിടിച്ചത്. ഇന്നലെ ഉച്ച്ക്ക് രണ്ടയോടെയാണ് തീപ്പിടുത്തം.

സംസ്ഥാനത്തെ ഊര്‍ജ്ജ പ്രതിസന്ധിക്ക് പരിഹാരം കാണുന്നതിന്റെ ഭാഗമായി പ്രകൃതിവിഭവങ്ങളില്‍ നിന്ന് ഊര്‍ജ്ജം ഉത്പാദിപ്പിക്കുന്നതിന്റെ ഭാഗമായാണ് വെള്ളൂടയിലെ സോളാര്‍ പാര്‍ക്ക് സ്ഥാപിക്കുന്നത്.

പാട്ടത്തിനെടുത്ത 484 ഏക്കറില്‍ 50 മെഗാവാട്ട് ഉത്പാദന ശേഷിയുള്ള ഒരു സോളാര്‍ എനര്‍ജി പാര്‍ക്ക് 2019 ലാണ് കാഞ്ഞങ്ങാടിനടുത്തുള്ള അമ്പലത്തറയിലെ വെള്ളൂടയില്‍ സ്ഥാപിച്ചത്. ഇവിടെ കൂടുതല്‍ സോളാര്‍ പാനലുകള്‍ സ്ഥാപിക്കുന്ന പണി പുരോഗമിക്കുന്നുണ്ട്. ഇതിനായി ഇറക്കിയ അലുമിനിയം പവര്‍ കേബിളുകളാണ് തീ പിടിത്തത്തില്‍ കത്തി നശിച്ചത്.