തുടര്‍ ഭരണം ലഭിക്കുമെന്ന ഉറച്ച പ്രതീക്ഷയില്‍ എല്‍ ഡി എഫ്

തിരുവനന്തപുരം | 74.02 പോളിംഗ് രേഖപ്പെടുത്തിയ തിരഞ്ഞെടുപ്പില്‍ ഉറച്ച തുടര്‍ ഭരണ പ്രതീക്ഷയുമായി എല്‍ ഡി എഫ്. പോളിംഗിന്റെ ആദ്യ സമയത്തുണ്ടായ കനത്ത പോളിംഗും അവസാന സമയത്തെ മന്ദതയും തങ്ങള്‍ക്ക് അനുകൂലമായ ഫലം വരുമെന്നാണ് സി പി എം പ്രവര്‍ത്തകര്‍ വ്യഖ്യാനിക്കുന്നത്. ഇന്നത്തോടെ ബൂത്ത്തല റിപ്പോര്‍ട്ടുകള്‍ മണ്ഡലം കമ്മിറ്റികള്‍ വഴി നേതൃത്വത്തിന് ലഭിക്കും. ഇതോടെ ഒരു വിലയിരുത്തലിലേക്ക് എത്താനാകുമെന്നാണ് നേതൃത്വം പറയുന്നത്. ഇന്നലെ ഉച്ചക്ക് മുമ്പ് തന്ന എല്ലാ മണ്ഡലങ്ങളിലേയും ഉറച്ച വോട്ടുകള്‍ പോള്‍ ചെയ്യിക്കാന്‍ കഴിഞ്ഞിട്ടുണ്ടെന്നതാണ് എല്‍ ഡി എഫ് ആത്മവിശ്വാസം പ്രകടിപ്പിക്കുന്നത്.

വോട്ടിംഗ് ശതമാനക്കണക്കിലെ കുറവ് ഒരേസമയം ആവേശവും ആശങ്കയും സൃഷ്ടിക്കുകയാണ് ഇടതു ക്യാമ്പില്‍. സാധാരണ കുറഞ്ഞ വോട്ടിംഗ് ശതമാനം എല്‍ ഡി എഫിന് അനുകൂലമാകാറാണ് പതിവ്. എന്നാല്‍ വ്യത്യസ്ത മണ്ഡലങ്ങളിലെ ഏറിയും കുറഞ്ഞുമുള്ള വോട്ടെണ്ണം സൃഷ്ടിക്കുന്ന ആശങ്കയും ചെറുതല്ല. 80ന് മുകളില്‍ സീറ്റുകള്‍ നേടി തുടര്‍ഭരണമുണ്ടാകുമെന്നാണ് മുതിര്‍ന്ന നേതാക്കള്‍ പ്രാഥമികമായി അവകാശപ്പെടുന്നത്.

അവസാന മണിക്കൂറുകളില്‍ ഒഴുകിയെത്താറുള്ള യു ഡി എഫ് വോട്ടുകളില്‍ ഇക്കുറി ആവേശം പ്രകടമായിരുന്നില്ല. ഈ പശ്ചാത്തലത്തില്‍ വ്യക്തമായ ഭൂരിപക്ഷം എല്‍ ഡി എഫിനുണ്ടാകും. വികസനവും ക്ഷേമപ്രവര്‍ത്തനങ്ങളും മുന്‍നിര്‍ത്തിയുള്ള പ്രചാരണം പൊതുവില്‍ ജനം സ്വീകരിച്ചതായും നേതൃത്വം അവകാശപ്പെടുന്നു. മാത്രമല്ല, സര്‍ക്കാറരിനെതിരായ ആരോപണങ്ങള്‍ക്ക് വലിയ സ്വീകാര്യത ലഭിച്ചുമില്ല. വോട്ടെടുപ്പ് ദിവസം പ്രതിപക്ഷമാകെ ശബരിമല ഉയര്‍ത്തിക്കൊണ്ടുവന്നത് ഇതിന്റെ ഭാഗമാണെന്നും നേതാക്കള്‍ വിശദീകരിക്കുന്നു.