Kannur
അനുകൂല സാഹചര്യം ഉപയോഗിക്കാനാകാത്തത് കോണ്ഗ്രസിന്റെ സംഘടനാ ദൗര്ബല്യം ആണെന്ന് കെ സുധാകരന്
കണ്ണൂര് | ഇത്രയും അനുകൂല രാഷ്ട്രീയ സാഹചര്യം കേരളത്തിലുണ്ടായിട്ടും അത് ഉപയോഗപ്പെടുത്താന് കഴിയാത്തത് കോണ്ഗ്രസിന്റെ സംഘടനാ ദൗര്ബല്യമാണെന്ന് മുതിര്ന്ന നേതാവ് കെ സുധാകരന്. ഭരണത്തിന്റെ പോരായ്മകള് ജനസമക്ഷം എത്തിക്കുന്ന കാര്യത്തില് യു ഡി എഫിന് പരിമിതികളുണ്ട്. അത് താന് തുറന്നുസമ്മതിക്കുന്നുവെന്നും അദ്ദേഹം പറഞ്ഞു.
സി പി എമ്മിന്റേയും ബി ജെ പിയുടേയും സംഘടനാരീതി അവര്ക്ക് ഗുണം ചെയ്തെന്നും യു ഡി എഫിന് സംഘടനാ ദൗര്ബല്യം ഉണ്ടെന്നും അദ്ദേഹം കൂട്ടിച്ചേര്ത്തു. കെ പി സി സിയുടെ പുതിയ ജംബോ കമ്മിറ്റികള് ഗുണം ചെയ്തിട്ടില്ല.
പ്രാദേശികതലങ്ങളില് ജനവിശ്വാസം ആര്ജിക്കാന് കഴിയാത്ത നേതാക്കളെ ഉള്പ്പെടുത്തി പുനഃസംഘടന നടത്തിയപ്പോള് അതിന്റെ ഗുണമുണ്ടാക്കാന് കോണ്ഗ്രസിന് സാധിച്ചിട്ടില്ല. അത് നേതാക്കളുടെ കുറ്റമല്ല, പാര്ട്ടിയിലെ സംഘടനാ സംവിധാനത്തിന്റെ കുറ്റമാണ്. ആ സംവിധാനം പുനഃപരിശോധിക്കണമെന്നും കെ സുധാകരന് പറഞ്ഞു.