സുജ ഇരുമ്പ് വടികൊണ്ട് തലക്കടിച്ചു,സുനീഷ് വെട്ടുകത്തി കൊണ്ട് വെട്ടി; സനൂപിനെ കൊലപ്പെടുത്തിയത് കൂട്ടമായി ആക്രമിച്ച്

തൃശ്ശൂര്‍ | സിപിഎം ബ്രാഞ്ച് സെക്രട്ടറി സനൂപിനെ കൊലപ്പെടുത്തിയ കേസില്‍ ബുധനാഴ്ച പിടിയിലായ സുജയ്, സുനീഷ് എന്നിവരുമായി പോലീസ് ഇന്ന് തെളിവെടുപ്പ് നടത്തും. സനൂപിനെ ഇരുമ്പ് വടി കൊണ്ട് തലക്ക് പിന്നില്‍ അടിച്ചെന്ന് സുജയും വെട്ടുകത്തി കൊണ്ട് വെട്ടിയെന്ന് സുനീഷും ഇരുവരും പോലീസിനോട് പറഞ്ഞു. സനൂപിനെ പ്രതികള്‍ കൂട്ടമായി ആക്രമിക്കുകയായിരുന്നുവെന്നാണ് പോലീസ് കരുതുന്നത്.

ഇന്നലെ തൃശൂര്‍ തണ്ടിലത്ത് വെച്ചാണ് ഇരുവരെയും പിടികൂടിയത്. സനൂപിനെ ആക്രമിച്ച സംഘത്തില്‍ ഇവരും ഉണ്ടായിരുന്നു. സംഭവത്തില്‍ നേരത്തെ പിടിയിലായ മുഖ്യപ്രതി നന്ദനെ കോടതി 14 ദിവസത്തേക്ക് റിമാന്റ് ചെയ്തു. ഇയാളെ കസ്റ്റഡിയില്‍ വാങ്ങിയ ശേഷം തെളിവെടുപ്പിനായി ചിറ്റിലങ്ങാട് എത്തിക്കും. നന്ദനെ ചോദ്യം ചെയ്തതില്‍ നിന്ന് മറ്റ് പ്രതികളെ കുറിച്ച് പൊലീസിന് സൂചന ലഭിച്ചിട്ടുണ്ട്. പ്രതികള്‍ തൃശൂര്‍ ജില്ല വിട്ടിട്ടില്ലെന്നാണ് വിവരം.