കാരാട്ട് ഫൈസലിനെ കസ്റ്റംസ് വിട്ടയച്ചു; രണ്ടാഴ്ചക്കകം വീണ്ടും ഹാജരാകണം

കൊച്ചി | സ്വര്‍ണക്കടത്ത് കേസില്‍ കസ്റ്റഡിയിലെടുത്ത കൊടുവള്ളി നഗരസഭാ കൗണ്‍സിലര്‍ കാരാട്ട് ഫൈസലിനെ കസ്റ്റംസ് അന്വേഷണ സംഘം വിട്ടയച്ചു. രണ്ടാഴ്ചക്കകം വീണ്ടും ഹാജരാകണമെന്ന് നിര്‍ദേശിച്ചാണ് വിട്ടയച്ചത്. വ്യാഴാഴ്ച പുലര്‍ച്ചെ കൊടുവള്ളിയിലെ വീട്ടില്‍ നിന്നുമാണ് ഫൈസലിനെ കസ്റ്റംസ് കസ്റ്റഡിയിലെടുത്തിരുന്നത്.

അതിനിടെ, സ്വര്‍ണക്കടത്തില്‍ കാരാട്ട് ഫൈസലിന് പങ്കില്ലെന്ന് അദ്ദേഹത്തിന്റെ അഭിഭാഷകന്‍ അബ്ദുല്‍ നിസ്താര്‍ പറഞ്ഞു. ഫൈസലിനെതിരെ ആരോപണങ്ങള്‍ മാത്രമാണുള്ളതെന്നും എന്നാല്‍ അന്വേഷണവുമായി സഹകരിക്കുമെന്നും അഭിഭാഷകന്‍ വ്യക്തമാക്കി. കേസില്‍ കാരാട്ട് ഫൈസലിന് പങ്കുണ്ടെന്ന് നാലാം പ്രതി സന്ദീപ് നായരുടെ ഭാര്യ കസ്റ്റംസിനു മൊഴി നല്‍കിയതായി സൂചനയുണ്ട്.