സ്വര്‍ണ കള്ളക്കടത്ത്: കോഫേപോസ ചുമത്തണം, മുഖ്യമന്ത്രിക്കെതിരെയും അന്വേഷണം വേണം: മുല്ലപ്പള്ളി

തിരുവനന്തപുരം | ഐ ടി ഉദ്യോഗസ്ഥ സ്വപ്‌ന സുരേഷ് ഉള്‍പ്പെട്ട സ്വര്‍ണ കള്ളക്കടത്ത് കേസ് സി ബി ഐ അന്വേഷിക്കണമെന്ന് കെ പി സി സി അധ്യക്ഷന്‍ മുല്ലപ്പള്ളി രാമചന്ദ്രന്‍. കോഫേപോസ നിയമപ്രകാരം കേസ് ചാര്‍ജ് ചെയ്യണമെന്നും മുഖ്യമന്ത്രിയെ ഈ നിയമത്തിന്റെ പരിധിയില്‍ കൊണ്ടുവരണമെന്നും അദ്ദേഹം ആവശ്യപ്പെട്ടു. കോഫേപോസ നിയമ പ്രകാരം അഞ്ചോ പരമാവധി പതിനഞ്ചോ ദിവസം വരെയുള്ള സമയം കൊണ്ട് അന്വേഷണം പൂര്‍ത്തിയാക്കണമെന്നാണ് നിയമമെന്നും എത്രയും പെട്ടെന്ന് സ്വപ്ന സുരേഷിനെ അറസ്റ്റ് ചെയ്യണമെന്നുമുള്ള ആവശ്യവും മുല്ലപ്പള്ളി ഉന്നയിച്ചു. സി ബി ഐക്ക് സ്വതന്ത്രമായി പ്രവര്‍ത്തിക്കാനുള്ള സാഹചര്യമുണ്ടായാല്‍ സംഭവത്തിലെ എല്ലാ ഉള്ളുകള്ളികളും പുറത്തുവരും. കേസുമായി ബന്ധപ്പെട്ട് നാളെ മുതല്‍ കോണ്‍ഗ്രസ് സമരപരിപാടികള്‍ ആരംഭിക്കുമെന്നും മുല്ലപ്പള്ളി വ്യക്തമാക്കി.

സ്വപ്ന സുരേഷിനെ ഐ ടി വകുപ്പില്‍ നിയമിച്ചത് എങ്ങനെയാണ്, അതിനുള്ള മാനദണ്ഡം എന്തായിരുന്നു എന്നതെല്ലാം വിശദീകരിക്കാന്‍ മുഖ്യമന്ത്രി തയാറാവണം.
നിയമനത്തെക്കുറിച്ച് അറിയില്ലെന്ന മുഖ്യമന്ത്രിയുടെ വാദം അംഗീകരിക്കാനാവില്ല. ഒരു നിയമനവും മുഖ്യമന്ത്രിയോ പാര്‍ട്ടിയോ അറിയാതെ നടന്നിട്ടില്ലെന്നത് ഉറപ്പാണ്. കണ്ണടച്ച് പാലു കുടിച്ച പൂച്ചയുടെ ഭാവമാണ് മുഖ്യമന്ത്രിക്ക് കഴിഞ്ഞ ദിവസത്തെ വാര്‍ത്താ സമ്മേളനത്തില്‍ ഉണ്ടായിരുന്നതെന്നും മുല്ലപ്പള്ളി പറഞ്ഞു.

സ്പ്രിന്‍ക്ലര്‍ ഇടപാടിന്റെ മുഖ്യ സൂത്രധാരന്‍ ഐ ടി സെക്രട്ടറി ശിവശങ്കറായിരുന്നു. പ്രൈസ് വാട്ടര്‍ഹൗസ് കൂപ്പര്‍, ഇ-ബസ് ഇടപാടുകളുടെയും സൂത്രധാരന്‍ ഇദ്ദേഹമായിരുന്നു. ഇതൊക്കെ കണക്കിലെടുക്കുമ്പോള്‍
മുഖ്യമന്ത്രിയിലേക്കും ഓഫീസിലേക്കും തന്നെയാണ് സംശയത്തിന്റെ സൂചിമുന നീളുന്നത്. മുഖ്യമന്ത്രിയുടെ ഓഫീസില്‍ മേഞ്ഞുനടക്കുന്നയാളാണ് സ്വപ്ന സുരേഷ്.പല മുതിര്‍ന്ന ഉദ്യോഗസ്ഥരുടെയും ഗള്‍ഫ് യാത്രകളില്‍ ഇവര്‍ അനുഗമിച്ചിട്ടുണ്ട്. സ്വപ്ന ഒളിവില്‍ കഴിയുന്നത് ഐ എ എസുകാരുടെ സഹായത്തോടെയാണെന്നും മുല്ലപ്പള്ളി ആരോപിച്ചു.

സംഭവത്തില്‍ എത്ര ഉന്നതന്മാര്‍ക്ക് പങ്കുണ്ട്, എത്ര കോടിയുടെ സ്വര്‍ണമാണ് കേരളത്തിലെത്തിയത്, ഉദ്യോഗസ്ഥര്‍ക്കും സി പി എമ്മിനും എത്ര കമ്മീഷന്‍ ലഭിച്ചു എന്നിങ്ങനെയുള്ള കാര്യങ്ങളെല്ലാം വ്യക്തമാക്കണം. സ്വപ്നയുടെ മകള്‍ക്ക് എസ് എഫ് ഐയുമായുള്ള ബന്ധത്തെ കുറിച്ചും അറിയേണ്ടതുണ്ടെന്നും കെ പി സി സി അധ്യക്ഷന്‍ പറഞ്ഞു.