ഇന്ധനവില വര്‍ധന: സംസ്ഥാനത്ത് ഇന്ന് യൂത്ത് കോണ്‍ഗ്രസ് പ്രതീകാത്മക ബന്ദ്

തിരുവന്തപുരം | രാജ്യത്ത് ദിവസവും ഇന്ധനവില വര്‍ധിപ്പിച്ച് നടക്കുന്ന ഏറ്റവും വലിയ ജനദ്രോഹ നടപടിക്കെതിരെ യൂത്ത്‌കോണ്‍ഗ്രസ് ഇന്ന് സംസ്ഥാനത്ത് പ്രതീകാത്മക ബന്ദ് നടത്തും. രാവിലെ 11 മുതല്‍ 11.45 വരെ വാഹനങ്ങള്‍ റോഡിന്റെ വശങ്ങളില്‍ നിര്‍ത്തിയിട്ട് പ്രതിഷേധിക്കാനാണ് യൂത്ത് കോണ്‍ഗ്രസ് തീരുമാനം. തിരുവനന്തപുരത്ത് കെ പി സി സി പ്രസിഡന്റ് മുല്ലപ്പള്ളി രാമചന്ദ്രന്‍ സമരം ഉദ്ഘാടനം ചെയ്യും. പ്രതിപക്ഷ നേതാവ് രമേശ് ചെന്നിത്തല, മുന്‍മുഖ്യമന്ത്രി ഉമ്മന്‍ചാണ്ടി എന്നിവര്‍ പങ്കെടുക്കും. ഓരോ ജില്ലകളിലും പ്രതിഷേധ പരിപാടികളുടെ ഉദ്ഘാടനങ്ങള്‍ നടക്കും. 1000 കേന്ദ്രങ്ങള്‍ കേന്ദ്രീകരിച്ചാണ് പ്രതിഷേധം നടക്കുക.