തിരുവനന്തപുരത്ത് കൊവിഡ് വാർഡിൽ ആത്മഹത്യക്ക് ശ്രമിച്ചയാൾ മരിച്ചു

തിരുവനന്തപുരം |  ഗവ. മെഡിക്കല്‍ കോളജിലെ കൊവിഡ് വാര്‍ഡില്‍ ആത്മഹത്യക്ക് ശ്രമിച്ചയാൾ മരിച്ചു. ആനാട് സ്വദേശിയായ 33കാരനാണ് മരിച്ചത്. ഇന്ന് രാവിലെ വാര്‍ഡില്‍ തൂങ്ങിയ നിലയിൽ  കണ്ടെത്തിയ ഇയാളുടെ നില അതീവ ഗുരുതരമായിരുന്നതിനെ തുടർന്ന് ഐ സി യുവിലേക്ക് മാറ്റിയിരുന്നു.  പതിനൊന്നരയോടെയാണ്  മരിച്ചത്. കൊവിഡ് നെഗറ്റീവ് ആയ ഇദ്ദേഹം ഇന്ന്  ഡിസ്ചാർജ് ചെയ്യാനിരിക്കുകയായിരുന്നു.

കൊവിഡ് വാര്‍ഡില്‍ നിന്നും ഇന്നലെ നിയന്ത്രണം ലംഘിച്ച് പുറത്തിറങ്ങിയ രോഗിയായിരുന്നു ഇയാൾ. മെയ് 29നാണ് യുവാവിന് ആദ്യം കൊവിഡ് സ്ഥിരീകരിച്ചത്. അവസാന പരിശോധനയില്‍ ഫലം നെഗറ്റീവായതിന് പിന്നാലെയാണ് ആശുപത്രി ജീവനക്കാരുടെ കണ്ണുവെട്ടിച്ച് ഇയാള്‍ ഇന്നലെ പുറത്തിറങ്ങിയത്. ആശുപത്രിയില്‍ നിന്ന് നല്‍കിയ വസ്ത്രങ്ങളായിരുന്നു ധരിച്ചിരുന്നത്.

കെ എസ് ആര്‍ ടി സി ബസില്‍ കയറി ആനാട് വരെ എത്തിയെങ്കിലും നാട്ടുകാര്‍ തിരിച്ചറിഞ്ഞതോടെ ഇയാളെ പിടികൂടുകയായിരുന്നു. ഇയാല്‍ മദ്യപാനത്തിന് അടിമയായിരുന്നെന്നാണ് പ്രാഥമിക വിവരം. മദ്യം വാങ്ങാൻ തമിഴ്നാട്ടിലേക്ക് കടക്കുവാനാണ് ഇയാൾ ആശുപത്രി ചാടിയതെന്നും റിപ്പോർട്ടുകൾ വന്നിരുന്നു. ഇദ്ദേഹവുമായി സമ്പര്‍ക്കമുണ്ടായവരെ കണ്ടെത്തുന്നതിന് സര്‍വയലന്‍സ് ടീം അടിയന്തിര നടപടി തുടങ്ങിയിരുന്നു.