ഓട്ടോ ഡ്രൈവര്‍ പെട്രോള്‍ ഒഴിച്ച് തീ കൊളുത്തിയ യുവാവ് മരിച്ചു

കൊച്ചി | വടുതലയില്‍ ഓട്ടോറിക്ഷാ ഡ്രൈവര്‍ പെട്രോള്‍ ഒഴിട്ട് തീ കൊളുത്തിയ രണ്ട് പേരില്‍ ഒരാള്‍ മരിച്ചു. ആക്രമണത്തില്‍ പൊള്ളലേറ്റ് ചികിത്സയിലായിരുന്ന സ്വകാര്യ ആശുപത്രിയിലെ ജീവനക്കാരനായ റിജിന്‍ ദാസ്( 35) ആണ് മരിച്ചത്. പൊള്ളലേറ്റ ആലപ്പുഴ എഴുപുന്ന സ്വദേശി പങ്കജാക്ഷന്റെ നില ഇപ്പോഴും ഗുരുതരമായി തുടരുകയാണ്. അക്രമണത്തിന് ശേഷം ഓട്ടോറിക്ഷാ ഡ്രൈവര്‍ ജീവനൊടുക്കിയിരുന്നു.

വടുതല സ്വദേശി ഫിലിപ്പ് എന്നയാളാണ് രണ്ടുപേരുടെയും ദേഹത്ത് പെട്രോളൊഴിച്ച് കത്തിച്ച ശേഷം ആത്മഹത്യ ചെയ്തത്. കൊച്ചി പച്ചാളത്തെ ഷണ്‍മുഖം റോഡില്‍ വെച്ചാണ് സംഭവം. ഷണ്‍മുഖം റോഡിലെ ഒരു കടയിലെത്തിയ ഫിലിപ്പ് കടയുടമ പങ്കജാക്ഷന്റേയും കടയിലുണ്ടായിരുന്ന റിജിന്റെയും ദേഹത്തേക്ക് പെട്രോളൊഴിച്ച് തീ കൊളുത്തുകയായിരുന്നു. ഇരുവരേയും കൊലപ്പെടുത്തുക എന്ന ലക്ഷ്യത്തോടെയാണ് ഫിലിപ്പ് പെട്രോള്‍ ഒഴിച്ചതെന്നാണ് പോലീസിന്റെ പ്രാഥമിക നിഗമനം.