കൊവിഡ് പ്രതിരോധം: ഷൈലജ ടീച്ചറെ പ്രശംസിച്ച് ശ്രീലങ്കൻ മുൻ പ്രധാനമന്ത്രിയുടെ കത്ത്

തിരുവനന്തപുരം | കൊവിഡ് പ്രതിരോധവുമായി ബന്ധപ്പെട്ട് കേരളത്തിന്റെ നടപടികളെ പ്രശംസിച്ച് കേരളത്തിന്റെ ആരോഗ്യമന്ത്രി കെ കെ ഷൈലജ ടീച്ചർക്ക് ശ്രീലങ്കൻ മുൻ പ്രധാനമന്ത്രി കത്തയച്ചു.

പരിമിതമായ വിഭവങ്ങൾ ഉപയോഗിച്ച് കൊവിഡിനെ എങ്ങനെ നിയന്ത്രിക്കാമെന്ന കാര്യത്തിൽ കേരളത്തിന്റെ ആരോഗ്യമന്ത്രി മാതൃകയായെന്നാണ് ശ്രീലങ്കൻ മുൻ പ്രധാനമന്ത്രി റനിൽ വിക്രമസിംഗെ കത്തിൽ പറയുന്നത്. കഴിഞ്ഞ ദിവസമാണ് വിക്രമസിംഗെ കേരളത്തിന്റെ ആരോഗ്യമന്ത്രിക്ക് കത്തയച്ചിരിക്കുന്നത്.

കൊവിഡിനെ പ്രതിരോധിക്കുന്നതിൽ കേരളം മാതൃകയാണെന്നും ആരോഗ്യപ്രവർത്തകരും പോലീസുകാരും വളണ്ടിയർമാരും അടങ്ങുന്നവരിൽ കൊവിഡ് പരിശോധനകൾ തുടർച്ചയായി നടത്തിയത് ലോകത്തിന് തന്നെ മാതൃകയാക്കാമെന്നും പറയുന്ന കത്തിൽ കൊവിഡിനെതിരായ പ്രതിരോധത്തിൽ മേഖലയിലെ തന്നെ ഏറ്റവും മികച്ച പ്രവർത്തനമാണ് കേരളത്തിന്റേതെന്നും വിക്രമസിംഗെ വ്യക്തമാക്കുന്നുണ്ട്.