Covid19
മാധ്യമപ്രവര്ത്തകര്ക്ക് കൊവിഡ് പരിശോധനക്ക് സംവിധാനമൊരുക്കും: മുഖ്യമന്ത്രി
തിരുവനന്തപുരം | കൊവിഡ് മാധ്യമ മേഖലയേയും ഗുരുതരമായി ബാധിച്ചതായി മുഖ്യമന്ത്രി പിണറായി വിജയന്. പത്രങ്ങള് പലതും ഇതിനോടകം പേജുകള് കുറച്ചു. സാമൂഹത്തില് പൊതുപരിപാടികളും വാണിജ്യവും ഇല്ലാത്തതിനാല് പരസ്യം ലഭിക്കുന്നില്ല എന്ന പ്രതിസന്ധി മാധ്യമങ്ങള് നേരിടുന്നുണ്ട്. ഫില്ഡില് പ്രവര്ത്തിക്കുന്ന മാധ്യമപ്രവര്ത്തകര്ക്ക് രോഗഭീഷണിയും ഉണ്ട്. രാജ്യത്തെ പല നഗരങ്ങളിലും മാധ്യമപ്രവര്ത്തകര്ക്ക് കൊവിഡ് സ്ഥിരീകരിച്ചിട്ടുണ്ടെന്നും മുഖ്യമന്ത്രി പറഞ്ഞു.
കേരളത്തിലെ മാധ്യമപ്രവര്ത്തകരെ കൊവിഡ് പരിശോധനയ്ക്ക് വിധേയമാക്കി അവരെ സംരക്ഷിക്കാന് സര്ക്കാര് ഇടപെടും. മാധ്യമസ്ഥാപനങ്ങള് ഈ ഘട്ടത്തില് പിരിച്ചു വിടലിനോ ശമ്പളനിഷേധത്തിനോ ശ്രമിക്കരുത്. ആരോഗ്യപ്രവര്ത്തകരുമായി മാധ്യമപ്രവര്ത്തകര് തോളോടു തോള് ചേര്ന്നു പ്രവര്ത്തിക്കുകയാണ്.
വാര്ത്താശേഖരണത്തില് അവര്ക്ക് തടസമുണ്ടാവരുതെന്ന് പൊലീസിനെ അറിയിച്ചു. പിആര്ഡിയില് നിന്നും മാധ്യമങ്ങള്ക്ക് നല്കേണ്ട കുടിശ്ശിക ഉടന് നല്കാന് നിര്ദേശിച്ചിട്ടുണ്ടെന്നും മുഖ്യമന്ത്രി അറിയിച്ചു.