കൊവിഡ്: വിംബിള്‍ഡണ്‍ ടെന്നീസ് ടൂര്‍ണമെന്റ് മാറ്റിവച്ചു

ലണ്ടന്‍ | ഈ വര്‍ഷത്തെ വിംബിള്‍ഡണ്‍ ടെന്നീസ് ടൂര്‍ണമെന്റ് മാറ്റിവച്ചു. ലോകത്ത് കൊവിഡ് വൈറസ് പടരുന്ന സാഹചര്യത്തിലാണ് തീരുമാനം. രണ്ടാം ലോകമഹായുദ്ധത്തിനു ശേഷം ഇതാദ്യമായാണ് വിംബിള്‍ഡണ്‍ മാറ്റിവക്കുന്നത്. ജൂണ്‍ 29 മുതല്‍ ജൂലൈ 12 വരെയാണ് വിംബിള്‍ഡണ്‍ ഷെഡ്യൂള്‍ നിശ്ചയിച്ചിരുന്നത്. എന്നാല്‍, നിലവിലെ സാഹചര്യത്തില്‍ ഇതു പ്രകാരം മത്സരങ്ങള്‍ നടത്തുക അസാധ്യമാണെന്ന് ടൂര്‍ണമെന്റ് സംഘടിപ്പിക്കുന്ന ഓള്‍ ഇംഗ്ലണ്ട് ലോണ്‍ ടെന്നീസ് ക്ലബിന്റെ (എ ഇ എല്‍ ടി സി) അടിയന്തര യോഗത്തില്‍ വിലയിരുത്തുകയായിരുന്നു.

പൊതു ജനാരോഗ്യ ആശങ്ക മുന്‍നിര്‍ത്തി ചാമ്പ്യന്‍ഷിപ്പ് മാറ്റിവക്കാന്‍ ഓള്‍ ഇംഗ്ലണ്ട് ക്ലബും കമ്മിറ്റി ഓഫ് മാനേജ്‌മെന്റും ചേര്‍ന്ന് തീരുമാനിച്ചതായി എ ഇ എല്‍ ടി സി പ്രസ്താവനയില്‍ അറിയിച്ചു.