Kerala
കൊറോണ: സംസ്ഥാനത്ത് നിരീക്ഷണത്തിലുള്ളത് 2288 പേര്
തിരുവനന്തപുരം | കൊറോണ വൈറസ് സംശയിച്ച് സംസ്ഥാനത്ത് ഇപ്പോള് നിരീക്ഷണത്തിലുള്ളത് 2288 പേര്. ഇവരില് 2272 പേര് വീടുകളിലും, 16 പേര് ആശുപത്രികളിലുമാണ് നിരീക്ഷണത്തില് കഴിയുന്നതെന്ന് ആരോഗ്യമന്ത്രി കെ കെ ശൈലജ അറിയിച്ചു.
സംശയാസ്പദമായവരുടെ 408 സാമ്പിളുകള് എന്.ഐ.വി.യില് പരിശോധനയ്ക്ക് അയച്ചിട്ടുണ്ട്. ഇതില് 379 സാമ്പിളുകളുടെ പരിശോധനാ ഫലം നെഗറ്റിവ് ആണ്. ബാക്കിയുള്ളവരുടെ ഫലം വരാനുണ്ട്. നിലവില് ആശുപത്രിയില് പ്രവേശിപ്പിക്കപ്പെട്ട ആരുടേയും ആരോഗ്യനിലയില് ആശങ്കയ്ക്ക് വകയില്ലെന്നും മന്ത്രി വ്യക്തമാക്കി.
പരിഷ്കരിച്ച മാര്ഗരേഖ അനുസരിച്ച് വീടുകളില് നിരീക്ഷണത്തില് കഴിഞ്ഞിരുന്ന 130 വ്യക്തികളെ ഇന്ന് ഒഴിവാക്കിയിട്ടുണ്ട്. എങ്കിലും കൊറോണ വൈറസ് രോഗബാധയ്ക്കെതിരെ ജാഗ്രത തുടരുകയാണ്. രോഗബാധിത പ്രദേശങ്ങളില് നിന്നും മടങ്ങിയെത്തിയവര് 11/02/2020 ലെ മാര്ഗനിര്ദ്ദേശങ്ങള് പ്രകാരം വീടുകളില് തന്നെ തുടരേണ്ടതും പൊതു ഇടങ്ങള് സന്ദര്ശിക്കുന്നത് ഒഴിവാക്കേണ്ടതുമാണെന്നും മന്ത്രി അറിയിച്ചു.