ഭര്‍ത്താവ് കാറില്‍ ഉപേക്ഷിച്ച വീട്ടമ്മ ആശുപത്രിയില്‍ മരിച്ചു

കോട്ടയം | ഭര്‍ത്താവ് കാറില്‍ ഉപേക്ഷിച്ച വീട്ടമ്മ ചികിത്സയിലിരിക്കെ മരിച്ചു. മൃതദേഹം കോട്ടയം മെഡിക്കല്‍ കോളജ് മോര്‍ച്ചറിയില്‍ സൂക്ഷിച്ചിരിക്കുകയാണ്. മകന്‍ എത്തിയ ശേഷം മറ്റ് നടപടി ക്രമങ്ങള്‍ സ്വീകരിക്കുമെന്ന് ആശുപത്രി അധികൃതര്‍ അറിയിച്ചു. ജനുവരി 17 നാണ് അടിമാലി റോഡില്‍ കാറിനുള്ളില്‍ അവശനിലയില്‍ ലൈലാമണിയെ കണ്ടെത്തിയത്.

രണ്ടുദിവസമാണ് റോഡരികില്‍ ഉപേക്ഷിച്ച കാറില്‍ ശരീരം പാതി തളര്‍ന്ന ലൈലാമണി കഴിഞ്ഞത്. പോലീസ് എത്തി ഇവരെ ആശുപത്രിയില്‍ എത്തിക്കുകയായിരുന്നു.
രണ്ടാം ഭര്‍ത്താവ് മാത്യുവാണ് ഇവരെ ഉപേക്ഷിച്ച് കടന്നു കളഞ്ഞത്. അതേ സമയം പരാതി ഇല്ലാത്തതിനാല്‍ ഇയാള്‍ക്കെതിരെ പോലീസ് കേസെടുത്തിരുന്നില്ല.ലൈലാമണിയുടെ ചികിത്സയ്ക്ക് എന്ന പേരില്‍ മാത്യു വ്യാപകമായി പണപ്പിരിവ് നടത്തിയിരുന്നതായി സ്‌പെഷല്‍ ബ്രാഞ്ച് അന്വേഷണത്തില്‍ കണ്ടെത്തിയിട്ടുണ്ട്. ഇതിന് മുമ്പും ലൈലാമണിയെ ഉപേക്ഷിച്ച് മാത്യു കടന്നു കളഞ്ഞിരുന്നുവെങ്കിലും ബന്ധുക്കള്‍ ഇടപെട്ട് പ്രശ്‌നം പരിഹരിക്കുകയായിരുന്നു.

ആദ്യ ഭര്‍ത്താവിലുള്ള മകന്‍ മഞ്ജിതാണ് അമ്മയെക്കുറിച്ചുള്ള വിവരങ്ങളറിഞ്ഞ് ആശുപത്രിയില്‍ എത്തിയത്. ഇയാള്‍ കട്ടപ്പനയിലാണ് താമസിക്കുന്നത്. ഇയാളുടെ വീട്ടിലേക്കുള്ള യാത്രക്കിടെ ഭര്‍ത്താവ് മാത്യു മൂത്രം ഒഴിക്കാനെന്ന് പറഞ്ഞ് പുറത്ത് പോയെന്നും പിന്നീട് തിരിച്ച് വന്നില്ലെന്നാണ് ലൈലാമണി പൊലീസിനോട് പറഞ്ഞത്.

വയനാട് തലപ്പുഴ വെണ്മണിയില്‍ ആയിരുന്നു രണ്ടാം ഭര്‍ത്താവുമൊത്ത് ലൈലാമണി താമസിച്ചിരുന്നത്. തിരുവനന്തപുരം കല്ലറ സ്വദേശിയാണ് ഇവര്‍. 22 വര്‍ഷം മുമ്പാണ് ആദ്യ ഭര്‍ത്താവ് മരിച്ചത്. അതിന് ശേഷം 2014 മുതലാണ് മാത്യുവിനൊപ്പം താമസിച്ചിരുന്നത്.