Eranakulam
മുത്തൂറ്റ് എം ഡിക്കു നേരെ കല്ലെറിഞ്ഞ കേസ്: സി ഐ ടി യു പ്രവര്ത്തകന് അറസ്റ്റില്
കൊച്ചി | മുത്തൂറ്റ് ഫിനാന്സ് എം ഡി. ജോര്ജ് അലക്സാണ്ടറെ കല്ലെറിഞ്ഞു പരുക്കേല്പ്പിച്ച കേസില് സി ഐ ടി യു പ്രവര്ത്തകന് അറസ്റ്റില്. ചുമട്ടുതൊഴിലാളിയായ എറണാകുളം കലൂര് സ്വദേശി സലിം ആണ് അറസ്റ്റിലായത്. ഇന്ന് രാവിലെ ഒമ്പതരയോടെയാണ് എം ഡിയുടെ കാറിനു നേരെ കല്ലേറുണ്ടായത്. എറണാകുളം ബാനര്ജി റോഡിലെ മുത്തൂറ്റ് ഹെഡ് ഓഫീസിനു സമീപത്തു വച്ചായിരുന്നു ആക്രമണം. ഏറു കൊണ്ട് തലക്ക് ഗുരുതരമായി പരുക്കേറ്റ അലക്സാണ്ടര് ഇവിടുത്തെ മെഡിക്കല് ട്രസ്റ്റ് ആശുപത്രിയില് ചികിത്സയിലാണ്.
എം ഡിയെ കല്ലെറിഞ്ഞത് സി ഐ ടി യു പ്രവര്ത്തകരല്ലെന്നും അങ്ങനെയാണെന്ന് വരുത്തിത്തീര്ക്കാനുള്ള ശ്രമമാണ് നടക്കുന്നതെന്നും സി പി എം നേതാവ് എം സ്വരാജ് എം എല് എ പറഞ്ഞിരുന്നു. മുത്തൂറ്റില് നടക്കുന്നത് രാഷ്ട്രീയ പകപോക്കലാണെന്നും അദ്ദേഹം ആരോപിച്ചിരുന്നു. മുത്തൂറ്റില് തൊഴിലാളികള് നടത്തുന്നത് സമാധാനപരമായ സമരമാണെന്നും അവിടെ പ്രതിസന്ധിയുണ്ടാക്കുന്നത് മാനേജ്മെന്റാണെന്നും തൊഴില്മന്ത്രി ടി പി രാമകൃഷ്ണന് പ്രതികരിക്കുകയുണ്ടായി.