Kerala
പൗരത്വ നിയമഭേദഗതിയില് പിണറായിയുടെ നടപടി പോക്കറ്റടിക്കാരന് വേഷം മാറി പോലീസ് ആയതുപോലെ : ഷിബു ബേബി ജോണ്
കോഴിക്കോട് |പൗരത്വ ഭേദഗതി നിയമത്തില് മുഖ്യമന്ത്രി പിണറായി വിജയനെതിരെ അതിരൂക്ഷ വിമര്ശവുമായി ആര്എസ്പി നേതാവും മുന് മന്ത്രിയുമായ ഷിബു ബേബി ജോണ്.ഒരു കോഴിയെ കൊല്ലരുത് എന്ന് ആത്മാര്ഥമായി ആഗ്രഹമുണ്ടെങ്കില് അതിനെ കൊല്ലാന് ഒരുങ്ങുന്നു എന്നറിയുമ്പോള് തന്നെ കൊല്ലരുത് എന്ന് പറയണം, കൊന്ന് കറിവച്ച കോഴിയെ വിളമ്പാന് വരുമ്പോള് വഴിപാടായി പ്രതികരിക്കുന്നത് എന്ത് രാഷ്ട്രീയ സന്ധതയാണുള്ളതെന്നും ഷിബു ബേബി ജോണ് ഫേസ്ബുക്ക് പോസ്റ്റില് പറയുന്നു.പോക്കറ്റടിക്കാരന് വേഷം മാറി പോലീസ് ആയതുപോലെ ആണ് പൗരത്വ നിയമ ഭേദഗതിയില് പിണറായിയുടെ നടപടികളെന്നും കുറിപ്പിലുണ്ട്.
ഫേസ്ബുക്ക് പോസ്റ്റിന്റെ പൂര്ണ്ണരൂപം വായിക്കാം:
പോക്കറ്റടിക്കാരന് വേഷം മാറി പോലീസ് ആയതുപോലെ ആണ് പൗരത്വ നിയമ ഭേദഗതിയില് പിണറായിയുടെ നടപടികള്.
പൗരത്വ ഭേദഗതി നിയമം ആകുന്നതിന് മുന്പ് ഈ നിയമം നടപ്പാക്കരുത് എന്നൊരു വാക്ക് പോലും പറയാത്ത പിണറായി. ഒരു കോഴിയെ കൊല്ലരുത് എന്ന് ആത്മാര്ഥമായി ആഗ്രഹമുണ്ടെങ്കില് അതിനെ കൊല്ലാന് ഒരുങ്ങുന്നു എന്നറിയുമ്പോള് തന്നെ കൊല്ലരുത് എന്ന് പറയണം, കൊന്ന് കറിവച്ച കോഴിയെ വിളമ്പാന് വരുമ്പോള് വഴിപാടായി പ്രതികരിക്കുന്നത് എന്ത് രാഷ്ട്രീയ സത്യസന്ധത?
കുടിയേറ്റക്കാരെ തടവില് പാര്പ്പിക്കുവാന് ജയില് വിവരങ്ങള് ചോദിച്ച് കേന്ദ്ര സര്ക്കാര് അയച്ച സന്ദേശം 2019 ജനുവരി മാസത്തില് പിണറായി സര്ക്കാരിന് കിട്ടിയെന്ന വിവരങ്ങള് പുറത്തുവന്നു, എന്നിട്ട് ഈ വിഷയം എന്ത്കൊണ്ട് പിണറായി സര്ക്കാര് പൊതുസമൂഹത്തില് നിന്ന് മറച്ചുവച്ചു?
ഏറ്റവും ഒടുവിലായി കോഴിക്കോട് ഡിസിസി പ്രസിഡന്റ് ടി സിദ്ദിഖിനെയും സഹപ്രവര്ത്തകരെയും പൗരത്വ നിയമ ഭേദഗതി വിഷയത്തില് കേന്ദ്ര സര്ക്കാരിന് എതിരെ സമരം ചെയ്തതിന് രണ്ടുമൂന്നു ദിവസം ജയിലില് അടച്ചു. കേരളം ഭരിക്കുന്നത് ബിജെപി മുഖ്യമന്ത്രി യോഗി ആദിത്യനാഥിന്റെ പൊലീസ് ആണോ?
ഒരുവശത്തു ഒന്നിച്ചു സമരം ചെയ്യാമെന്ന് പറയുക, മറുവശത്തു നടപടികളില് തികഞ്ഞ മോദി ഭക്തി കാണിക്കുക. പോക്കറ്റടിക്കാരന് വേഷം മാറി പോലീസായി എന്ന് പൗരത്വ നിയമ ഭേദഗതിയില് പിണറായിയുടെ പ്രവര്ത്തികള് കാണുമ്പോള് പറയാതെ വയ്യ.
ജനങ്ങളെ വിഭജിച്ച് രാജ്യത്തിന്റെ സാമ്പത്തിക തളര്ച്ചയില് നിന്ന് ഒളിച്ചോടാന് ശ്രമിക്കുന്ന മോദിയും, ഇതിനിടയിലൂടെ ഭരണ പരാജയങ്ങളില് നിന്ന് ഒളിച്ചോടാന് ശ്രമിക്കുന്ന പിണറായിയും, ഇതാണ് ഇന്നത്തെ ദേശീയ സംസ്ഥാന നേര്ക്കാഴച്ച. എന്തായാലും പൊതുസമൂഹത്തിന് ഇത് മനസ്സിലാക്കാനുള്ള കഴിവുണ്ട്, ജാര്ഖണ്ഡില് ഇന്നലെ നാം കണ്ടതും ജനം ഇത് മനസിലാക്കി പ്രതികരിച്ചു തുടങ്ങിയതിന്റെ തെളിവ് ആണ്.