സംയുക്ത സമരത്തോട് വിയോജിച്ച് കെ മുരളീധരനും; വിമര്‍ശനം ചെന്നിത്തലയെ വേദിയിലിരുത്തി

തിരുവനന്തപുരം | പൗരത്വ ഭേദഗതി നിയമത്തിനെതിരെ സി പി എമ്മിനോടൊത്ത് സമരത്തിനില്ലെന്ന കെ പി സി സി അധ്യക്ഷന്‍ മുല്ലപ്പള്ളി രാമചന്ദ്രന്റെ നിലപാടിനോട് യോജിച്ച് കെ മുരളീധരന്‍ എം പി. മുയലിനൊപ്പം ഓടുകയും വേട്ടപ്പട്ടിയോടൊപ്പം നീങ്ങുകയും ചെയ്യുന്ന മുഖ്യമന്ത്രി പിണറായി വിജയന്റെ നിലപാട് അംഗീകരിക്കാന്‍ കഴിയില്ലെന്നും പ്രതിപക്ഷ നേതാവ് രമേശ് ചെന്നിത്തലയുടെ സാന്നിധ്യത്തില്‍ മുരളി പറഞ്ഞു.

പൗരത്വ ഭേദഗതിക്കെതിരെ പ്രതിഷേധിച്ചവരെ സംസ്ഥാനത്ത് അറസ്റ്റ് ചെയ്ത് കേരളത്തിലും കര്‍ണാടക മോഡല്‍ നടപ്പിലാക്കാനാണ് പിണറായി സര്‍ക്കാര്‍ ശ്രമിക്കുന്നത്. പൊതുമുതലിന് കോട്ടമൊന്നും തട്ടാത്ത രീതിയില്‍ എല്ലാ സമരങ്ങളും നടത്താന്‍ കഴിയില്ല. തിരുവനന്തപുരത്ത് കെ കരുണാകരന്‍ അനുസ്മരണ ചടങ്ങിനിടെയാണ് രമേശ് ചെന്നിത്തലയെ വേദിയിലിരുത്തി മുരളീധരന്‍ വിമര്‍ശനമുന്നയിച്ചത്. മുന്നണി രാഷ്ട്രീയത്തില്‍ സ്വന്തം തീരുമാനവുമായി മുന്നോട്ട് പോകാന്‍ കഴിയില്ലെന്ന് പിന്നീട് പ്രസംഗിച്ച ചെന്നിത്തല മറുപടി നല്‍കി.