മുഴുവൻ വിദ്യാലയങ്ങളിലും കുട്ടികളുടെ സുരക്ഷ സർക്കാർ ഉറപ്പുവരുത്തണം

വയനാട്ടിലെ സർക്കാർ സ്‌കൂളിൽ അഞ്ചാംക്ലാസുകാരി ഷഹല പാമ്പുകടിയേറ്റ് മരണപ്പെട്ട സംഭവം അതീവ ദുഖകരമാണ്. ക്ലാസ്മുറിയിലെ മാളങ്ങൾ, കുട്ടിക്ക് അപകടം സംഭവിച്ചിട്ടും വേണ്ടത്ര ഗൗരവത്തിൽ എടുക്കാത്ത അധ്യാപകരുടെ സമീപനം, താലൂക്കാശുപത്രിയിൽ നിന്ന് ആവശ്യമായ ചികിത്സ നൽകാതെ വൈകിപ്പിച്ചത്, എല്ലാം ഈ ദാരുണമായ മരണത്തിനു കാരണമായതായി മനസ്സിലാവുന്നു. നമ്മുടെ വിദ്യാലയങ്ങളിൽ ആഗോള നിലവാരത്തിലുള്ള വിദ്യാഭ്യാസ രീതികളും ഗുണനിലവാരവും കൊണ്ടുവരാൻ സർക്കാർ ശ്രമിക്കുമ്പോഴും, അപൂർവ്വം ചിലവ ഇങ്ങനെ പരിതാപകരമായ അവസ്ഥയിൽ കാണുന്നു. കുട്ടികളുടെ ജീവിന് സുരക്ഷ നൽകുന്ന ഭൗതിക സാഹചര്യങ്ങൾ മുഴുവൻ വിദ്യാലയങ്ങളുടെയും അകത്ത് ഉണ്ടെന്നു സർക്കാർ ഉറപ്പുവരുത്തണം. അദ്ധ്യാപകർ വിദ്യാർത്ഥികളുടെ കാര്യത്തിൽ കൂടുതൽ ജാഗ്രത കാണിക്കണം. വിദ്യാലയങ്ങളിലെയും പരിസരങ്ങളിലേയും സുരക്ഷ കുറ്റമറ്റതാണ് എന്ന് ജനപ്രതിനിധിനികളും പി.ടി.എ ഭാരവാഹികളും ഇടയ്ക്കിടെ സന്ദർശിച്ചു ഉറപ്പുവരുത്തണം. ഷഹ്‌ലയുടെ പിതാവ് അഡ്വ. അസീസ് വേദനയോടെ പറഞ്ഞ, ഇനിയൊരു കുട്ടിക്കും ഇത്തരം ദുരന്തം ഉണ്ടാവരുത് എന്ന വാക്കുകൾ എല്ലാവരും ഗൗരവപൂർവ്വം ശ്രദ്ധിക്കണം.

കെ ജംഷാദ് ന്യൂഡല്‍ഹി