National
റഫാല്: സത്യവാങ്മൂലം നല്കാന് കൂടുതല് സമയം വേണമെന്ന കേന്ദ്ര ആവശ്യം സുപ്രീം കോടതി തള്ളി
ന്യൂഡല്ഹി: റഫാല് പുനഃപരിശോധനാ ഹര്ജികളില് മറുപടി സത്യവാങ്മൂലം നല്കാന് കൂടുതല് സമയം വേണമെന്ന കേന്ദ്രസര്ക്കാറിന്റെ ആവശ്യം സുപ്രീംകോടതി അംഗീകരിച്ചില്ല. മറുപടി നല്കാന് നാലാഴ്ച സമയം വേണമെന്ന് അറ്റോര്ണി ജനറല് കെ കെ വേണുഗോപാല് ആവശ്യപ്പെട്ടെങ്കിലും നാല് ദിവസമേ തരാനാകൂ എന്നായിരുന്നു സുപ്രീംകോടതിയുടെ നിലപാട്. മെയ നാലിനകം സത്യവാങ്മൂലം നല്കാന് ചീഫ് ജസ്റ്റിസ് അദ്ധ്യക്ഷനായ ബഞ്ച് നിര്ദേശിച്ചു. കേസ് ആറിന് പരിഗണിക്കും.
ഏപ്രില് 10-ന് കേന്ദ്രസര്ക്കാറിന്റെ എതിര്പ്പുകള് അവഗണിച്ച് റഫാല് കേസില് പുതിയ രേഖകള് പരിഗണിക്കാമെന്ന് സുപ്രീംകോടതി തീരുമാനിച്ചിരുന്നു. റഫാല് രേഖകള്ക്ക് വിശേഷാധികാരമുണ്ടെന്നും, കേന്ദ്രസര്ക്കാറിന്റെ ഈ സ്വകാര്യ രേഖകള് പുനഃപരിശോധനാ ഹര്ജികളില് വാദം കേള്ക്കുമ്പോള് പരിഗണിക്കരുതെന്നുമുളള കേന്ദ്രസര്ക്കാര് വാദം സുപ്രീംകോടതി തള്ളി.