Kerala
കനത്ത മഴ: നാടെങ്ങും കൃഷിനാശവും വെള്ളപ്പൊക്കവും
നരിക്കുനി: ശക്തമായി തുടരുന്ന മഴയില് നാടെങ്ങും കനത്ത നാശ നഷ്ടങ്ങള്. പൂനൂര് പുഴ കരകവിഞ്ഞ് വിവിധ സ്ഥലങ്ങളില് കൃഷിനാശവും വെള്ളപ്പൊക്കവുമുണ്ടായി. പൊയില്താഴത്ത് വീടുകളിലും കടകളിലും വെള്ളം കയറി. ഒരാള് പൊക്കത്തില് റോഡുകളില് വെള്ളമുയര്ന്നതിനെ തുടര്ന്ന് ഇതുവഴിയുള്ള ഗതാഗതവും മുടങ്ങി. പണ്ടാരപ്പറമ്പ്-പൊയില്താഴം റോഡ് പൂര്ണമായും വെള്ളത്തിനടിയിലായി. പൊയില്താഴത്ത് നിന്നും മുക്കടം കാട് ഭാഗത്തേക്കും പുറ്റുമണ്ണില് താഴത്തേക്കും പുല്ലാളൂരിലേക്കുമുള്ള റോഡിലും പൂര്ണമായി ഗതാഗതം മുടങ്ങി. പത്തോളം കുടുംബങ്ങളെ മാറ്റിപ്പാര്പ്പിച്ചു. നിരവധി വീടുകള് വെള്ളപ്പൊക്ക ഭീഷണിയിലാണ്.
മടവൂര് കൂട്ടുംപുറത്ത് താഴം-മൂന്നാംപുഴ തോട് നിറഞ്ഞൊഴുകി ഏക്കര്കണക്കിന് സ്ഥലത്തെ കൃഷി നശിച്ചു. സംസ്ഥാനപാതയില് നരിക്കുനി-കൊടുവളളി റോഡിലും വെളളം കയറി. മടവൂര് മുക്ക്-പൈമ്പാലശേരി റോഡില് വെള്ളം നിറഞ്ഞ് ഗതാഗതം പൂര്ണമായി മുടങ്ങി. നരിക്കുനി-പന്നൂര് റോഡില് മുണ്ടുപാലം റോഡ് നിറഞ്ഞൊഴുകി ഗതാഗതം മുടങ്ങി. കോഴിക്കോട് -ബാലുശേരി റോഡില് കാക്കൂരിലും ചേളന്നൂരിലും വെള്ളം കയറി ഗതാഗതം സ്തംഭിച്ചു. പാലത്ത് -പാലോളിത്താഴം റോഡില് തെക്കേടത്ത്താഴത്ത് വെള്ളം കയറി ഗതാഗതം ഭാഗികമായി തടസപ്പെട്ടു. പൂളക്കടവില് ഏഴ് വീടുകളില് വെള്ളം കയറി.
നരിക്കുനി,കാക്കൂര് പഞ്ചായത്തുകളിലായി നിരവധി വീടുകള്ക്കും നാശമുണ്ടായി. ലക്ഷക്കണക്കിന് രൂപയുടെ കൃഷി നാശമാണ് മേഖലയിലുണ്ടായത്. പത്തോളം കുടുംബങ്ങളെ മാറ്റിപ്പാര്പ്പിക്കുകയും ചെയ്തു.