Articles
സമഗ്ര വിദ്യാഭ്യാസം സാധ്യമാകാന്‍
വഴിവിടാതെ മുന്നോട്ട് പോകാന്‍ കുട്ടികളെ സജ്ജമാക്കുക, അതിനുള്ള തന്റേടവും ശേഷികളും അവരിലുണ്ടെന്ന് ഉറപ്പാക്കുക, നേട്ടങ്ങളിലേക്കുള്ള അവരുടെ സഞ്ചാരത്തില്‍ ആത്മവിശ്വാസം പകരുക എന്നിവയാകണം സ്‌കൂളുകളുടെ സുപ്രധാന പുതിയകാല ഊന്നല്‍ മേഖലകള്‍. അധ്യാപകരും രക്ഷിതാക്കളും അവര്‍ പഠിക്കുകയും വളരുകയും ചെയ്ത കാലത്തില്‍ കെട്ടിക്കിടക്കുന്നതിനു പകരം ഭാവിയെക്കുറിച്ച് ചിന്തിക്കുന്നവരും ജിജ്ഞാസുക്കളുമാകണം.
വിദ്യാഭ്യാസ വിദഗ്ധനായ സര്‍ കെന്‍ റോബിന്‍സണ്‍ മുന്നോട്ട് വെക്കുന്ന ‘സാക്ഷരത പോലെ തന്നെ പ്രധാനമാണ് സര്‍ഗാത്മകത’ എന്ന ആശയം പുതിയ കാലത്തെ അധ്യാപക രക്ഷകര്‍തൃ സമൂഹം ഗൗരവപൂര്‍വം പരിഗണിക്കേണ്ടതുണ്ട്. കൃത്രിമബുദ്ധി, ആഗോള കണക്റ്റിവിറ്റി, അതിരുകളില്ലാത്ത നവീകരണം എന്നിവ കൊണ്ട് ലോകം മാറ്റങ്ങളിലൂടെ അതിവേഗം കറങ്ങുമ്പോള്‍, വിദ്യാഭ്യാസം ഇനി ഒരു അക്കാദമിക യോഗ്യതയിലേക്കുള്ള പാത മാത്രമല്ല, അത് പരിണാമത്തിന്റെ എന്‍ജിനായി മാറുകയാണ്. കേവലം ശരിയുത്തരങ്ങള്‍ നേടുക എന്നതല്ല, മറിച്ച് ജിജ്ഞാസ, ധൈര്യം, സര്‍ഗാത്മകത എന്നിവയോടു കൂടി എല്ലാറ്റിനെയും കുറിച്ച് ചോദ്യം ചോദിക്കുക എന്നതിനുള്ളതാണ് വിദ്യാഭ്യാസം. വസ്തുതാ പഠനത്തില്‍ നിന്ന് കൂടുതല്‍ പ്രായോഗികവും വിദ്യാര്‍ഥി കേന്ദ്രീകൃതവും സംവേദനാത്മകവും വഴക്കവുമുള്ള പഠനത്തിലേക്കുള്ള മാറ്റത്തെ അടിസ്ഥാനമാക്കിയുള്ളതാണ് നവയുഗ വിദ്യാഭ്യാസ വിചാരങ്ങള്‍. സാങ്കേതിക വിദ്യയുമായും ഇന്റര്‍നെറ്റുമായും വളരെ കൂടുതല്‍ ഇടപഴകുന്ന പുതുതലമുറ വിദ്യാര്‍ഥികള്‍ക്ക് വിവരങ്ങള്‍ ആക്‌സസ് ചെയ്യാന്‍ ഒട്ടേറെ സ്രോതസ്സുകളും ഉപകരണങ്ങളും ഇന്നുണ്ട്. നവലോക സാഹചര്യങ്ങളെ അതിജയിക്കാന്‍ ആവശ്യമായ കഴിവുകള്‍ വികസിപ്പിക്കുകയും ആ കഴിവുകള്‍ പരിശീലിക്കാനുള്ള ആത്മവിശ്വാസം വളര്‍ത്താന്‍ അവരെ സഹായിക്കുകയും ചെയ്യുക എന്നതാണ് വിദ്യാഭ്യാസ സമ്പ്രദായത്തില്‍ ഇപ്പോള്‍ പ്രയോഗവത്കരിച്ചു തുടങ്ങിയിരിക്കുന്നത്.
ഈ നൂറ്റാണ്ടിലെ സമഗ്ര വിദ്യാഭ്യാസത്തിന് ഡിജിറ്റല്‍ സംയോജനം അടിസ്ഥാനപരമാണെങ്കിലും, നിലവിലുള്ള അധ്യാപന രീതികളിലേക്ക് സാങ്കേതികവിദ്യ ചേര്‍ത്താല്‍ മാത്രം പോരാ, അത് ഈ പ്രക്രിയയെ സര്‍ഗാത്മകമാക്കും വിധം തന്ത്രപരമായി ഉപയോഗിക്കുക കൂടി വേണം. ചില പ്രോഗ്രാമുകള്‍ പഠിപ്പിക്കുക, ഉപയോഗക്രമങ്ങള്‍ വിശദീകരിക്കുക എന്നതിനപ്പുറം ആ മേഖലയില്‍ സംഭവിക്കുന്ന ഏറ്റവും നൂതനമായ സാധ്യതകളിലേക്ക് തുറന്നിരിക്കുക എന്നതാണ് പ്രധാനം. ലോകോത്തര സര്‍വകലാശാലകളിലെയും സ്ഥാപനങ്ങളിലെയും എക്സ്പേര്‍ട്ടുകളും പരിചയസമ്പന്നതയുള്ളവരുമായ ഫാക്വല്‍റ്റി അംഗങ്ങളില്‍ നിന്ന് മാര്‍ഗനിര്‍ദേശങ്ങള്‍ സ്വീകരിക്കാന്‍ അധ്യാപകര്‍ക്കും ഇന്റര്‍നെറ്റ് വഴി ഗസ്റ്റ് ലക്ചറര്‍മാരുമായി നിരന്തരം നേരിട്ടുള്ള സെഷനുകള്‍ നടത്താന്‍ കുട്ടികള്‍ക്കും ഇന്ന് സാധ്യമാണല്ലോ. ഇത് കരിക്കുലത്തിനും സിലബസിനുമുള്ളില്‍ നിന്ന് പുറത്ത് കടന്ന് സ്വയം പുതുക്കലിനുള്ള വലിയ അവസരങ്ങള്‍ നല്‍കും. പല ക്ലാസ്സ് മുറികളിലും ‘ടെക്നോളജി ക്ലാസ്സുകള്‍’ കുട്ടികളെ അപ്രസക്തമായ പ്രോഗ്രാമുകള്‍, വെബ്‌സൈറ്റുകള്‍, ഹാര്‍ഡ്്വെയര്‍ എന്നിവയെക്കുറിച്ച് പഠിപ്പിക്കാന്‍ ശ്രമിച്ചുകൊണ്ട് അവരെ ആശയക്കുഴപ്പത്തിലാക്കുകയാണ്. അവയൊക്കെ തീര്‍ത്തും ഇന്ന് അപ്രസക്തമാണെന്ന് അധ്യാപകനേക്കാള്‍ നന്നായി കുട്ടികള്‍ക്കറിയാം. എല്ലാത്തരം വിഭവങ്ങളിലേക്കും ഇത്രയധികം പ്രവേശനമുള്ളതിനാല്‍, കുട്ടികള്‍ വ്യത്യസ്ത വിഷയങ്ങളില്‍ അധ്യാപകരേക്കാള്‍ കൂടുതല്‍ അറിവുള്ളവരും, നിലവില്‍ ഉപയോഗത്തിലുള്ള സാങ്കേതികവിദ്യയേക്കാള്‍ ഒരു പടി മുന്നില്‍ നടക്കാന്‍ പ്രാപ്തിയുള്ളവരുമാണ്. ഈ സാഹചര്യത്തില്‍ ഏറ്റവും ലേറ്റസ്റ്റ് ആയ ഉപകരണങ്ങളെയും അവയുടെ അപ്ഡേഷനുകളെയും നിരന്തരം പരിശീലിപ്പിക്കാനുള്ള റിസോഴ്സുകളും
പ്രചോദകരുമായി അധ്യാപകര്‍ പരിവര്‍ത്തിപ്പിക്കപ്പെടുകവഴി അവര്‍ക്ക് അവരുടെ വിദ്യാര്‍ഥികളെ ഏറ്റവും അനുയോജ്യമായ രീതിയില്‍ ശാക്തീകരിക്കാന്‍ കഴിയും.
പഴയ രീതിയിലുള്ള പുസ്തക പഠനത്തെയും കര്‍ക്കശമായ ക്ലാസ്സ് മുറികളെയും ന്യൂ ഏജ് എജ്യുക്കേഷന്‍ തകര്‍ത്തെറിഞ്ഞിരിക്കുന്നു. തുടര്‍ച്ചയായതും ചലനാത്മകതയുള്ളതും ആഴത്തിലുള്ളതുമായ വ്യക്തിഗത യാത്രയായി പഠനം പരിണമിച്ചിട്ടുണ്ട്. ബ്ലാക്ക്‌ബോര്‍ഡ് ഡിജിറ്റല്‍ ബോര്‍ഡിനും ബിഗ് സ്‌ക്രീനുകള്‍ക്കും വഴിമാറി. ഗൃഹപാഠം പലപ്പോഴും പ്രായോഗിക പ്രൊജക്ടുകള്‍ ഉപയോഗിച്ച് മാറ്റിസ്ഥാപിക്കപ്പെടുന്നു, പരീക്ഷാ ഹാള്‍ ആശയങ്ങള്‍ക്കായുള്ള ഒരു ലാബായി പുനര്‍സങ്കല്‍പ്പിക്കപ്പെടുന്നു. ഈ കാലഘട്ടത്തില്‍, ക്ലാസ്സ് മുറി ഇനി ഒരു മുറിയല്ല – അത് മുഴുവന്‍ പ്രപഞ്ചവുമാണ്. ബുദ്ധിശക്തി എല്ലാത്തിനും യോജിക്കുന്നതല്ലെന്നതാണ് ന്യൂ ഏജ് എജ്യുക്കേഷന്‍ വെളിപ്പെടുത്തുന്നത്. കലാകാരന്മാരെയും വിശകലന വിദഗ്ധരെയും കോഡര്‍മാരെയും പരിചാരകരെയും ഒരുപോലെ ആഘോഷിക്കാന്‍ പുതിയ വിദ്യാഭ്യാസ കാഴ്ചപ്പാടുകള്‍ക്ക് സാധിക്കുന്നു. ചില കുട്ടികള്‍ താരാപഥങ്ങളെ നിറങ്ങള്‍ കൊണ്ട് വരക്കുന്നുവെന്നും മറ്റുള്ളവര്‍ നിശബ്ദമായി സിംഫണികള്‍ രചിക്കുന്നുവെന്നും ചിലര്‍ ഒരു ശബ്ദത്തിലൂടെ വിപ്ലവങ്ങള്‍ നയിക്കുന്നുവെന്നും അത് തിരിച്ചറിയുന്നു. ഇവരെയെല്ലാം ഒരൊറ്റ അച്ചില്‍ ഒതുക്കുകയല്ല, ഓരോ പഠിതാവിനും അവരവരുടെ സ്വന്തം വെളിച്ചത്തില്‍ വിരിയുന്ന ഒരു ഇടം ഉജ്ജ്വലിപ്പിക്കാന്‍ അവസരമുണ്ടാക്കുന്നു. അവര്‍ റോബോട്ടുകള്‍ നിര്‍മിക്കുന്നു, കവിത എഴുതുന്നു, സ്റ്റാര്‍ട്ടപ്പുകള്‍ ആരംഭിക്കുന്നു. സൈബര്‍ ഭീഷണി കണ്ടെത്തുന്നതിനായി ഒരു ആപ്പ് വികസിപ്പിച്ചെടുത്ത യു എസില്‍ നിന്നുള്ള 15കാരിയായ ശാസ്ത്രജ്ഞ ഗീതാഞ്ജലി റാവുവും സൗരോര്‍ജത്തില്‍ പ്രവര്‍ത്തിക്കുന്ന ഇസ്തിരിപ്പെട്ടി രൂപകല്‍പ്പന ചെയ്ത് യു എന്‍ കാലാവസ്ഥാ വ്യതിയാന സമ്മേളനത്തില്‍ പ്രഭാഷകയായി മാറിയ ഇന്ത്യയില്‍ നിന്നുള്ള വിനിഷ ഉമാശങ്കറുമൊക്കെ, കൗമാര മനസ്സുകള്‍ ഭാവിയെയും വര്‍ത്തമാനകാലത്തെയും ഒരുപോലെ രൂപപ്പെടുത്തുന്നു എന്നാണ് വ്യക്തമാക്കുന്നത്.
ഒരു എ ഐ ടൂള്‍ ഉപയോഗിച്ചോ ഒരു യൂട്യൂബ് വീഡിയോ കണ്ടോ തത്സമയ ഓണ്‍ലൈന്‍ ഇന്ററാക്്ഷനില്‍ പങ്കെടുത്തോ ഒരു കമ്പ്യൂട്ടര്‍ ഗെയിം കളിച്ചോ ക്ലാസ്സ് മുറിയില്‍ നിന്ന് ലഭിക്കുന്ന അതേ വിവരങ്ങള്‍ എവിടെയിരുന്നും അതിവേഗത്തില്‍ പഠിക്കാന്‍ കഴിയുന്ന ഇക്കാലത്ത് കുട്ടികള്‍ സ്‌കൂളില്‍ പോകേണ്ടതുണ്ടോ? എല്ലാ വിവരങ്ങളും അവരുടെ കൈവിരല്‍ അകലത്തില്‍ ഉള്ളപ്പോള്‍ ഒരു പരീക്ഷക്കായി അവര്‍ കുറെ വസ്തുതകള്‍ ഓര്‍മിച്ചു വെക്കേണ്ടതുണ്ടോ? എന്നീ ചോദ്യങ്ങള്‍ ഇന്ന് നിരന്തരം ഉയരുന്നുണ്ട്. വ്യത്യസ്തമായി പഠിക്കുകയും ചിന്തിക്കുകയും ചെയ്യുന്ന ഇന്നത്തെ വിദ്യാര്‍ഥികള്‍ക്ക് പഴഞ്ചന്‍ ക്ലാസ്സ് റൂം രീതികള്‍ അര്‍ഥശൂന്യമാണ്. തന്നെയുമല്ല വിവരങ്ങള്‍ ഉപയോഗിക്കുക എന്നത് ഇപ്പോള്‍ കാര്യങ്ങള്‍ അറിയുന്നതിനേക്കാള്‍ വളരെ വിലപ്പെട്ടതാണ്. കാലഹരണപ്പെട്ട രീതികളില്‍ പറ്റിനിന്നാല്‍, ദ്രുതഗതിയിലുള്ള മാറ്റത്തോട് പ്രതികരിക്കുന്നതില്‍ സ്‌കൂളുകള്‍ പരാജയപ്പെടുമെന്നുറപ്പാണ്. കുട്ടികളെ എന്ത് ചിന്തിക്കണമെന്ന് പഠിപ്പിക്കുകയല്ല, മറിച്ച് എങ്ങനെ ചിന്തിക്കണം, അനുഭവിക്കണം, ബന്ധപ്പെടണം, സൃഷ്ടിക്കണം എന്ന് പഠിപ്പിക്കുക എന്നതാകണം ന്യൂ ഏജ് വിദ്യാഭ്യാസം.
ഇസഡ്, ആല്‍ഫ ജനറേഷനുകളില്‍ നിന്നുള്ള വിദ്യാര്‍ഥികളാണ് ഇപ്പോള്‍ കലാലയങ്ങളില്‍ ഉള്ളത്. ഈ രണ്ട് തലമുറകളും അവരുടെ വീടുകളിലും ക്ലാസ്സ് മുറികളിലും ഒരുപോലെ നൂതന സാങ്കേതികവിദ്യ ഉപയോഗിച്ചാണ് വളര്‍ന്നത്. അവരുടെ മുത്തശ്ശിമാര്‍ പേജുകള്‍ മറിച്ചതുപോലെ ആപ്പുകളും കോഡും ഏറ്റവും സുഖപ്രദമായി ഉപയോഗിക്കാന്‍ കഴിയുന്നവരാണിവര്‍. കിടപ്പുമുറിയില്‍ നിന്ന് പുറത്തുപോകാതെ തന്നെ അവര്‍ക്ക് താത്പര്യമുള്ള ഏത് വിഷയത്തെക്കുറിച്ചും സ്വയം പഠിച്ചെടുക്കാന്‍ കഴിയുന്ന ഈ തലമുറ, ഏത് കുഗ്രാമത്തില്‍ താമസിച്ചും അന്താരാഷ്ട്ര തലത്തില്‍ വിശാലമായ ബന്ധങ്ങള്‍ സൃഷ്ടിക്കാനും ലോകമെമ്പാടുമുള്ള ആളുകളെ ഏത് സമയവും ഓണ്‍ലൈനില്‍ കണ്ടുമുട്ടാനും ഗ്രഹത്തിന്റെ മറുവശത്ത് വരെ ഏറ്റവും എളുപ്പത്തില്‍ സുഹൃത്തുക്കളെ ഉണ്ടാക്കാനും കഴിയുന്നവരാണ്. പരമ്പരാഗത ശൈലിയിലുള്ള സൈദ്ധാന്തിക പഠനത്തില്‍ നിന്നും ഓര്‍മശക്തിക്കുള്ള മാര്‍ക്കും ഗ്രേഡും കണക്കാക്കുന്നതില്‍ നിന്നും മാറി വിദ്യാര്‍ഥികളുടെ കഴിവുകളും സാധ്യതകളും തിരിച്ചറിയുന്നതിലും മെച്ചപ്പെടുത്തുന്നതിലും സജീവ ശ്രദ്ധ പുലര്‍ത്താതെ കരിക്കുലം നവീകരണം നിരന്തരം നടത്തിയാലും പ്രയോജനമുണ്ടാകില്ല. അത്ഭുതത്തോടെ ജീവിക്കാനും സന്തോഷത്തോടെ പഠിക്കാനും കാഴ്ചപ്പാടോടെ നയിക്കാനും വിദ്യാര്‍ഥികളെ പ്രാപ്തരാക്കണം. ജോലിക്ക് മാത്രമല്ല മികച്ച മനുഷ്യരാകാനും അവരെ സജ്ജരാക്കണം. ‘പഠനം സര്‍ഗാത്മകത നല്‍കുന്നു, സര്‍ഗാത്മകത ചിന്തയിലേക്ക് നയിക്കുന്നു, ചിന്ത അറിവ് നല്‍കുന്നു, അറിവ് നിങ്ങളെ മഹാന്മാരാക്കുന്നു’ എന്ന് ഡോ. എ പി ജെ അബ്ദുല്‍ കലാം പറഞ്ഞത് ഓര്‍മിക്കാം.
കാലത്തിന്റെ ഗതിമാറ്റം ശരിയായ അര്‍ഥത്തില്‍ പറഞ്ഞാല്‍ അധ്യാപകര്‍ക്കും രക്ഷിതാക്കള്‍ക്കും ഒരു സന്തോഷ വാര്‍ത്തയാണ്. വിജയിക്കാന്‍ ആവശ്യമായ എല്ലാ വിവരങ്ങളും കുട്ടികള്‍ക്ക് സ്വയം സ്വരൂപിച്ചു നല്‍കാന്‍ പാടുപെടുന്നതിനുപകരം, വ്യത്യസ്ത മേഖലകളിലേക്ക് വിദ്യാര്‍ഥികള്‍ സ്വന്തം ചുവടുവെപ്പുകള്‍ നടത്തുമ്പോള്‍ അവര്‍ക്ക് ആവശ്യമായ പിന്തുണയും മാര്‍ഗദര്‍ശനവും മാത്രം നല്‍കിയാല്‍ മതിയാകും. വഴിവിടാതെ മുന്നോട്ട് പോകാന്‍ കുട്ടികളെ സജ്ജമാക്കുക, അതിനുള്ള തന്റേടവും ശേഷികളും അവരിലുണ്ടെന്ന് ഉറപ്പാക്കുക, നേട്ടങ്ങളിലേക്കുള്ള അവരുടെ സഞ്ചാരത്തില്‍ ആത്മവിശ്വാസം പകരുക എന്നിവയാകണം സ്‌കൂളുകളുടെ സുപ്രധാന പുതിയകാല ഊന്നല്‍ മേഖലകള്‍. അധ്യാപകരും രക്ഷിതാക്കളും അവര്‍ പഠിക്കുകയും വളരുകയും ചെയ്ത കാലത്തില്‍ തന്നെ കെട്ടിക്കിടക്കുന്നതിനു പകരം ഭാവിയെക്കുറിച്ച് ചിന്തിക്കുന്നവരും ജിജ്ഞാസുക്കളും വഴക്കമുള്ളവരും ആയിരിക്കണമെന്നതിലാണ് കാര്യം. അവര്‍ വിദ്യാര്‍ഥികളോടൊപ്പം പഠിക്കണം. ‘ഇരുപതോ അമ്പതോ വര്‍ഷങ്ങള്‍ക്ക് ശേഷം എന്റെ വിദ്യാര്‍ഥികള്‍ക്ക് എന്താണ് വേണ്ടത്? ആ കഴിവുകള്‍ അവര്‍ക്ക് എങ്ങനെ നല്‍കാന്‍ എനിക്ക് സഹായിക്കാനാകും?’ തുടങ്ങിയ ചോദ്യങ്ങള്‍ നിരന്തരം അവനവനോട് തന്നെ ചോദിക്കുന്നത് നമ്മുടെ മാനസികാവസ്ഥ മാറ്റും. പുതിയ തലമുറയെ സ്വാധീനിക്കുന്ന ഒരു നേതൃരൂപമായി വീട്ടിലും ക്ലാസ്സ് മുറിയിലും സമൂഹത്തിലും നമ്മളുണ്ടാകും.
Latest
കുടുംബം സഞ്ചരിച്ച കാര്‍ കുളത്തിലേക്ക് വീണ് യുവാവ് മരിച്ചു
കണ്ണൂരില്‍ വീട്ടുമുറ്റത്ത് എത്തിയ കാട്ടാന വീട്ടമ്മയെ ആക്രമിച്ചു
വിക്ടറി പരേഡ് ദുരന്തം: മരിച്ചവരുടെ കുടുംബങ്ങള്‍ക്ക് പത്ത് ലക്ഷം രൂപ ധനസഹായം പ്രഖ്യാപിച്ച് മുഖ്യമന്ത്രി
വിക്ടറി പരേഡ് ദുരന്തം; കുംഭമേളയിലടക്കം ദുരന്തമുണ്ടായില്ലേ എന്ന് മുഖ്യമന്ത്രി സിദ്ധരാമയ്യ
അമേരിക്കയുടെ വെന്നര്‍-ഗ്രെന്‍ റിസേര്‍ച്ച് ഗ്രാന്റ് നേടി ആസഫ് അലവി നൂറാനി
ചികിത്സാ പിഴവില്‍ പെണ്‍കുട്ടി മരിച്ചതായി ആരോപണം; ഡോ. വി പി ഗംഗാധരന് വധഭീഷണി
