Kerala
പാഠപുസ്തകങ്ങള്: എന് ഇ പി മുഴുവനായി സംസ്ഥാനത്ത് നടപ്പാക്കില്ല: മന്ത്രി വി ശിവന് കുട്ടി
മതേതരത്വത്തിനും ഭരണഘടനാ മൂല്യങ്ങള്ക്കും ഊന്നല് നല്കിയുള്ള പാഠപുസ്തകങ്ങള് മാത്രമേ സംസ്ഥാനത്ത് പുറത്തിറക്കുകയുള്ളൂ.
തിരുവല്ല | കേന്ദ്ര സര്ക്കാരിന്റെ നാഷണല് എജ്യുക്കേഷന് പോളിസി (എന് ഇ പി ) മുഴുവനായി സംസ്ഥാനത്ത് നടപ്പാക്കില്ലെന്ന് മന്ത്രി വി ശിവന്കുട്ടി. കുറ്റൂര് ഗവണ്മെന്റ് ഹയര് സെക്കന്ഡറി സ്കൂളില് പുതുതായി നിര്മിക്കുന്ന കെട്ടിടത്തിന്റെ ശിലാസ്ഥാപനം നിര്വഹിച്ച് പ്രസംഗിക്കുകയായിരുന്നു മന്ത്രി.
കേരള സംസ്കാരത്തിനും മതേതരത്വത്തിനും എതിരായി എന് ഇ പിയില് അടങ്ങിയിരിക്കുന്ന കാര്യങ്ങള് ഉള്ക്കൊള്ളാന് പ്രയാസമാണ്. മതേതരത്വത്തിനും ഭരണഘടനാ മൂല്യങ്ങള്ക്കും ഊന്നല് നല്കിയുള്ള പാഠപുസ്തകങ്ങള് മാത്രമേ സംസ്ഥാനത്ത് പുറത്തിറക്കുകയുള്ളു.
കുട്ടികളില് ചരിത്രത്തെ മാറ്റി പഠിപ്പിക്കാനുള്ള കേന്ദ്ര സര്ക്കാരിന്റെ നീക്കം അംഗീകരിക്കാന് സാധിക്കില്ലെന്നും മന്ത്രി പറഞ്ഞു. ഒന്നു മുതല് അഞ്ചു വരെയുള്ള വിദ്യാര്ഥികള്ക്ക് അടിസ്ഥാന സൗകര്യ വിദ്യാഭ്യാസം കൂടുതല് മെച്ചപ്പെടുത്തുക എന്നതാണ് സര്ക്കാരിന്റെ ലക്ഷ്യം. കുട്ടിയുമായി ഏറ്റവും അടുത്തിടപെടുന്നവര് അധ്യാപകര് ആയതിനാല് ഒന്നു മുതല് നാലുവരെ പഠിക്കുന്ന ഓരോ കുട്ടിയുടെയും എല്ലാ വിവരങ്ങളും അധ്യാപകര് അറിഞ്ഞിരിക്കണം. കുട്ടികള്ക്ക് സമാധാനത്തോടും സന്തോഷത്തോടും കൂടി പഠിക്കുന്നതിനുള്ള അന്തരീക്ഷമാണ് വേണ്ടത്. കുട്ടികളുടെ പ്രകടനം കണ്ട് ഗ്രേഡ് നിശ്ചയിക്കുന്നതും കളികളിലൂടെ സ്വന്തമായി കാര്യങ്ങള് മനസിലാക്കുന്നതുമായ ഫിന്ലന്ഡ് മോഡലിനെ പറ്റിയും മന്ത്രി പറഞ്ഞു.