Kerala
സംസ്ഥാന ന്യൂനപക്ഷ കമ്മീഷന്‍: അഡ്വ. എ എ റഷീദ് ചെയര്‍മാന്‍; എ സൈഫുദ്ദീന്‍ ഹാജിയും പി റോസയും അംഗങ്ങള്‍
ഇന്നാണ് സംസ്ഥാന ന്യൂനപക്ഷ കമ്മീഷന്‍ പുനസ്സംഘടിപ്പിച്ചു കൊണ്ടുള്ള ഉത്തരവിറങ്ങിയത്.
തിരുവനന്തപുരം | സംസ്ഥാന ന്യൂനപക്ഷ കമ്മീഷന്‍ പുനസ്സംഘടിപ്പിച്ച് ഉത്തരവിറങ്ങി. അധ്യക്ഷനായി സി പി എം നേതാവ് അഡ്വ. എ എ റഷീദിനെയും അംഗങ്ങളായി കേരള മുസ്ലിം ജമാഅത്ത് സംസ്ഥാന സെക്രട്ടറി എ സൈഫുദ്ദീന്‍ ഹാജി, ജനാധിപത്യ മഹിളാ അസോസിയേഷന്‍ സംസ്ഥാന സമിതി അംഗം പി റോസ എന്നിവരെയും നിയോഗിച്ചു. സി പി എം തിരുവനന്തപുരം ജില്ലാ കമ്മിറ്റി അംഗമായ അഡ്വ. എ എ റഷീദ് ട്രാവന്‍കൂര്‍ ടൈറ്റാനിയം പ്രൊഡക്ടിന്റെ ചെയര്‍മാന്‍, കൈരളി ചാനല്‍ ഡയറക്ടര്‍, കേരള സര്‍വകലാശാല സിന്‍ഡിക്കേറ്റ് അംഗം എന്നീ സ്ഥാനങ്ങള്‍ വഹിച്ചിരുന്നു. എസ് എഫ് ഐ നേതാവായിരുന്ന ഇദ്ദേഹം ഇടതുമുന്നണി സ്ഥാനാര്‍ഥിയായി 2016ല്‍ അരുവിക്കര മണ്ഡലത്തില്‍ മത്സരിച്ചിരുന്നു. ബിജു നിസയാണ് ഭാര്യ. ഡോ. ആമിന, ഡോ. ആഷിന, ആബിദ എന്നിവരാണ് മക്കള്‍.
വള്ളക്കടവ് സ്വദേശിയായ എ സൈഫുദ്ദീന്‍ ഹാജി കേരള മുസ്ലിം ജമാഅത്ത് സംസ്ഥാന സെക്രട്ടറി, കോഴിക്കോട് മര്‍കസ് ഗവേണിംഗ് ബോഡി അംഗം, സിറാജ് ദിനപത്രം ഡയറക്ടര്‍, ദീര്‍ഘകാലമായി വള്ളക്കടവ് മുസ്ലിം ജമാഅത്ത് പ്രസിഡന്റ്, ഹാജി സി എച്ച് മുഹമ്മദ് കോയ മെമ്മോറിയല്‍ ഹയര്‍ സെക്കന്‍ഡറി സ്‌കൂള്‍, വി എം ജെ യു പി സ്‌കൂള്‍, വള്ളക്കടവ് എല്‍ പി സ്‌കൂള്‍ എന്നിവയുടെ മാനേജര്‍, തിരുവനന്തപുരം എജ്യുക്കേഷണല്‍ ആന്‍ഡ് ചാരിറ്റബിള്‍ സെന്റര്‍ ജനറല്‍ സെക്രട്ടറി, ഐഡിയല്‍ അസോസിയേഷന്‍ ഫോര്‍ മൈനോറിറ്റി എജ്യൂക്കേഷന്‍ (ഐ എ എം ഇ) നിര്‍വാഹക സമിതിയംഗം, സുന്നി മാനേജ്മെന്റ് അസോസിയേഷന്‍ എക്സിക്യൂട്ടീവ് അംഗം, സുന്നി വിദ്യാഭ്യാസ ബോര്‍ഡ് എക്സിക്യൂട്ടീവ് അംഗം, ജാമിഅത്തുല്‍ ഹിന്ദ് അല്‍ ഇസ്ലാമി എക്സിക്യൂട്ടീവ് അംഗം, കൊല്ലം പാരിപ്പള്ളി ജൗഹരിയ്യ ചാരിറ്റബിള്‍ ട്രസ്റ്റ് സെക്രട്ടറി, തിരുവനന്തപുരം മെഡിക്കല്‍ കോളജ് ജുമാമസ്ജിദ് സെക്രട്ടറി എന്നീ സ്ഥാനങ്ങള്‍ വഹിച്ചുവരുന്നു. സംസ്ഥാന പൊതുമേഖലാ സ്ഥാപനമായ കേരള ഓട്ടോമൊബൈല്‍സ് ലിമിറ്റഡ് ഉദ്യോഗസ്ഥനായിരുന്നു. ഭാര്യ: ആബിദാ റഷീദ്. മക്കള്‍: ഡോ. ബുര്‍ഹാന്‍ അബ്ദുല്‍ ഖാദര്‍, അഡ്വ. മുഹമ്മദ് ഉവൈസ്, ആര്‍ക്കിടെക്ചര്‍ വിദ്യാര്‍ഥിയായ മുഹമ്മദ് യാസീന്‍.
ജനാധിപത്യ മഹിളാ അസോസിയേഷന്‍ സംസ്ഥാന സമിതി അംഗമായ പി റോസ ഇരിട്ടി ബ്ലോക്ക് പഞ്ചാത്ത് അധ്യക്ഷയായിരുന്നു. ആറളം പഞ്ചായത്ത് പ്രസിഡന്റ്, കണ്ണൂര്‍ ജില്ലാ പഞ്ചായത്ത് വിദ്യാഭ്യാസം, ആരോഗ്യം സ്റ്റാന്‍ഡിംഗ് കൗണ്‍സില്‍ ചെയര്‍പേഴ്സണ്‍ എന്നീ സ്ഥാനങ്ങള്‍ വഹിച്ചിട്ടുണ്ട്. സി പി എം ആറളം ലോക്കല്‍ കമ്മിറ്റി സെക്രട്ടറി ടി എ ജോസഫാണ് ഭര്‍ത്താവ്. ഡോ. അനിതാ ജോസഫ്, അരുണ്‍ ജോസഫ് എന്നിവര്‍ മക്കളാണ്.
Latest
എ പ്രദീപ് കുമാര്‍ മുഖ്യമന്ത്രിയുടെ പ്രൈവറ്റ് സെക്രട്ടറി; ഉത്തരവിറങ്ങി
മദ്യപിച്ചെത്തിയ ഡ്രൈവറെ വാഹനമോടിക്കാന്‍ അനുവദിച്ചില്ല; തിരുവനന്തപുരത്ത് ബസ് ഡ്രൈവര്‍ കണ്ടക്ടറെ കുത്തി
ഒഡിഷയില്‍ ശക്തമായ ഇടിമിന്നലില്‍ ആറ് സ്ത്രീകളുള്‍പ്പെടെ 10 മരണം; നാലു പേര്‍ക്ക് ഗുരുതര പരുക്ക്
കോവളത്ത് പാമ്പ് കടിയേറ്റ് അതിഥി തൊഴിലാളി മരിച്ചു
സിഐഎസ്എഫുകാര്‍ യുവാവിനെ കാറിടിച്ചു കൊലപ്പെടുത്തിയ കേസ്; ആഭ്യന്തര അന്വേഷണം ആരംഭിച്ചു
മേപ്പാടിയില്‍ ടെന്റ് തകര്‍ന്നുവീണ് യുവതി മരിച്ച സംഭവം: എന്തുകൊണ്ട് തന്റെ മകള്‍ക്ക് മാത്രം അപകടം സംഭവിച്ചു; അന്വേഷണം ആവശ്യപ്പെട്ട് നിഷ്മയുടെ മാതാവ്
