ദുബൈ ഭരണകാധികാരിയുടെ സഹോദരൻ ശൈഖ് അഹ്മദ് ബിൻ റാഷിദ് അൽ മക്തൂം അന്തരിച്ചു; 10 ദിവസത്തെ ദുഃഖാചരണം

ദുബൈ | യു എ ഇ ഭരണാധികാരിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂമിന്റെ സഹോദരനും ദുബൈ പോലീസിന്റെയും പബ്ലിക് സർവീസസിന്റെയും ഡെപ്യൂട്ടി ചെയർമാനും അൽ വസൽ സ്പോർട്സ് ക്ലബ് പ്രസിഡന്റുമായിരുന്ന ശൈഖ് അഹ്മദ് ബിൻ റാഷിദ് അൽ മക്തൂം (76) അന്തരിച്ചു. വേർപാടിനെ തുടർന്ന് ദുബായിൽ 10 ദിവസത്തെ ഔദ്യോഗിക ദുഃഖാചരണം പ്രഖ്യാപിച്ചു. ദുഃഖാചരണത്തിന്റെ ഭാഗമായി എമിറേറ്റിലുടനീളം ദേശീയ പതാക പകുതി താഴ്ത്തിക്കെട്ടും.

ദുബൈ മുൻ വൈസ് പ്രസിഡന്റും ഭരണാധികാരിയും എമിറേറ്റിന്റെ സ്ഥാപകനുമായ പരേതനായ ശൈഖ് റാഷിദ് ബിൻ സയീദ് അൽ മക്തൂമിന്റെ നാലാമത്തെയും ഏറ്റവും ഇളയതുമായ മകനാണ് ശൈഖ് അഹ്മദ് ബിൻ റാഷിദ് അൽ മക്തൂം. യുകെയിലെ (UK) റോയൽ മിലിട്ടറി അക്കാദമി സാൻഡ്‌ഹേർസ്റ്റിൽ നിന്ന് ബിരുദം നേടിയ ശേഷം ദുബായുടെ സെൻട്രൽ മിലിട്ടറി റീജിയനിൽ ചേർന്ന അദ്ദേഹം പിന്നീട് അതിന്റെ കമാൻഡർ ഇൻ ചീഫായി സേവനമനുഷ്ഠിച്ചു. അദ്ദേഹത്തിന്റെ നേതൃത്വത്തിലാണ് സെൻട്രൽ മിലിട്ടറി റീജിയൻ യു എ ഇയിലെ പ്രധാന സൈനിക താവളങ്ങളിലൊന്നായി ഉയർന്നത്.

അൽ വസൽ സ്പോർട്സ് ക്ലബ്ബുമായി പതിറ്റാണ്ടുകൾ നീണ്ട ബന്ധമുള്ള അദ്ദേഹം ഏകദേശം 60 വർഷത്തോളം ക്ലബ്ബിന്റെ പ്രസിഡന്റായി സേവനമനുഷ്ഠിച്ചു. 1960-ൽ സാബീലിൽ സ്ഥാപിതമായ അൽ സമാലെക് എന്നറിയപ്പെട്ടിരുന്ന ക്ലബ്ബിന്റെ ആദ്യ ഭരണസമിതി 1962-ൽ രൂപീകരിക്കാൻ അദ്ദേഹം സഹായിക്കുകയും 1974 വരെ ചെയർമാനായി പ്രവർത്തിക്കുകയും ചെയ്തു. അദ്ദേഹത്തിന്റെ നേതൃത്വത്തിൽ അൽ വസൽ രാജ്യത്തെ പ്രമുഖ സ്പോർട്സ് ക്ലബ്ബുകളിലൊന്നായി വളർന്നു.

യു എ ഇയിലെ കുതിരപ്പന്തയം വികസിപ്പിക്കുന്നതിലും അദ്ദേഹം പ്രധാന പങ്കുവഹിച്ചു. ജെബൽ അലി റേസ്‌കോഴ്‌സ് സ്ഥാപിച്ച അദ്ദേഹം അൽ അദിയാത്, ദുബൈ ഹോഴ്‌സ് റേസിംഗ് സെന്റർ എന്നിവയ്ക്ക് തുടക്കമിടുകയും റേസിംഗ് നിയമങ്ങൾ വികസിപ്പിക്കുന്നതിൽ പങ്കാളിയാവുകയും ചെയ്തു. കൂടാതെ, ദുബൈ ഇന്റർനാഷണൽ മറൈൻ ക്ലബ്ബിന്റെ ആദ്യ ചെയർമാനായി 1988-ൽ ചുമതലയേറ്റ ശൈഖ് അഹ്മദ് ബിൻ റാഷിദ് അൽ മക്തൂം 1989-ൽ വിക്ടറി ടീം രൂപീകരിക്കുന്നതിലും പങ്കുവഹിച്ചു.

സഹോദരന്റെ വേർപാടിൽ ശൈഖ് മുഹമ്മദ് ബിൻ റാഷിദ് അൽ മക്തൂം സോഷ്യൽ മീഡിയയിലൂടെ വൈകാരികമായ സന്ദേശം പങ്കുവെച്ചു. തന്റെ പ്രാർത്ഥനകളിലും ഹൃദയത്തിലും സഹോദരൻ എന്നും ഉണ്ടാകുമെന്ന് അദ്ദേഹം കുറിച്ചു. യു എ ഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്‌യാൻ ദുബൈ ഭരണാധികാരിയെ അനുശോചനം അറിയിച്ചു. രാജ്യത്തിന്റെ രൂപീകരണ കാലം മുതൽ യു എ ഇയുടെ വികസനത്തിന് ശൈഖ് അഹ്മദ് നൽകിയ സംഭാവനകൾ എന്നും ഓർമ്മിക്കപ്പെടുമെന്ന് അദ്ദേഹം പറഞ്ഞു. ദുബൈ കിരീടാവകാശി ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമും പരേതനായ ശൈഖ് അഹ്മദിന് ആദരാഞ്ജലികൾ അർപ്പിച്ചു. ശൈഖ് അഹ്മദിന്റെ വേർപാടിൽ ദുബൈ മീഡിയ ഓഫീസും അനുശോചനം രേഖപ്പെടുത്തി.

Content Highlights

Sheikh Ahmed bin Rashid Al Maktoum passed away at 76. Dubai declared 10 days of official mourning. UAE leaders offered condolences, honoring his military, sports, and developmental legacy.