Kasargod

കുടിവെള്ളമില്ല, ജൽജീവൻ-അമൃത് പദ്ധതികളിൽ കോടികളുടെ അഴിമതിയെന്ന് പരാതി; ഇ ഡി അന്വേഷണത്തിന് ആവശ്യം

2025-ഓടെ എല്ലാ ഗ്രാമീണ വീടുകളിലും ശുദ്ധജലം എത്തിക്കുക എന്ന ലക്ഷ്യത്തോടെ തുടങ്ങിയ പദ്ധതി, കാസർഗോഡ് ജില്ലയിൽ വെറും 'പൈപ്പ് ഇടൽ' പ്രഹസനമായി മാറിയിരിക്കുകയാണ്.

Published

Feb 05, 2026 5:18 pm |

Last Updated

Feb 05, 2026 5:18 pm

വെബ് ഡെസ്‌ക്

നീലേശ്വരം| ജില്ലയിലെ കുടിവെള്ള ക്ഷാമത്തിന് ശാശ്വത പരിഹാരമെന്നോണം കേന്ദ്ര-സംസ്ഥാന സർക്കാരുകളുടെ സഹകരണത്തോടെ നടപ്പിലാക്കിയ ജൽജീവൻ മിഷൻ, അമൃത് പദ്ധതികൾ വൻ അഴിമതിയിൽ മുങ്ങുന്നു. 2025-ഓടെ എല്ലാ ഗ്രാമീണ വീടുകളിലും ശുദ്ധജലം എത്തിക്കുക എന്ന ലക്ഷ്യത്തോടെ തുടങ്ങിയ പദ്ധതി, കാസർഗോഡ് ജില്ലയിൽ വെറും ‘പൈപ്പ് ഇടൽ’ പ്രഹസനമായി മാറിയിരിക്കുകയാണ്. കോടിക്കണക്കിന് രൂപയുടെ കേന്ദ്ര ഫണ്ട് അട്ടിമറിച്ച കേരള വാട്ടർ അതോറിറ്റിയുടെ നടപടിക്കെതിരെ എൻഫോഴ്‌സ്‌മെന്റ് ഡയറക്ടറേറ്റ് (ഇ ഡി) അന്വേഷണം വേണമെന്ന ആവശ്യവുമായി ഉപഭോക്താക്കൾ രംഗത്തെത്തി.

സ്രോതസ്സില്ലാത്ത കണക്ഷനുകൾ; പഴയ ഉപഭോക്താക്കളും ദുരിതത്തിൽ

പുതിയ ജലസ്രോതസ്സുകളോ സംഭരണികളോ നിർമ്മിക്കാതെ, നിലവിലുള്ള പഴയ പദ്ധതികളിൽ നിന്ന് അശാസ്ത്രീയമായി ആയിരക്കണക്കിന് കണക്ഷനുകൾ നൽകിയതാണ് നിലവിലെ പ്രതിസന്ധിക്ക് കാരണം. ഇത് പുതിയവർക്ക് വെള്ളം കിട്ടാതാക്കിയെന്ന് മാത്രമല്ല, നിലവിൽ വെള്ളം ലഭിച്ചിരുന്ന പഴയ ഉപഭോക്താക്കളുടെ വിതരണം കൂടി തടസ്സപ്പെടുത്തി. കയ്യൂർ-ചീമേനി, ചെറുവത്തൂർ, വെസ്റ്റ് എളേരി, ഈസ്റ്റ് എളേരി, ബളാൽ, കോടോം-ബേളൂർ, മടിക്കൈ, അജാനൂർ, പുല്ലൂർ-പെരിയ, മുളിയാർ, ഉദുമ, പള്ളിക്കര തുടങ്ങിയ പഞ്ചായത്തുകളിൽ പദ്ധതി പൂർണ്ണമായും പരാജയപ്പെട്ട നിലയിലാണ്.

വെള്ളമില്ലാത്ത പൈപ്പിന് ഭീമമായ ബില്ല്; ജനങ്ങൾ ചതിക്കപ്പെട്ടു

കണക്ഷനുകൾ സൗജന്യമാണെന്ന് തെറ്റിദ്ധരിപ്പിച്ചാണ് പലയിടത്തും ജനങ്ങളെ പദ്ധതിയുടെ ഭാഗമാക്കിയത്. എന്നാൽ ഒരു തുള്ളി വെള്ളം പോലും ലഭിക്കാതെ തന്നെ അയ്യായിരം രൂപ വരെ മാസ ബില്ല് വരുന്നത് കണ്ട് സാധാരണക്കാർ അമ്പരപ്പിലാണ്. നിയമനടപടികൾ ഭയന്ന് പലരും ഈ തുക ശപിച്ചുകൊണ്ട് അടച്ചുതീർക്കുകയാണ്. കാസർഗോഡ് നഗരസഭയിൽ അമൃത് പദ്ധതി വഴി നൽകിയ അയ്യായിരത്തോളം കണക്ഷനുകളിലും സമാനമായ രീതിയിൽ ജലലഭ്യതയില്ല.
ഉദ്യോഗസ്ഥ-കരാറുകാർ അവിശുദ്ധ കൂട്ടുകെട്ട് പദ്ധതി നിർവ്വഹണത്തിൽ വലിയ തോതിലുള്ള ക്രമക്കേടുകൾ നടന്നതായി ഗുണഭോക്താക്കൾ ആരോപിക്കുന്നു.

പണം തട്ടൽ: പണി പൂർത്തിയാക്കാത്ത കരാറുകാർക്ക് ഉദ്യോഗസ്ഥരുടെ ഒത്താശയോടെ 20 കോടി രൂപ കൈമാറി.

മീറ്റർ തകരാർ: 2023-ൽ സ്ഥാപിച്ച മീറ്ററുകൾ മിക്കതും പ്രവർത്തനരഹിതമാണ്, ഇത് വഴി കോടികളുടെ നഷ്ടം സംഭവിച്ചു.

അശാസ്ത്രീയത: വാട്ടർ അതോറിറ്റി ഉദ്യോഗസ്ഥർ സ്ഥലം സന്ദർശിക്കാതെ കരാറുകാർക്ക് തോന്നിയ പോലെ കണക്ഷൻ നൽകിയതിനാൽ പല വീടുകളിലും ആവശ്യമില്ലാതെ രണ്ട് കണക്ഷനുകൾ വരെയുണ്ട്.

രേഖകളിലെ കൃത്രിമം: ചെങ്കള, ബോവിക്കാനം പഞ്ചായത്തുകളിൽ 10,000 കണക്ഷനുകൾ നൽകിയതായി കണക്കുകളുണ്ടെങ്കിലും വെറും 250 എണ്ണം മാത്രമാണ് ടാഗ് ചെയ്തിട്ടുള്ളത്.
കരാറുകാരെ വഴിവിട്ട് സഹായിക്കാനും കമ്മീഷനും വേണ്ടി മാത്രം നടപ്പിലാക്കിയ ഈ പദ്ധതികൾ ജില്ലയ്ക്ക് ശാപമായി മാറിയിരിക്കുകയാണ്. കേന്ദ്ര ഫണ്ട് ദുരുപയോഗം ചെയ്തതിനെക്കുറിച്ചും ഉദ്യോഗസ്ഥരുടെ കെടുകാര്യസ്ഥതയെക്കുറിച്ചും സമഗ്രമായ അന്വേഷണം വേണമെന്ന ആവശ്യത്തിൽ ഉറച്ചുനിൽക്കുകയാണ് ഉപഭോക്താക്കൾ.