മാളിക്കടവില്‍ യുവതിയെ കൊലപ്പെടുത്തിയ കേസ്; യുവതി സൈക്കോളജിസ്റ്റിന് അയച്ച ശബ്ദ സന്ദേശം പോലീസിന് ലഭിച്ചു

കോഴിക്കോട്| കോഴിക്കോട് മാളിക്കടവില്‍ യുവതിയെ കെട്ടിത്തൂക്കി കൊലപ്പെടുത്തിയ കേസില്‍ പ്രധാന തെളിവ് പോലീസിന് ലഭിച്ചു. യുവതി സൈക്കോളജിസ്റ്റിന് അയച്ച ശബ്ദ സന്ദേശമാണ് പോലീസിന് കിട്ടിയത്. തന്റെ ജീവന് അപായമുണ്ടെന്നും തനിക്കെന്തെങ്കിലും സംഭവിച്ചാല്‍ ഉത്തരവാദി വൈശാഖനാണെന്നും ചൂണ്ടിക്കാട്ടി യുവതി സൈക്കോളജിസ്റ്റിന് സന്ദേശമയച്ചിരുന്നെന്ന് പോലീസ് കണ്ടെത്തി. യുവതി കൊല്ലപ്പെട്ട ദിവസം രാവിലെ 9.30നാണ് സന്ദേശം അയച്ചത്. താന്‍ ഒരിക്കലും ജീവനൊടുക്കില്ലെന്നും സന്ദേശത്തില്‍ പറയുന്നു. വൈശാഖന്‍ മുമ്പ് പലതവണ യുവതിയെ കൗണ്‍സിലിംഗ് സെന്ററില്‍ എത്തിച്ചിരുന്നെന്നാണ് വിവരം.

കൗണ്‍സിലിംഗിനായി ഈ മാസം 20, 22 തീയതികളില്‍ പ്രതി വൈശാഖന്‍ യുവതിയെ ഭാര്യയെന്ന് പരിചയപ്പെടുത്തി കല്ലായിയിലുള്ള സൈക്കോളജിസ്റ്റിന്റെ അടുത്ത് എത്തിച്ചിരുന്നു. 27 ന് വീണ്ടും കൗണ്‍സിലിംഗിന് എത്താമെന്ന് പറഞ്ഞാണ് തിരിച്ചു പോയത്. എന്നാല്‍ 24 ന് ഉച്ചയോടെയാണ് വൈശാഖന്റെ സ്ഥാപനത്തിനകത്ത് യുവതി കൊല്ലപ്പെടുന്നത്. ഓഫീസ് നമ്പറിലേക്ക് വന്ന ഈ സന്ദേശം പിന്നീടാണ് ശ്രദ്ധയില്‍പ്പെട്ടതെന്നാണ് സൈക്കോളജിസ്റ്റിന്റെ മൊഴി. 16 വയസില്‍ നേരിട്ട പീഡനമുള്‍പ്പെടെ വിവരിക്കുന്ന ഡയറിയുടെ ഭാഗവും യുവതി സൈക്കോളജിസ്റ്റിന് വാട്‌സ് ആപ്പില്‍ അയച്ചു കൊടുത്തിട്ടുണ്ട്. ഈ സന്ദേശങ്ങള്‍ അയച്ചത് അറിയാതെയാണ് യുവതിയെ ഒരുമിച്ച് ജീവനൊടുക്കാമെന്ന് പറഞ്ഞ് വൈശാഖന്‍ വിളിച്ചുവരുത്തി കൊലപ്പെടുത്തുന്നത്. ആദ്യം കൗണ്‍സിലിംഗിനെത്തിയപ്പോള്‍ യുവതി ഭാര്യയാണെന്നായിരുന്നു വൈശാഖന്‍ പറഞ്ഞത്. പിന്നീട് ഇത് വൈശാഖന്‍ തിരുത്തിപ്പറയുകയായിരുന്നു.

അതേസമയം പ്രതി വൈശാഖന്‍ മൂന്ന് ദീവസം കൂടി എലത്തൂര്‍ പോലീസിന്റെ കസ്റ്റഡിയില്‍ തുടരും. കേസുമായി ബന്ധപ്പെട്ട സ്ഥലങ്ങളിലെല്ലാം പ്രതിയെ എത്തിച്ച് കഴിഞ്ഞ ദിവസം തെളിവെടുപ്പ് നടത്തിയിരുന്നു.