കോട്ടയം- കുമരകം- ചേര്‍ത്തല പുതിയ ഇടനാഴി: സാധ്യതാ പഠനം നടത്തും

കോട്ടയം | ദേശീയപാത 183നെയും 66നെയും ബന്ധിപ്പിച്ചുകൊണ്ട് കോട്ടയത്ത് നിന്ന് ആരംഭിച്ച് കുമരകം വെച്ചൂര്‍ വഴി ചേര്‍ത്തലയിലേക്ക് പുതിയ ഇടനാഴി നിര്‍മിക്കുന്നത് സംബന്ധിച്ച് സാധ്യതാ പഠനം നടത്താന്‍ കേന്ദ്ര ഉപരിതല ഗതാഗത വകുപ്പ് മന്ത്രി നിധിന്‍ ഗഡ്കരി ഉത്തരവിട്ടതായി അഡ്വ. കെ ഫ്രാന്‍സിസ് ജോര്‍ജ് എം പി അറിയിച്ചു. റോഡ് നിര്‍മാണം സംബന്ധിച്ച് മന്ത്രിയുമായി നേരിട്ട് ചര്‍ച്ച നടത്തിയതിന്റെ അടിസ്ഥാനത്തില്‍ ആണ് ഇക്കാര്യത്തില്‍ തീരുമാനം എടുത്തത്.

കോട്ടയം കോടിമതയില്‍ നിന്ന് ആരംഭിച്ച് കുമരകം വെച്ചൂര്‍ വഴി ചേര്‍ത്തലക്കുള്ള പാത നിര്‍മിക്കുന്നത് സംബന്ധിച്ചുള്ള സാധ്യതാപഠനമാണ് നടത്തുന്നത്. ഇതു സംബന്ധിച്ച് പഠനം നടത്തി രണ്ട് മാസത്തിനകം റിപോര്‍ട്ട് നല്‍കാന്‍ ദേശീയപാതാ അതോറിറ്റി ബോര്‍ഡ് മെമ്പര്‍ വെങ്കിട്ടരമണനെയാണ് മന്ത്രി ചുമതലപ്പെടുത്തിയിരിക്കുന്നതെന്ന് ഫ്രാന്‍സിസ് ജോര്‍ജ് പറഞ്ഞു.

പി ജെ ജോസഫ് പൊതുമരാമത്ത് വകുപ്പ് മന്ത്രി ആയിരുന്ന കാലത്ത് കേരളാ റോഡ് ഫണ്ട് ബോര്‍ഡ് നടത്തിയ വിശദമായ പഠന റിപോര്‍ട്ടും നിവേദനത്തോടൊപ്പം ഫ്രാന്‍സിസ് ജോര്‍ജ് കേന്ദ്ര മന്ത്രിക്ക് സമര്‍പ്പിച്ചു. കോട്ടയം, ആലപ്പുഴ, എറണാകുളം ജില്ലകളെ തമ്മില്‍ ബന്ധിപ്പിക്കുന്ന ഈ ഇടനാഴി നിര്‍മിക്കുന്നതിലൂടെ മധ്യ കേരളത്തിലെ ഗതാഗത രംഗത്ത് വലിയ കുതിച്ച് ചാട്ടത്തത്തിന് ഇടയാക്കും. കോട്ടയം, ഇടുക്കി, ആലപ്പുഴ, പത്തനംതിട്ട ജില്ലകളിലെ ആളുകള്‍ക്ക് ഇത് വളരെ പ്രയോജനപ്പെടും. നെടുമ്പാശ്ശേരി വിമാനത്താവളത്തിലേക്ക് തടസ്സമില്ലാതെ യാത്രാ ചെയ്യാനും സാധിക്കും.

ലോക ഭൂപടത്തില്‍ സ്ഥാനം പിടിച്ചിട്ടുള്ള കുമരകം ടൂറിസ്റ്റ് കേന്ദ്രത്തിലേക്ക് വിദേശികള്‍ അടക്കമുള്ള ആളുകള്‍ക്ക് സുഗമമായി യാത്രാ ചെയ്യുവാനും ഈ ഇടനാഴി സഹായിക്കുമെന്ന് ഫ്രാന്‍സിസ് ജോര്‍ജ് പറഞ്ഞു. പഠിച്ച് റിപേര്‍ട്ട് നല്‍കാന്‍ ചുമതലപ്പെടുത്തിയിരിക്കുന്ന ദേശീയപാതാ അതോറിറ്റി അംഗം വെങ്കിട്ടരമണന്റെ നേതൃത്വത്തിലുള്ള സംഘം ഉടന്‍ സ്ഥലം സന്ദര്‍ശിക്കുമെന്നും എം പി അറിയിച്ചു.