കോഴിക്കോട് പുതിയ സ്റ്റാന്‍ഡില്‍ വൻ തീപ്പിടിത്തം

കോഴിക്കോട് | കോഴിക്കോട് മാവൂർ റോഡിലെ പുതിയ സ്റ്റാന്‍ഡിൽ കെട്ടിടത്തിന് തീ പിടിച്ചു. അഗ്നിശമനസേനയെത്തി തീ നിയന്ത്രണവിധേമാക്കുകയാണ്. വൈകിട്ട് അഞ്ചരയോടെയാണ് സ്റ്റാൻഡിലെ ഷോപ്പിംഗ് കോംപ്ലക്സിൻ്റെ രണ്ടാം നിലയിൽ തീപ്പിടിത്തമുണ്ടായത്. കടയില്‍ തീ പടര്‍ന്നപ്പോള്‍ തന്നെ ആളുകള്‍ ഓടിമാറിയതിനാൽ വൻ ദുരന്തം ഒഴിവായി. ആദ്യം മെഡിക്കൽ ഷോപ്പിലായിരുന്നു തീപ്പിടിച്ചത്. തുടർന്ന് വസ്ത്ര വ്യാപാരശാലയായ കാലിക്കറ്റ് ടെക്സ്റ്റൈൽസിലേക്ക് പടരുകയായിരുന്നു.

സമീപത്തെ മറ്റ് കടകളിലേക്ക് തീ പടരുന്നത് ഒഴിവാക്കാനുള്ള തീവ്രയത്നം തുടരുകയാണ്. അഗ്‌നിരക്ഷാസേനയുടെ നിരവധി യൂനിറ്റുകള്‍ സ്ഥലത്തെത്തിയിട്ടണ്ട്. സമീപത്തെ കൂടുതൽ യൂനിറ്റുകളിൽ നിന്ന് അഗ്നിരക്ഷാ ഉപകരണങ്ങൾ സ്ഥലത്തെത്തിക്കുകയാണ്. കെട്ടിടത്തിനിരുവശവും തീ പടർന്നതോടെ ബസ് സ്റ്റാൻഡിനകത്തും പുകയുയർന്നു. കെട്ടിടത്തിലുള്ളവരെയും സമീപത്തെ കെട്ടിടത്തിലുള്ളവരെയും പൂർണമായും ഒഴിപ്പിച്ചു. കെട്ടിടത്തിന് താഴത്തുള്ളവരെയെല്ലാം മാറ്റി.

മേൽക്കൂര കത്തി താഴേക്ക് വീണുകൊണ്ടിരിക്കുകയാണ്. ആദ്യം തീ അണച്ച ഭാഗത്ത് വീണ്ടും തീ ആളിപ്പടർന്നു.  ബസുകൾ മുഴുവനും സ്റ്റാൻഡിന് പുറത്തേക്ക് മാറ്റി നിർത്തിയിട്ടു. ആളപായമൊന്നും റിപോർട്ട് ചെയ്തിട്ടില്ല. വൻ നാശനഷ്ടമാണ് കണക്കാക്കുന്നത്.