കുട്ടികൾക്കെതിരെയുള്ള കുറ്റകൃത്യങ്ങൾ: സാമൂഹിക ജാഗ്രത അനിവാര്യം- എസ് എസ് എഫ്

പ്രൊഫ്സമ്മിറ്റില്‍ സംസ്ഥാന ജന.സെക്രട്ടറി സി എന്‍ ജാഫര്‍ മുഖ്യപ്രഭാഷണം നടത്തുന്നു

കോഴിക്കോട് | കുട്ടികള്‍ക്കെതിരെ സമീപകാലത്തായി വർധിച്ചു വരുന്ന ലൈംഗിക പീഡനങ്ങളും അതിക്രമങ്ങളും സമൂഹത്തിന്റെ മാനസികാരോഗ്യ ഘടന തകർന്നതിന്റെ സൂചനയാണെന്ന് എസ് എസ് എഫ് സംസ്ഥാന ജനറൽ സെക്രട്ടറി സി എൻ ജാഫർ. എസ് എസ് എഫ് പ്രൊഫഷണൽ വിദ്യാർഥികൾക്കായി സംഘടിപ്പിച്ച പ്രൊഫ് സമ്മിറ്റിൽ മുഖ്യപ്രഭാഷണം നടത്തുകയായിരുന്നു അദ്ദേഹം.

ലോക്ക്ഡൗൺ കാലത്ത് മാത്രം  സംസ്ഥാനത്ത് ലൈംഗിക പീഡനത്തിനും കൊലപാതകത്തിനും ഇരയായത് നിരവധി കുരുന്നുകളാണ്. കേരളീയ സമൂഹത്തിന് നാണക്കേടുണ്ടാക്കും വിധമാണ് കുട്ടികൾക്ക് നേരെയുള്ള കുറ്റകൃത്യങ്ങൾ വർധിച്ചു വരുന്നത്. വണ്ടിപ്പെരിയാറിലെത്തി നിൽക്കുന്ന ഇത്തരം പീഡന കൊലപാതകങ്ങൾ അവസാനിക്കണമെങ്കിൽ സമൂഹവും നിയമ സംവിധാനങ്ങളും അതിജാഗ്രത പുലർത്തേണ്ടതുണ്ട്. അഞ്ച് വയസ്സിന് താഴെയുള്ള കുട്ടികൾ പോലും ലൈംഗിക വൈകൃതത്തിന് ഇരയാകുന്നു. നവജാത ശിശുക്കളുൾപ്പെടെ കൊല്ലപ്പെടുന്നു. പലതിലും പ്രതിയാകുന്നത് മാതാപിതാക്കൾ തന്നെയാണെന്നത് കൂടുതൽ ആശങ്കയുണ്ടാക്കുന്നു. വലിയൊരു സാമൂഹിക ദുരന്തമായി മാറി കൊണ്ടിരിക്കുന്ന ഈ പ്രവണത അവസാനിപ്പിക്കാൻ സർക്കാറും സമൂഹവും ഗൗരവായ ആലോചനകൾ നടത്തി പരിഹാമുണ്ടാക്കേണ്ടതുണ്ടെന്നും അദ്ദേഹം പറഞ്ഞു.

മൂന്ന് ദിവസം നീണ്ടുനിന്ന പ്രൊഫ്സമ്മിറ്റില്‍ രാജ്യത്തെ വിവിധ പ്രൊഫഷണല്‍ ക്യാമ്പസുകളില്‍ നിന്നായി അയ്യായിരം വിദ്യാര്‍ഥികളാണ് പങ്കെടുത്തത്. കൊവിഡിന്റെ പശ്ചാത്തലത്തില്‍ ഓണ്‍ലൈനിലായി നടന്ന പ്രൊഫ്സമ്മിറ്റില്‍ മതം, രാഷ്ട്രീയം, സാമൂഹികം, പഠനം, കരിയര്‍, കല തുടങ്ങി വിവിധ സെഷനുകള്‍ക്ക് പണ്ഡിതരും വിദ്യാഭ്യാസ വിചക്ഷണരും നേതൃത്വം നല്‍കി.