Kerala
പി എം നിയാസിനെ ബേപ്പൂരില് മത്സരിക്കുന്നതിനെതിരെ കോണ്ഗ്രസില് പ്രതിഷേധം
കോഴിക്കോട് | അഡ്വ. പി എം നിയാസിനെ ബേപ്പൂരില് മത്സരിപ്പിക്കാനുള്ള നീക്കത്തിനെതിരെ പ്രതിഷേധവുമായി പാര്ട്ടി പ്രവര്ത്തകര്. കഴിഞ്ഞ തദ്ദേശ തിരഞ്ഞെടുപ്പില് കോഴിക്കോട് കോര്പറേഷനിലെ ബേപ്പൂര് മേഖലയില് പാര്ട്ടിയെ തോല്പ്പിക്കാന് ശ്രമിച്ച വ്യക്തിയാണ് നിയാസെന്നും അദ്ദേഹത്തിന് സീറ്റ് നല്കിയാല് പാര്ട്ടി സ്ഥാനങ്ങളില് നിന്ന് രാജിവെക്കുമെന്നും ചൂണ്ടിക്കാട്ടി ചിലര് കെ പി സി സി പ്രസിഡന്റ് മുല്ലപ്പള്ളി രാമചന്ദ്രന് കത്ത് എഴുതി. ബൂത്ത് തലം മുതല് ജില്ലാതലം വരെയുള്ള ഏതാനും നേതാക്കളാണ് രാജി ഭീഷണി മുഴക്കി മുല്ലപ്പള്ളിക്ക് കത്ത് എഴുതിയത്.
കോര്പറേഷനില് ഒരു ഡസന് കോണ്ഗ്രസ് സ്ഥാനാര്ഥികളുടെയെങ്കിലും തോല്വിക്ക് പിന്നില് നിയാസായിരുന്നു. ഇത് പാര്ട്ടി ഫോറങ്ങളില് ചര്ച്ച ചെയ്തതാണ്. പാര്ട്ടി സ്ഥാനാര്ഥികളെക്കുറിച്ച് അപവാദങ്ങള് പ്രചരിപ്പിക്കുകയും റിബല് സ്ഥാനാര്ഥികളെ ഇറക്കുകയും ചെയ്തു. ഇന്നുവരെ ബേപ്പൂരിലെ ഒരു തിരഞ്ഞെടുപ്പ് പ്രചാരണത്തിനും നിയാസ് ഉണ്ടായിട്ടില്ല. മണ്ഡലത്തില് ഇപ്പോള് യു ഡി എഫിന് വിജയ സാധ്യതയുണ്ട്. നിയാസിനെപോലുള്ള ഒരാളെ കെട്ടിയിറക്കി ഇത് ഇല്ലാതാക്കരുതെന്നും കത്തില് ആവശ്യപ്പെടുന്നു.