സി പി എം സ്ഥാനാർഥി ചർച്ച: കുറ്റ്യാടിയിലും പാലക്കാട്ടും ആലപ്പുഴയിലും പോസ്റ്റർ

തിരുവനന്തപുരം | സി പി എം സ്ഥാനാർഥി ചർച്ച പുരോഗമിക്കുന്നതിനിടെ, കോഴിക്കോട് കുറ്റ്യാടിയിലും പാലക്കാട്ടും ആലപ്പുഴയിലും പോസ്റ്ററുകൾ പ്രത്യക്ഷപ്പെട്ടു. പാർട്ടി മത്സരിച്ചിരുന്ന മണ്ഡലം കേരള കോണ്‍ഗ്രസ് (എം) ജോസ് വിഭാഗത്തിന് വിട്ടുകൊടുക്കാനുള്ള നീക്കത്തിനെതിരെയാണ് കുറ്റ്യാടിയിലെ പോസ്റ്റർ. സീറ്റ് ഘടകകക്ഷിക്ക് നൽകാനുള്ള നീക്കത്തിനെതിരെ കുറ്റ്യാടിയിൽ പാർട്ടിക്കുള്ളിലും വലിയ പ്രതിഷേധമുണ്ട്.

സി പി എം ജില്ലാ സെക്രട്ടേറിയറ്റംഗവും മുന്‍ ജില്ലാപഞ്ചായത്ത് പ്രസിഡന്റുമായ കെ പി കുഞ്ഞമ്മദ് കുട്ടിയെ സ്ഥാനാര്‍ഥിയാക്കണമെന്നാവശ്യപ്പെട്ട് കുറ്റ്യാടിയിലെ വേളത്താണ് പോസ്റ്ററുകള്‍ പ്രത്യക്ഷപ്പെട്ടത്. സി പി എം ശക്തികേന്ദ്രമാണ് വേളം.

പാലക്കാട് തരൂർ സംവരണമണ്ഡലത്തിൽ മന്ത്രി എ കെ ബാലന്റെ ഭാര്യ ഡോ. പി കെ ജമീലയുടെ സ്ഥാനാർഥിത്വത്തിനെതിരെ നഗരത്തിൽ പോസ്റ്ററുകൾ പ്രത്യക്ഷപ്പെട്ടു. ജില്ലാ കമ്മിറ്റി ഓഫീസ്, ബാലന്റെ വസതി, പ്രസ് ക്ലബ് പരിസരങ്ങളിലാണ് പോസ്റ്ററുകൾ പ്രത്യക്ഷപ്പെട്ടത്.

അതിനിടെ, ആലപ്പുഴയിൽ ജി സുധാകരനെ മത്സരിക്കണമെന്നാവശ്യപ്പെട്ട് വീണ്ടും പോസ്റ്ററുകൾ പ്രത്യക്ഷപ്പെട്ടു. കഴിഞ്ഞ ദിവസവും ആലപ്പുഴയിൽ ജി സുധാകരന് വേണ്ടി പോസ്റ്ററുകളുണ്ടായിരുന്നു.