താന്‍ എത്തിയതോടെ ബി ജെ പിയുടെ വോട്ട് ഇരട്ടിയാകും: ഇ ശ്രീധരന്‍

മലപ്പുറം | താന്‍ ബി ജെ പിയില്‍ ചേര്‍ന്ന ഒറ്റക്കാരണം മതി ബി ജെ പി വോട്ട് ഇരട്ടിയാകാനെന്ന് ഇ ശ്രീധരന്‍.
വളരെ കാലമായി ബി ജെ പി അനുഭാവിയായിരുന്നു. പ്രധാനമന്ത്രി നരേന്ദ്ര മോദിയുമായി അടുത്ത ബന്ധമുണ്ട്. സത്യസന്ധതയും ധാര്‍മിക മൂല്യങ്ങളുമുള്ള പാര്‍ട്ടിയാണ് ബി ജെ പി. അതാണ് ബി ജെ പിയെ തിഞ്ഞെടുക്കാന്‍ കാരണമെന്നും ശ്രീധരന്‍ പറഞ്ഞു.

ഉദ്യോഗസ്ഥനായിരിക്കുമ്പോള്‍ ഒരു പക്ഷം പാടില്ല. ഇപ്പോള്‍ തന്റെ കര്‍മങ്ങളെല്ലാം കഴിഞ്ഞു. നാടിന് എന്തെങ്കിലും ചെയ്യണമെന്നുള്ളതുകൊണ്ടാണ് പാലാരിവട്ടം പാലത്തിന്റെ പണി ഏറ്റെടുത്തത്. ഉമ്മന്‍ചാണ്ടി, രമേശ് ചെന്നിത്തല, പിണറായി വിജയന്‍ എന്നിവരോട് തനിക്ക് വലിയ ബഹുമാനമുണ്ട്. എന്നാല്‍ പാര്‍ട്ടി എങ്ങനെയെങ്കിലും ഉയര്‍ത്തണമെന്നതില്‍ മാത്രമാണ് അവരുടെ ശ്രദ്ധ. എന്നാല്‍ ബി ജെ പിക്ക് രാജ്യത്തെ പടുത്തുയര്‍ത്തുക എന്നതല്ലാതെ മറ്റൊരു ഉദ്ദേശവുമില്ല.പാര്‍ട്ടി പറഞ്ഞാല്‍ താന്‍ മത്സരിക്കും.

പ്രകടനപത്രികയിലേക്ക് വേണ്ട തന്റെ നിര്‍ദേശങ്ങള്‍ തയ്യാറാക്കിയിട്ടുണ്ട്. കഴിഞ്ഞ 20 വര്‍ഷമായി കേരളത്തിലേക്ക് മികച്ചൊരു വ്യവസായം കടന്നുവരുന്നില്ല.രാജ്യത്തിനും സംസ്ഥാനത്തിനും ഗുണമില്ലാത്ത അടിസ്ഥാന സൗകര്യങ്ങളാണ് കേരളത്തില്‍ ഒരുക്കുന്നതെന്നും ശ്രീധരന്‍ ആരോപിച്ചു.