Kerala
64 പ്രാഥമികാരോഗ്യ കേന്ദ്രങ്ങള് കൂടി കുടുംബാരോഗ്യ കേന്ദ്രങ്ങളാക്കും; പൊതുജനാരോഗ്യ നിയമം നടപ്പാക്കാന് ഓര്ഡിനന്സ്
തിരുവനന്തപുരം | സംസ്ഥാനത്ത് പൊതുജനാരോഗ്യ നിയമം നടപ്പിലാക്കാന് തീരുമാനിച്ച് മന്ത്രിസഭാ യോഗം. 1939ലെ മദ്രാസ് പബ്ലിക് ഹെല്ത്ത് ആക്ടും 1955ലെ ട്രാവന്കൂര് കൊച്ചിന് പബ്ലിക് ഹെല്ത്ത് ആക്ടും ഏകീകരിച്ചു കൊണ്ട് കേരള പൊതുജനാരോഗ്യ നിയമം നടപ്പിലാക്കുന്നതിന് ഓര്ഡിനന്സ് പുറപ്പെടുവിക്കാന് ഗവര്ണറോട് ശിപാര്ശ ചെയ്യും.
1953ലെ ട്രാവന്കൂര് കൊച്ചിന് മെഡിക്കല് പ്രാക്ടീഷ്ണേഴ്സ് ആക്ടും 1914ലെ മദ്രാസ് മെഡിക്കല് രജിസ്ട്രേഷന് ആക്ടും ഏകീകരിച്ചുകൊണ്ട് കേരള മെഡിക്കല് പ്രാക്ടീഷ്ണേഴ്സ് ആക്ട് നടപ്പാക്കുന്നതിന് ഓര്ഡിനന്സ് പുറപ്പെടുവിക്കാന് ഗവര്ണറോട് ശിപാര്ശ ചെയ്യും. ആര്ദ്രം പദ്ധതിയുടെ ഭാഗമായി സംസ്ഥാനത്തെ 64 പ്രാഥമികാരോഗ്യ കേന്ദ്രങ്ങള് കൂടി കുടുംബാരോഗ്യ കേന്ദ്രങ്ങളായി ഉയര്ത്തും. ആര്ദ്രത്തിന്റെ ആദ്യഘട്ടമെന്ന നിലയില് 170 പ്രാഥമികാരോഗ്യ കേന്ദ്രങ്ങളെയും രണ്ടാംഘട്ടത്തില് 504 പ്രാഥമികാരോഗ്യ കേന്ദ്രങ്ങളെയുമാണ് കുടുബാരോഗ്യ കേന്ദ്രമാക്കി ഉയര്ത്താന് തീരുമാനിച്ചത്. 461 കേന്ദ്രങ്ങള് കുടുംബാരോഗ്യ കേന്ദ്രങ്ങളാക്കിയിരിക്കുകയാണ്. മൂന്നാം ഘട്ടത്തില് 212 പ്രാഥമികാരോഗ്യ കേന്ദ്രങ്ങളെ കുടുംബാരോഗ്യ കേന്ദ്രങ്ങളാക്കി ഉയര്ത്തുന്നതിനുള്ള നടപടികള് പുരോഗമിക്കുകയാണ്. വൈകാതെ പൂര്ത്തിയാകും.