ബജറ്റ് ഫോണ്‍ വിപണിയിലെത്തിച്ച് സാംസംഗ്; ഇരട്ട സെല്‍ഫി ക്യാമറാ മോഡലുമായി മോട്ടോറോള

ന്യൂയോര്‍ക്ക് | ചെലവ് കുറഞ്ഞ സ്മാര്‍ട്ട്‌ഫോണ്‍ മോഡലുകള്‍ ഇറക്കി സാംസംഗും മോട്ടോറോളയും. ഗ്യാലക്‌സി എ02 എന്ന മോഡലാണ് സാംസംഗ് വിപണിയില്‍ അവതരിപ്പിച്ചത്. 5,000 എം എ എച്ച്, പിൻവശത്തെ ഇരട്ട ക്യാമറയില്‍ ആദ്യത്തേതിന് 13 മെഗാപിക്‌സല്‍ ശേഷി തുടങ്ങിയവയാണ് പ്രധാന സവിശേഷതകള്‍.

തായ്‌ലാന്‍ഡില്‍ ഇറക്കിയ ഈ മോഡലിന് 2,999 തായ് ബഹ്ത് (ഏകദേശം 7,300 രൂപ) ആണ് വില. 2ജിബി+ 32ജിബി ആണ് സ്‌റ്റോറേജ്. അഞ്ച് മെഗാപിക്‌സല്‍ ആണ് സെല്‍ഫി ക്യാമറ.

ഇരട്ട സെല്‍ഫി ക്യാമറ വരുന്ന എഡ്ജ് എസ് എന്ന മോഡലാണ് മോട്ടോറോള ഇറക്കിയത്. 1,999 ചൈനീസ് യുവാന്‍ (22,600 രൂപ) ആണ് 6ജിബി+128ജിബി മോഡലിന്റെ വില. 8ജിബി+ 128ജിബി മോഡലിന് 2,399 ചൈനീസ് യുവാനും (27,000 രൂപ) 8ജിബി+ 256ജിബി മോഡലിന് 2,799 യുവാനും (31,600 രൂപ) ആണ് വില.

നാല് ക്യാമറകളാണ് പിന്‍വശത്തുള്ളത്. 64 മെഗാപിക്‌സല്‍ പ്രൈമറി സെന്‍സര്‍, 16 മെഗാപിക്‌സല്‍ അള്‍ട്രാ വൈഡ് ആംഗ്ള്‍ ലെന്‍സ്, 2 മെഗാപിക്‌സല്‍ വീതം ഡെപ്ത് സെന്‍സര്‍, ടൈം ഓഫ് ഫ്‌ളൈറ്റ് സെന്‍സര്‍ എന്നിങ്ങനെയാണ് പിന്‍വശത്തെ ക്യാമറ സവിശേഷതകള്‍.

ഇരട്ട സെല്‍ഫി ക്യാമറയില്‍ 16 മെഗാപിക്‌സല്‍ ആണ് പ്രൈമറി. എട്ട് മെഗാപിക്‌സല്‍ സെക്കന്‍ഡറി സെന്‍സറുമുണ്ട്. 4ജി, 5ജി കണക്ഷനുമുണ്ട്.